ތަޢުލީމަށް ޚިދުމަތް ކުރުމުގެ އެންމެ މަތީ ޝަރަފު ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޑރ. މުޙައްމަދު ޒާހިރު ޙުސައިނަށް އަރުވައިފި.

ދިވެހިރާއްޖޭގެ ތަޢުލީމަށް ޚިދުމަތް ކުރުމުގެ އެންމެ މަތީ ޝަރަފު ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޑރ. މުޙައްމަދު ޒާހިރު ޙުސައިނަށް އަރުވައިފިއެވެ. މި ޝަރަފު ޑރ. މުޙައްމަދު ޒާހިރު ޙުސައިނަށް އެރުވީ ޖުމްހޫރީ ދުވަހުގެ މުނާސަބަތުގައި އާދީއްތަ ދުވަހުގެ ރޭ ދަރުބާރުގޭގައި ބޭއްވި ޖަލްސާގައެވެ.

މި ޝަރަފު އެމަނިކުފަނަށް އަރުއްވައި، ޝަރަފުގެ އައްޑަނަ އާއި މެޑަލް ޙަވާލުކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ. މި ޝަރަފަކީ ދިވެހިރާއްޖޭގެ ތަޢުލީމީ ދާއިރާއަށް ފާހަގަކޮށްލެވޭ ޚިދުމަތް ކޮށްދީފައިވާ ބޭފުޅުންނަށް އެރުވޭ އެންމެ މަތީ ޝަރަފެވެ.

ޖުމްހޫރީ ދުވަހުގެ ރަސްމީ ޖަލްސާއަކީ ތަޢުލީމީ ގޮތުން މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ދެވިގެންދާ ޖަލްސާއެކެވެ. ނަމަވެސް ޖުމްހޫރީ ދުވަހުގެ ރަސްމީ ޖަލްސާގައި މިފަދަ ޝަރަފެއް ބޭފުޅަކަށް އެރުވުނު މިއީ ފުރަތަމަ ފަހަރެވެ.

ނޢޢވ ޑރ. މުޙައްމަދު ޒާހިރު ޙުސައިނަކީ މީގެކުރިން ތަޢުލީމީ ވަޒީރުކަމާއި، ޒުވާނުންގެ ވަޒީރުކަންވެސް އަދާކުރައްވާފައިވާ ބޭފުޅެކެވެ. އަތޮޅު ތެރޭގައި ތަޢުލީމީ މަރުކަޒުތައް ޤާއިމްކުރައްވައި، މުޤައްރަރުތައް މުރާޖަޢާ ކުރައްވައި ތަޢުލީމީ ދާއިރާއަށް އިޞްލާޙީ ބަދަލުތައް ގެނެސްދެއްވުމުގައި ޑރ. މުޙައްމަދު ޒާހިރު ޙުސައިން ވަނީ މުހިންމު ދައުރެއް އަދާ ކުރައްވާފައެވެ.

ތަޢިލީމީ އެކި ރޮނގު ރޮނގުން މަތީ ވަނަ ޙާޞިލްކޮށްފައިވާ ފަރާތްތަކަށް މި ރަސްމިއްޔާތުގައި ދައުލަތުގެ ޚާއްޞަ އިނާމު އެރުވުމަށް ވަނީ ހަމަޖެހިފައެވެ.