ބޮސްފޮރަސް ސަމިޓްގައި ސަފީރު ޢަބްދުއްރަހީމް ބައިވެރިވެވަޑައިގެންފި

ނޮވެމްބަރު މަހުގެ 7 އިން 8 އަށް އިސްތަންބޫލްގައި ބޭއްވި ބޮސްފޮރަސް ސަމިޓްގައި ތުރުކިޔޭއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު ލެފްޓެނަންޓް ޖެނެރަލް (ރޓ) ޢަބްދުއްރަޙީމް ޢަބްދުއްލަޠީފް ބައިވެރިވެވަޑައިގެންފިއެވެ.

މި ސަމިޓްގެ ޓުއަރިޒަމް ޕެނަލް "ގޭސްޓްރޯނޮމީ އެންޑް ޓޫރިޒަމް" ތީމްގެ ދަށުން "ރީޑިޒައިންޑް އެންޑް ޑައިވަރސިފައިޑް"ގެ ކީނޯޓް ސްޕީކަރެއްގެ ގޮތުން އެމަނިކުފާނު ވަނީ ތަޤްރީރުކުރައްވާފައެވެ.

އެ މަނިކުފާނުގެ ވާހަކަފުޅުގައި، ފަތުރުވެރިކަމުގެ ސިނާއަތުގައި ރާއްޖެ ހޯދަމުން އަންނަ ކާމިޔާބާއި މި ދާއިރާއިން ރާއްޖޭގައި ހުރި އިންވެސްޓްމަންޓް ފުރުޞަތުތަކުގެ މަޢުލޫމާތު ވަނީ ހިއްސާކުރައްވާފައެވެ. އަދި މީގެ އިތުރުން ތުރުކިޔޭއިން މި ދާއިރާގައި ހޯދާފައިވާ ކުރިއެރުން ފާހަގަކުރައްވައި މި ސިނާއަތް ދެމެހެއްޓެނިވި ގޮތެއްގައި ކުރިއެރުވުމަށް އެއްބާރުލުން ދިނުމުގެ މުހިއްމުކަމުގެ މައްޗަށް އަލިއަޅުއްވާލާފައިވެއެވެ.

ބޮސްފޮރަސް ސަމިޓްއަކީ އިންޓަނޭޝަނަލް ކޯޕަރޭޝަން ޕްލެޓްފޯމް އައިސީޕީން އިންތިޒާމްކޮށްގެން ބާއްވާ ސަމިޓެކެވެ. މިސަމިޓްގެ މައިގަނޑު މަޤްސަދަކީ ޒަމާނީ އަދި ސަރަހައްދީ ގޮންޖެހުންތަކާ ކުރިމަތިލުމަށް ލީޑަރުންނާއި ނިންމުންތައް ނިންމާ ފަރާތްތަކާއި ޢިލްމުވެރިން ގުޅުވައިލުމުގެ މަޤްސަދުގައި ބާއްވާ ސަމިޓެކެވެ. މިއީ މިގޮތުން ބޭއްވުނު 15 ވަނަ ސަމިޓެވެ.