ސީޕީއާރު-އޭއީޑީ އަދި ސްޓޭންޑަރޑް ފަސްޓްއެއިޑް ކޯހެއް، "އިމިގްރޭޝަން އެންފޯސްމަންޓް ސްޓަޑީޒް" ކޯހުގެ ދަރިވަރުންނަށް އެމްއެންޑީއެފުން ހިންގައިފި

މޯލްޑިވްސް އިމިގްރޭޝަނުން ހިންގާ "ސަރޓިފިކެޓް 3 އިން އިމިގްރޭޝަން އެންފޯސްމަންޓް ސްޓަޑީޒް" ކޯހުގެ ދަރިވަރުންނަށް ސީޕީއާރު-އޭއީޑީ އަދި ސްޓެންޑަރޑް ފަސްޓްއެއިޑް ކޯހެއް އެމްއެންޑީއެފް މެޑިކަލް ކޯރއިން ހިންގައިފިއެވެ.

އިމިގްރޭޝަންގެ އޮފީސް ހުންނަ ސްޓަރ ކްލައުޑް ބިލްޑިންގައި މި ކޯސް ހިންގާފައި ވަނީ އޮކްޓޫބަރު 30 އިން ފެށިގެން ނޮވެންބަރު މަހުގެ 5 ވަނަ ދުވަހުގެ ނިޔަލަށެވެ. މި ކޯހުގައި އިމިގްރޭޝަން އެންފޯސްމަންޓް ސްޓަޑީޒް ކޯހުގެ ދަރިވަރުންނާއި އަދި އިމިގްރޭޝަން މުވައްޒަފުންނާއެކު 20 ފަރާތެއް ބައިވެރިވެ، ސެޓްފިކެޓް ހާސިލުކޮށްފައިވެއެވެ.

މި ކޯހުގައި ކާޑިއޯވަސްކިއުލަރ ނިޒާމާއި، ނޭވާލާ ނިޒާމުގެ އިތުރުން، ސީޕީއާރު ދޭނެ ގޮތާއި، ހޭނެތިފަައިވާ މީހަކަށް ފަރުވާދޭނެ ގޮތާއި، ޒަޚަމްވެ ލޭއައުން ފަދަ ކަންކަން މެނޭޖްކުރުމާއި، ފިހުމުން ފަރުވާދޭންވީ ގޮތާއި، އެއާ ގުޅުންހުރި ފަސްޓް އެއިޑް މެނޭޖްމަންޓް ފަދަ ބައިތައް ވަނީ ކިޔަވައިދީފައެވެ.

މީގެއިތުރުން، މެޑިކަލް އިމަރޖެންސީތައް ކަމުގައިވާ ހާޓް އެޓޭކާއި، އެސްމައާއި، ސްޓްރޯކްގެ އިތުރުން، ކެޝުއަލްޓީ ކެރީސްއާއި، ހީޓް ސްޓްރޯކާއި، ހީޓް އެގްޒޯސްޝަން އަދި ހީޓް ކްރޭމްޕްސްގެ ބައިތައް ވެސް ވަނީ މި ކޯހުގައި ކިޔަވައިދީފައެވެ.

މި ކޯހުގައި ކިޔަވައިދިނީ އެމްއެންޑީއެފް މެޑިކަލް ކޯރގެ ޑޮކްޓަރުންނާއި މެޑިކުންނެވެ.