ޕެޓް ކެއަރ ފެސިލިޓީ "އޮޅުހިޔާ" ހުޅުވައިފި

މާލޭ ސަރަޙައްދުގެ މަގުތަކުގައި ވީއްލިގެން އުޅޭ ބުޅަލުގެ އާބާދި އިތުރުވުމުގެ މައްސަލައަށް ދާއިމީ ޙައްލެއް ހޯދުމަށް ސަރުކާރުން ޤާއިމުކުރި ޕެޓް ކެއަރ ފެސިލިޓީ "އޮޅުހިޔާ" މިހާރު ވަނީ ރަސްމީކޮށް ހުޅުވައިފައެވެ. ނޮވެމްބަރު 2 ވަނަ ދުވަހު ހުޅުމާލޭ ދެވަނަ ފިޔަވަހީގައި ޤާއިމުކުރި މި ފެސިލިޓީ ހުޅުއްވައިދެއްވީ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.

މި ފެސިލިޓީ ޤާއިމުކުރުމުގެ މައިގަނޑު މަޤުޞަދަކީ މާލޭ ސަރަޙައްދުގެ މަގުތަކުގައި ވީއްލިގެން އުޅޭ ބުޅަލުގެ އާބާދީ ކޮންޓްރޯލުކުރުމާއި، އެސޮރުމެންގެ ރައްކާތެރިކަމާއި ދުޅަހެޔޮކަން ކަށަވަރުކުރުމާއި، އެސޮރުމެންގެ ޒަރީޢާއިން ފެތުރިދާނެ ބަލިތަކުގެ ހިރާސް ކުޑަކުރުމެވެ.

ޕެޓްކެއަރ ފެސިލިޓީ ޤާއިމުކުރުމަށް ހުޅުމާލޭ ފޭސް 2 އިން މިނިސްޓްރީއަށް ކަނޑައެޅި 20,451 އަކަފޫޓުގެ ބިމުގެ ތެރެއިން 5000 އަކަ ފޫޓުގެ ބިމެއް ވަނީ ޕެޓްކެއަރ ފެސިލިޓީގެ ފުރަތަމަ ފިޔަވަހި ޤާއިމުކުރުމަށްޓަކައި މިނިސްޓްރީއާއި މާލޭ ސިޓީ ކައުންސިލާއި ދެމެދު ސޮއިކޮށްފައިވާ އެމް.އޯ.ޔޫ އެއްގެ ދަށުން މާލޭ ސިޓީ ކައުންސިލާ ޙަވާލުކޮށްފައެވެ. މީގެ އިތުރުން އިތުރު 6000 އަކަ ފޫޓްގެ ބިމެއްގައި ވަނީ ޕާކް ސްޓައިލްގެ 3 ކޮށި އަޅައިފައެވެ. މިއީ ސަރުކާރުގެ 14 ހަފުތާގެ ވަޢުދުތަކުގެ ތެރޭގައި ހިމެނޭ މުހިންމު މަޝްރޫޢެކެވެ.

ފުރަތަމަ ފިޔަވަހީގެ ދަށުން ޤާއިމުކޮށްފައިވަނީ ވެޓެރިނަރީ ކްލިނިކުގެ ޢިމާރާތާއި، ބުޅާތައް ބައިތިއްބާ ކޮށިތަކެވެ. ވެޓެރިނަރީ ކްލިނިކުގެ ޢިމާރާތުގައި އިސްތިޤުބާލު ކޮޓަރިއާއި، ކަރަންޓީން އޭރިއާ، ކޮންސަލްޓޭޝަން ރޫމް، ސްޓޯރޭޖް ރޫމް، މެޑިސިން ސްޓޮކް ރޫމް، ސާޖަރީ ރޫމް، ޓްރީޓްމަންޓް ރޫމް، 2 ފާޚާނާ އަދި ލޯންޑްރީ ރޫމް ހިމެނެއެވެ. އަދި ފަރުވާދިނުމަށްފަހު ބައިތިއްބާ ކޮށިތަކާއި، ދާއިމީކޮށް ބައިތިއްބާ ޕާކް ސްޓައިލްގެ 3 ކޮށި ހިމެނެއެވެ. އަދި ފުރަތަމަ ފިޔަވަހީގެ ދަށުން ޤާއިމުކުރި ޕެޓް ކެއަރ ފެސިލީޓީން ޚިދުމަތްދިނުމަށް ހުޅުވައިލާނެ ތާރީޚެއް މާލޭ ސިޓީ ކައުންސިލުން އިޢުލާންކުރާނެއެވެ. ޕެޓް ކެއަރ ފެސިލިޓީގެ ޚިދުމަތް ދޭންފެށުމަށްފަހު މިނިސްޓްރީން އަދާކުރާނީ ތަން ރެގިއުލޭޓުކުރުމާއި، މޮނިޓަރކުރުމުގެ ޒިއްމާއެވެ.

ދެވަނަ ފިޔަވަހީގެ ދަށުން ޤާއިމުކުރެވޭނީ ހުރިހާވައްތަރެއްގެ ޖަނަވާރަކަށް ފަރުވާދޭ ޒަމާނީ އެނިމަލް ކެއަރ ފެސިލިޓީއެކެވެ. މި ފެސިލިޓީއާއެކު ރާއްޖޭގައި އެނިމަލް ކެއަރގެ ހަރުދަނާ ޤަވާއިދުތަކާއި އުޞޫލުތަކެއް އެކަށައެޅިގެންދާނެއެވެ.