ރާއްޖެ-ތުރުކީއާ ދެމެދު މިނިވަން ވިޔަފާރީގެ އެއްބަސްވުމެއް ގާއިމުކޮށްފި

ދިވެހި ރާއްޖެއާ ތުރުކީއާއި ދެމެދު އިގްތިޞާދީ އަދި ވިޔަފާރީގެ ގުޅުން އިތުރު ކުރުމަށް އިގްތިޞާދީ ވަޒީރު ސައީދު މިއަދު އިސްތަންބޫލްގައި ތުރުކީ-މޯލްޑިވްސް ޕްރިފަރެންޝަލް ޓްރޭޑް އެގްރީމަންޓް (ޕީޓީއޭ) ގައި ސޮއިކުރައްވައިފިއެވެ. މި އެއްބަސްވުމަކީ 2023 ވަނަ އަހަރުގެ ނޮވެމްބަރު މަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތުރުކީއަށް ކުރެއްވި ރަސްމީ ދަތުރުފުގައި އެމަނިކުފާނުގެ އިރުޝާދާއެކު ފެއްޓެވި މަސައްކަތްޕުޅެކެވެ. މި އެއްބަސްވުމުގެ މަޤްޞަދަކީ އިޤްތިޞާދީ ގުޅުން ބަދަހިކޮށް، ދެޤައުމުގެ އެކްސްޕޯޓަރުންނަށް މާކެޓް އެކްސެސް ފުޅާކުރުމާއި، ޚާއްޞަކޮށް ރާއްޖޭގެގެ އެކްސްޕޯޓަރުންނަށް ޓެރިފް ކުޑަކޮށް ރާއްޖޭގެ މުދަލަށް ކޮމްޕެރެޓިވްއަގެއް ގައި ވާދަކުރުމުގެ ފުރުޞަތު ހޯދުމެވެ.

މި އެއްބަސްވުމުގެ ދަށުން ރާއްޖެއިން އެކްސްޕޯޓްކުރާ މުދަލުން 100 އަށް ވުރެ ގިނަ ތަކެތީގެ ޓެރިފް ބޮޑުތަނުން ކުޑަކުރެވޭނެ ކަމަށާއި އޭގެ ތެރޭގައި 85 މިލިއަނަށް ވުރެ ގިނަ އާބާދީއެއް އޮންނަ ތުރުކީގެ ބާޒާރަށް ވަންނަ ބައެއް މަހާއި މަހުގެ އުފެއްދުންތަކުން ޓެރިފް ޒީރޯ ކުރެވިގެންދާނެއެވެ. މީގެ ސަބަބުން ވިޔަފާރީގެ ފުރުޞަތުތައް އިތުރުވެ، ރާއްޖޭގެ އިޤްތިޞާދަށް ކުރިއެރުން ލިބި، ވަޒީފާތައް އުފެދި، ދިވެހި ވިޔަފާރިތަކަށް ކުރިއެރުން ލިބިގެންދާނެއެވެ. މި ފިޔަވަޅަކީ ރާއްޖޭގެ އިގްތިޞާދު ކުރިއެރުވުމަށް ސަރުކާރުން ކުރަމުންދާ މަސައްކަތުގެ ތެރެއިން އެޅިގެންދިޔަ މުހިންމު ފިޔަވަޅެކެވެ.