ތުރުކީވިލާތުގެ ޖުމްހޫރީ ދުވަހުގެ މުނާސަބަތުގައި ބޭއްވި ޙަފްލާގައި ސަފީރު ޢަބްދުއްރަހީމް ބައިވެރިވެވަޑައިގެންފި

ތުރުކީވިލާތުގެ 101 ވަނަ ޖުމްހޫރީ ދުވަހުގެ މުނާސަބަތުގައި ތުރުކިޔޭގެ ސަރުކާރުން ބޭއްވެވި ޚާއްޞަ ރަސްމިއްޔާތުގައި ތުރުކިޔޭއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު ލެފްޓެނަންޓް ޖެނެރަލް (ރޓ) ޢަބްދުއްރަޙީމް ޢަބްދުއްލަޠީފް ބައިވެރިވެވަޑައިގެންފިއެވެ.

މި ރަސްމިއްޔާތުގައި ތުރުކީވިލާތުގެ ރައީސް ރަޖަބް ޠައްޔިބު އުރްދުޣާން އާ ސަފީރު ބައްދަލުކުރައްވައި ދިވެހިރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ފަރާތްޕުޅުންނާއި ދިވެހި ސަރުކާރާ ދިވެހި ރައްޔިތުންގެ ނަމުގައި ދުވަހުގެ ތަޙުނިޔާ އަރިސްކުރެއްވިއެވެ.

ތުރުކީވިލާތުގެ ރައީސްގެ ރަސްމީގެކޮޅުގައި ބޭއްވުނު މިރަސްމިއްޔާތުގައި އެ ޤައުމުގެ ސަރުކާރުގެ އިސް އޮފިޝަލުންނާއި ބޭރު ޤައުމުތަކުން ތުރުކީޔޭއަށް ކަނޑައަޅުއްވާފައި ތިއްބަވާ ސަފީރުން ބައިވެރިވެވަޑައިގެންނެވިއެވެ.