ހދ. ވައިކަރަދޫގެ ފެނާއި ނަރުދަމާ މަޝްރޫޢު: ފެނުގެ ޚިދުމަތް ފެށި، ނަރުދަމާ ނިޒާމުގެ މަސައްކަތް ކުރިއަށް
ހދ. ވައިކަރަދޫ ފެނާއި ނަރުދަމާ މަޝްރޫޢުގެ މަސައްކަތް ހަލުވި ދުވެލީގައި ކުރިއަށްދާކަމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއިން ހާމަކޮށްފިއެވެ. މިނިސްޓްރީގެ ފަރާތުން އެކްސްގައި ހިއްސާ ކުރެއްވި ޓްވީޓެއްގައި މިމަޝްރޫޢު ތެރޭގައި ހިމެނޭ ފެނުގެ ނިޒާމުގެ ޢަމަލީ މަސައްކަތް ފުރިހަމައަށް ނިމިފައިވާކަން ވަނީ ފާހަގަކުރައްވާފައެވެ. އަދި ރަށު ރައްޔިތުންނަށް ފެނުގެ ޚިދުމަތް ޓްރައަލް އޮޕަރޭޝަނެއްގެ ދަށުން ދޭން ފަށާފައިވާކަން މިނިސްޓްރީން ވަނީ ހިއްސާކުރައްވާފައެވެ. މީގެ އިތުރުން ރަށުގައި ޤާއިމުކުރެވޭ ނަރުދަމާ ނިޒާމުގެ މަސައްކަތް ވެސް ދަނީ ކުރިއަށެވެ. އެގޮތުން މިހާރު ކުރިއަށްދަނީ ސުވަރޭޖް އައުޓްފޯލް އެޅުމުގެ މަސައްކަތެވެ. މި މަސައްކަތް ނިމުމާއެކު، ނަރުދަމާ ނިޒާމުގެ ޚިދުމަތްވެސް ޓްރައަލް އޮޕަރޭޝަންގެ ދަށުން ފޯރުކޮށްދޭން ފެށޭވަރު ވާނެކަމަށް މިނިސްޓްރީއިން ފާހަގަކުރައްވައެވެ. މި މަޝްރޫޢުގެ ސަބަބުން ވައިކަރަދޫގެ ރައްޔިތުންގެ ދިރިއުޅުމުގެ ފެންވަރު މަތިވެ، ދެމެހެއްޓެނިވި ތަރައްޤީއަށް މަގުފަހިވެގެންދާނެކަމަށް ބެލެވެއެވެ.