ކީރިތި ޤުރުއާނަކީ، ހުރިހައި ގޮތަކުން ބެލިއަސް އެންމެ ބޮޑު، ކާމިޔާބީއެއް ލިބޭނެ އެންމެ ވަރުގަދަ ހަތިޔާރު: ވަޒީރު އާދަމް ޝަރީފު ޢުމަރު

ކީރިތި ޤުރުއާނަކީ ހުރިހައި ގޮތަކުން ބެލިއަސް، އެންމެ ބޮޑު ކާމިޔާބީއެއް ލިބޭނެ އެންމެ ވަރުގަދަ ހަތިޔާރު ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ހއ. އަތޮޅު ކައުންސިލުން ބޭއްވި ތިލައުތުރު ރަންތާޖު ޤުރުއާން މުބާރާތް ނިންމުމަށް މިއަދު ހެނދުނު ހއ. އުތީމުގައި ހުންނަ ބޮޑުތަކުރުފާނުގެ ހަނދާނީ މަރުކަޒުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

ތިލައުތުރު ރަންތާޖު ޤުރުއާން މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ، ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ދުނިޔޭގެ ތާރީޚުގައި ހިނގާފައިވާ މުހިންމު ހާދިސާއެއްގެ ތެރޭން ކީރިތި ޤުރުއާނުގެ މުހިންމު ކަމާ، ކީރިތި ޤުރުއާނުގެ މާތް ކަމުގެ މައްޗަށް ބައްލަވައިލެއްވިއެވެ. އެ ގޮތުން އެ މަނިކުފާނު ވިދާޅުވީ މީލާދީން 1250ގެ ތެރޭގައި ފަރަންސޭސިވިލާތުން މިޞްރު ހިފުމަށް ޓަކައި ކުރި މަސައްކަތް ނާކާމިޔާބުކޮށްލި ކަމަށެވެ. އަދި ސަލާމަތާ ރައްކާތެރިކަމަށް ޓަކައި، މިސުރުން އެޅުއްވި ހަރުދަނާ ފިޔަވަޅުތަކެއް ނަތީޖާއެއްގެ ގޮތުން ފަރަންސޭސި ރަސްގެފާނު އަދި އިސް ކޮމާންޑަރ ލުއިސް (9) ހައްޔަރުކުރެއްވި ކަމަށް އެ މަނިކުފާނު ވިދާޅުވިއެވެ.

"މީގެ 770 އަހަރު ކުރިން ހިނގާ ދިޔަ މި ހާދިސާއިން، ފަރަންސޭސި ރަސްގެފާނު ލުއިސް (9) ސަލާމަތްވެ އެތައް ދުވަހެއް މިސްރުގައި އޭނާ ހޭދަކުރުމަށް ފަހު، އެނބުރި ފަރަންސޭސި ވިލާތަށް ގޮސް، ފަރަންސޭސީންނާ ބައްދަލުކޮށްފަ ރަސްގެފާނު ވިދާޅުވީ، މުސްލިމުން ބަލިކުރަން ބޭނުންވާ ކަމަށް ވާނަމަ، ކުރަން އޮތް ކަމަކީ މުސްލިމުން އެ ގެންގުޅޭ ފޮތާ އެމީހުން ދުރުކުރުމުގެ މަސައްކަތޭ" ވަޒީރު އާދަމް ޝަރީފު ވިދާޅުވިއެވެ.

މި މޭރުމުން އެ މަނިކުފާނު މިއަދު އުތީމުގައި ދެއްކެވި ވާހަކަފުޅުގައި މި ހާދިސާއާ މެދު ފުންކޮށް ވިސްނާ ފިކުރުކުކުރުމަށް އިލްތިމާސްކުރެއްވިއެވެ.

"ފަރަންސޭސިވިލާތުން އެ މީހުން ކުރަމުން ދިޔަ ހަނގުރާމައެއްގެ ތެރޭން ބަލިވެގެން ދިޔަ ވަގުތު، ފަރަންސޭސީންގެ އެންމެ އިސް މީހަކަށް ހުންނެވި ކޮމާންޑަރަށް، ރަސްގެފާނަށް ފެނިގެން ދިޔަ މަންޒަރަކީ މުސްލިމުންނަށް އެންމެ ބޮޑު ކާމިޔާބެއް، މުސްލިމުންނަށް އޮތް އެންމެ ބޮޑު ކުރިއެރުމެއް، މުސްލިމުންނަށް ހަނގުރާމަތަކުގައި ވެސް އެހެން ބަޔަކަށް ބަލިނުކުރެވޭވަރުގެ ބާރެއް ލިބިގެން އެ ދަނީ ކީރިތި ޤުރުއާން މުސްލިމުންގެ އަތްމަތީގަ، މުސްލިމުންގެ ހިތުގެ ތެރޭގަ، މުސްލިމުންނާ އެންމެ ގާތް އެއްޗަކީ ކީރިތި ޤުރުއާން ކަމުގައި ވީމަ" ވަޒީރު އާދަމް ޝަރީފު ވިދާޅުވިއެވެ.

މި ޖަލްސާގައި އެ މަނިކުފާނު ދެއްކެވި ވާހަކަފުޅުގައި މިހާ ބަރަކާތްތެރި އަދި މުޤައްދަސް މަސައްކަތެއް، ވަރަށް އޮގަނައިޒުކޮށް، އެހައިމެ ފުރިހަމައަށް ކުރައްވާފައި ވާތީ، މުބާރާތުގެ އިންތިޒާމުތައް ކުރައްވާ ބެލެހެއްޓެވި އުތީމު ކައުންސިލުގެ ރައީސަށާއި، އެ ކައުންސިލުގެ މެންބަރުންނަށް ޚާއްޞަކޮށް ހއ. އަތޮޅު ކައުންސިލުގެ ރައީސަށާއި، އަތޮޅު ކައުންސިލުގެ މެންބަރުންނަށް ޝުކުރު އަދާކުރެއްވިއެވެ. އަދި ވަޒީރު އަދާކުރެއްވި މި ޝުކުރުގައި މުބާރާތުގެ ތަފާތު ވަނަތައް ހޯދި ދަރިވަރުންނާއި، ރަށްތައް ޝާމިލްކުރެއްވިއެވެ.

ތިލައުތުރު ރަންތާޖު ޤުރުއާން މުބާރާތް - 2024ގެ ފަޚުރުވެރި 1 ވަނަ ޙާޞިލްކުރީ ދިއްދޫއެވެ. 2 ވަނަ ހޯދީ އިހަވަންދޫއެވެ. އަދި 3 ވަނަ ހޯދީ ހޯރަފުއްޓެވެ. މިއީ ދިއްދޫއިން މި މުބާރާތް މެދުނުކެނޑި ކާމިޔާބުކުރި 3 ވަނަ ފަހަރެވެ.