ބަހުގެ ދަރަޖަތަކަށް ބޮޑެތި ގޮންޖެހުންތަކެއް ކުރިމަތިވީ ރާއްޖެއަށް ޑިމޮކްރަސީ ތަޢާރަފުކުރުމަށް ކުރެވުނު މަސައްކަތުގެ ތެރޭން:ވަޒީރު އާދަމް ޝަރީފު
ބަހުގެ ދަރަޖަތަކަށް ބޮޑެތި ގޮންޖެހުންތަކެއް ކުރިމަތިވީ ރާއްޖެއަށް ޑިމޮކްރަސީ ތަޢާރަފުކުރުމަށް ކުރެވުނު މަސައްކަތުގެ ތެރޭން ކަމަށް ސިތީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅރވެއްޖެއެވެ. އެ މަނިކުފާނު މިހެން ވިދާޅުވީ ށ. އަތޮޅުގެ ސުކޫލުތަކަށް ހުޅުވައިލައިގެން ށ. އަތޮޅު ކައުންސިލުން ބޭއްވި ފުރަތަމަ ވާހަކަދެއްކުމުގެ މުބާރާތް ނިންމުމަށް ރޭ ކަނޑިތީމުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
މި މޭރުމުން އެ މަނިކުފާނު ރޭ ކަނޑިތީމުގައި ދެއްކެވި ވާހަކަފުޅުގައި ބަހުގެ ދަރަޖަތައް އޮޅުވައިލައިގެން ވާހަކަދެއްކުމަކީ ބަހުގެ ގޮތުން ބަލައި އިރު ޤައުމީ ބޮޑު މައްސަލައެއް ކަމަށް އެ މަނިކުފާނު ވިދާޅުވިއެވެ. އެ މަނިކުފާނު އިތުރަށް ވިދާޅުވީ މި ކަން ރަނގަޅުކުރުމުގެ، ރަނގަޅު ބިންގަލެއް އެޅޭނީ ސުކޫލު މަރުޙަލާގައި ކަމަށެވެ. އަދި މިއަދު ރަނގަޅަށް، ބަހުގެ ދަރަޖަތައް ފަރިތަކޮށްގެން ވާހަކަދައްކަން ދަރިވަރުން ދަސްކޮށްފި ނަމަ، މާދަމާ ޤައުމުގެ ބޮޑެތި މަޤާމުތަކާ، ވަޒީފާތަކާ، މިއަދުގެ ކިޔަވާކުދިން ޙަވާލުވާ އިރު، އަޑުއަހަން ތިބޭ މީހުންނަށް ބަހުގެ ދަރަޖަތައް އެނގިގެން ކުރިއަށްދާތަން ވަރަށް ފަސޭހައިން ފެންނާނެ ކަމަށް އެ މަނިކުފާނު ވިދާޅުވިއެވެ.
ށ. އަތޮޅުގެ ސުކޫލުތަކަށް ހުޅުވައިލައިގެން ބޭއްވި ވާހަކަދެއްކުމުގެ މުބާރާތް ނިންމުމުގެ ރަސްމިއްޔާތު ޝަރަފުވެރިކުރައްވާ ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި، ބަހުގެ ދަރަޖަތަކީ މުހިންމު ނޫން ބައެއް ކަމަށް އަޑުތައް ފަތުރާ، އެ ސިޔާސަތު ފަތުރާ ހިންގުމަކީ، ދަރަޖަތަކަށް ނުހަނު ބޮޑު ހީނަރު ކަމެއް ލިބުނު ކަމެއް ކަމަށް ވިދާޅުވިއެވެ. އެ މަނިކުފާނު އިތުރަށް ވިދަޅުވީ ބަހުގެ ދަރަޖައަކީ ބޭނުން ނެތް އެއްޗެއް ކަމަށް އޭރު ވެސް، އަދި މިހާރު ވަކާލާތުކުރާ ބަޔަކު މި ރާއްޖޭގައި ތިބުމަކީ، ބަހުގެ ދަރަޖަތައް އޮޅި މި ޙާލަތަށް ދިޔުމަށް ކުރިމަތިވި ގޮންޖެހުމެއް ކަމަށް ވިދާޅުވިއެވެ.
މި މޭރުމުން އެ މަނިކުފާނު ދެއްކެވި ވާހަކަފުޅުގައި، އެ މަނިކުފާނު ކަންބޮޑުވަނީ ބަހުގެ ދަރަޖަތައް ދޫކޮށްލައިފި ނަމަ ބަހުގެ މުއްސަނދިކަން ގެއްލި ބަސް ހީނަރުވެގެންދާނެތީ ކަމަށް ވިދާޅުވިއެވެ. އަދި ބަހުގެ ދަރަޖަތައް މުހިންމު ވަނީ ބަޔަކަށް ހަމައެކަނި މަތިވެރި މަޤާމެއްދޭން އެކަންޏެއް ނޫން ކަމަށް ވިދާޅުވެ، އެ މަނިކުފާނު ވިދާޅުވީ އެ މީހަކު ދައްކާ ވާހަކައެއް، އެ ދައްކާ މީހަކާ، އެ ނިސްބަތްވާ މީހަކަށް ބަހުގެ ދަރަޖަތައް ނުހިފައްޓައިފި ނަމަ ފަހުމުކުރުމުގައި ވެސް އޮޅުންތަކެއް އަރާނެ ކަމަށެވެ.
ރޭ ކަނޑިތީމުގައި ބޭއްވި މި ރަސްމިއްޔާތުގައި ށ. އަތޮޅު ކައުންސިލުގެ ރައީސާއި، އެ ކައުންސިލުގެ މެންބަރުންނާއި، ކަނޑިތީމު ކައުންސިލުގެ މެންބަރުންގެ އިތުރުން ށ. އަތޮޅު ސުކޫލުތަކުގެ ވެރިންނާއި، މުދައްރިސުންނާއި، ގިނަ ޢަދަދެއްގެ ދަރިވަރުން ބައިވެރިއެވެ.