ރައީސުލްޖުމްހޫރިއްޔާގެ ސިޔާސަތުތަކާ، ކައުންސިލުތަކުން ކުރެވޭ މަސައްކަތްތައް އެއް ގޮތްވުމަކީ އަޅުގަނޑުމެން ވަރަށް ބޮޑަށް އުފާކުރަންޖެހޭ ކަމެއް: ވަޒީރު އާދަމް ޝަރީފު

ރައީސުލްޖުމްހޫރިއްޔާގެ ސިޔާސަތުތަކާ ކައުންސިލުތަކުން ކުރެވޭ މަސައްކަތްތައް އެއް ގޮތްވުމަކީ އަޅުގަނޑުމެން ވަރަށް ބޮޑަށް އުފާކުރަންޖެހޭ ކަމެއް ކަމަށް ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ށ. އަތޮޅުގެ ސުކޫލުތަކަށް ހުޅުވައިލައިގެން ށ. އަތޮޅު ކައުންސިލުން ބޭއްވި ފުރަތަމަ ވާހަކަދެއްކުމުގެ މުބާރާތް ނިންމުމަށް ރޭ ކަނޑިތީމުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

"ރައީސުލްޖުމްހޫރިއްޔާގެ ސިޔާސަތުތަކާ ކައުންސިލުތަކުން ކުރެވޭ މަސައްކަތްތައް އެއް ގޮތްވުމަކީ އަޅުގަނޑުމެން ވަރަށް ބޮޑަށް އުފާކުރަންޖެހޭ ކަމެއް، އަދި ރައީސުލްޖުމްހޫރިއްޔާގެ ސިޔާސަތުތަކާ އެއް ގޮތްވެ، ސިޔާސަތުތައް ފަހިވާ ގޮތަށް ކައުންސިލުތަކުން މި ކުރެވޭ މަސައްކަތްތަކަށް އަޅުގަނޑުމެން ވަރަށް ބޮޑަށް މަރުޙަބާކިޔަން. އަދި ކައުންސިލުތަކުން މި ކުރާ މަސައްކަތްތައް ވަރަށް ބޮޑަށް ބަލައިގަންނަން" ވަޒީރު އާދަމް ޝަރީފު ވިދާޅުވިއެވެ.

މި ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ދިވެހިބަހަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމަށް ވިދާޅުވިއެވެ. ސަބަބެއް ކަމަށް އެ މަނިކުފާނު ވިދާޅުވީ ރާއްޖޭގެ ތާރީޚުގައި ފުރަތަމަ ފަހަރަށް ވުޒާރާތަކުގެ އިނގިރޭސި ނަމާއެކީގައި، ކިޔާނެ ދިވެހި ނަމެއް އާންމުކުރެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް ވާތީ ކަމަށް ވިދާޅުވިއެވެ. އަދި ދިވެހިބަސް ދިރުވާ އާލާކުރުމަށް އެ މަނިކުފާނު ދެއްވާ އިސްކަމާ އަހަމިއްޔަތު މި ކަމުން އަންގައިދޭ ކަމަށް ވަޒީރު ވިދާޅުވިއެވެ.

ށ. އަތޮޅުގެ ސުކޫލުތަކަށް ބޭއްވި ވާހަކަދެއްކުމުގެ މުބާރާތް ނިންމުމަށް ކަނޑިތީމުގައި ބޭއްވި، މި ރަސްމިއްޔާތު ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ދިވެހިބަހުގެ މުއްސަނދިކަމަށް ވެސް ބައްލަވައި ލައްވާފައި ވެއެވެ.

"ރުކުގައި އަޅައި މޭވާގެ ޢުމުރުފުރާތަކަށް ތަފާތު ނަން ދިވެހިބަހުން ކިޔައިފައިވުމަކީ ދިވެހިބަހުގެ މުއްސަނދިކަން ހާމަކޮށްދޭ ކަމެއް. އަދި ދިވެހިބަސް ފިޔަވާ ރުކުގައި އަޅައި މޭވާއަށް މިހާ ފުރިހަމައަށް ދުނިޔޭގެ އެހެން ބަހަކުން ނަންތައް ކިޔައިފައި ނެތުމަކީ ދިވެހިބަހުގެ މުއްސަނދިކަމާ ދިވެހިބަހުގެ ބާރު އިތުރަށް ހާމަކޮށްދޭ ކަމެއް." ވަޒީރު ވިދާޅުވިއެވެ.

އެ މަނިކުފާނުގެ ވާހަކަފުޅުގައި ދިވެހި ޤައުމިއްޔަތުގެ އެންމެ މަތިވެރި އެއް ބަހާއަކީ ދިވެހިބަސް ކަމަށް ވިދާޅުވިއެވެ. އަދި ޤައުމިއްޔަތެއް އެންމެ ފުރިހަމަ ގޮތުގައި ކުރިއަށް ގެންދެވޭނީ، ދިވެހިބަހަށް އަހުލުވެރިވެ، ފަރިތަވެ، ދިވެހިބަހުގެ ބޭނުން ހިފައިގެން، އަޅުގަނޑުމެންގެ މަސައްކަތްތަކައިގެން ކުރިއަށް ދެވޭނެ ބަޔަކު ތިބެގެން ކަމަށް ވެސް ވިދާޅުވިއެވެ.

ށ. އަތޮޅުގެ ސުކޫލުތަކަށް ހުޅުވައިލައިގެން ބޭއްވި ވާހަކަދެއްކުމުގެ މުބާރާތުގެ ބައިވެރިންނާ މުޚާޠަބުކުރައްވާ ވަޒީރު ދެއްކެވި ވާހަކަފުޅުގައި، ދިވެހިބަސް ކުރިއަރުވާ ދިބެހިބަސް ކުރިއަށް ގެންދިޔުމަށް ބޭއްވުނު މި މުބާރާތަށް، ދަރިވަރުން ތައްޔާރުކޮށްދެއްވުމަށް މުދައްރިސުން ކޮށްދެއްވައިފައިވާ މަސައްކަތުގެ ފެންވަރު ވަރަށް ރަނގަޅަށް ދަރިވަރުންގެ ވާހަކަތަކުން އެނގި ހާމަވެގެން ދިޔަ ކަމަށް ވިދާޅުވިއެވެ. އަދި އެ ދަރިވަރުންގެ ވާހަކަތަކުން، އެ ދަރިވަރުންގެ އަމިއްލަ ނަފުސަށް އޮންނަންޖެހޭ އިތުބާރާ ޔަޤީންކަން އޮވެގެން ވާހަކަދެއްކި ކަން ފާހަގަކުރެވުނު ކަމަށް ވެސް ވިދާޅުވިއެވެ. އަދިހަމައެހެންމެ އެ ދަރިވަރުން ވާހަކަދައްކާފައި ވަނީ އެ ދެއްކި ވާހަކަ އެހެން މީހުންނަށް ވެސް ޔަޤީންކަމާ، އިތުބާރު އޮންނަ ވަރަށް، ބަހުގެ ހަމަތަކާ، ބަސް ބޭނުންކުރަންވީ ވަގުތާ، ދަނޑިވަޅާ، ވަރަށް ރަނގަޅަށް ބަލައިގެން ވާހަކަދެއްކި ކަން ފާހަގަކުރެވުނު ކަމަށް އެ މަނިކުފާނުވިދާޅުވިއެވެ.

ރޭ ކަނޑިތީމުގައި ބޭއްވި މި ރަސްމިއްޔާތުގައި ށ. އަތޮޅު ކައުންސިލުގެ ރައީސާއި، އެ ކައުންސިލުގެ މެންބަރުންނާއި، ކަނޑިތީމު ކައުންސިލުގެ މެންބަރުންގެ އިތުރުން ށ. އަތޮޅު ސުކޫލުތަކުގެ ވެރިންނާއި، މުދައްރިސުންނާއި، ގިނަ ޢަދަދެއްގެ ދަރިވަރުން ބައިވެރިއެވެ.