ދިވެހީންގެ އެފެއްދުންތެރިކަމުގެ މައުރަޒާ ގުޅޭގޮތުން މަޢުލޫމާތު ދިނުމުގެ ބައްދަލުވުމެއް ބާއްވައިފި

އިޤްތިޞާދީ ތަރައްގީއާއި ވިޔަފާރިއާ ބެހޭ ވުޒާރާއާއި ބިޒްނަސް ސެންޓަރ ކޯޕަރޭޝަން އާއި ގުޅިގެން އިންތިޒާމުކޮށްގެން އަންނަ އަހަރުގެ މެއިމަހުގެ 23 އިން 31 އަށް ހުޅުމާލޭގައި ބޭއްވުމަށް ހަމަޖެހިފައިވާ "ދިވެހީންގެ އުފެއްދުންތެރިކަމުގެ މައުރަޒު 2025" (މޯލްޑިވްސް އެކްސްޕޯ 2025) އާ ގުޅޭ ގޮތުން މައުލޫމާތު ދިނުމުގެ ބައްދަލުވުމެއް ބާއްވައިފިއެވެ. މިއީ ދިވެހިރާއްޖޭގެ އެކިކަންކޮޅުތަކުގައި ޤާއިމްކުރެވިފައިވާ 13 ރީޖަނަލް ބިޒްނަސް ސެންޓަރ ގެ އޮފިޝަލުންނަށް މަޢުރަޒާބެހޭ މަޢުލޫމާތު ފޯރުކޮށްދިނުމަށް ބޭއްވުނު ބައްދަލުވުމެކެވެ. 

އޮންލައިންކޮށް ބޭއްވުނު މިމަޢުލޫމާތު ސެޝަނުގައި ބިޒްނަސް ސެންޓަރުގެ މެނޭޖަރުންނާއި އޮފިޝަލުންނަށް ކުރިއަށް އޮތް ދިވެހީންގެ އުފެއްދުންތެރިކަމުގެ މައުރަޒުގައި ވާދަކުރުމުގެ ބައިގައި ބައިވެރިވުމުގައި އަމަލުކުރަންޖެހޭ ކަންކަމުގެ މައްޗަށް މަޢުލޫމާތު ޙިއްޞާ ކުރެވުނެވެ. މީގެ އިތުރުން މަޢުރަޒައި ބައިވެރިވެވޭނެ ދާއިރާތަކާއި، ތަކެތިބައިވެރިކުރެވޭނެ ގިންތިތަކާއި އިންސާފުކުރުމުގައި ބަލާނެ ކަންކަމުގެ މުހިންމު މަޢުލޫމާތުތަކެއް ހިއްސާކުރެވުނެވެ. ބިޒްނަސް ސެންޓަރުގެ އޮފިޝަލުންގެ އައުޓްރީޗް ޕްރޮގްރާމުތަކުގައި ރާއްޖޭގެ އުފެއްދުންތެރިންނަށް މައުރަޒުގައި ވާދަކުރުމަށް ތަކެތިބައިވެރިކުރުމުގެ މަޢުލޫމާތު ފޯރުކޮށްދިނުމަށް ހަމަޖެހިފައިވެއެވެ.  

ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމުގެ މަޤްޞަދުގައި ވިޔަފާރިއާއި އުފެއްދުންތެރިކަމަށް އަމާޒުކޮށް މަޢުރަޒެއް ބޭއްވުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ މިއަހަރުގެ މޭމަހުގެ ތެރޭގައެވެ.