ރުޕޭ ކާޑަކީ ކޮބާ!

ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި)އިން ތަޢާރަފުކޮށްފައިވާ ރުޕޭ އަކީ އިންޑިއާގެ ފުރަތަމަ ގްލޯބަލް ކާޑު ޕޭމަންޓް ނެޓްވޯކެވެ. މިއީ މިހާރު ދުނިޔޭގެ 300 މިލިޔަނަށްވުރެ ގިނަ މީހުން ބޭނުންކުރަމުންދާ ޚިދުމަތެކެވެ. ރުޕޭ ކާޑުގެ ޚިދުމަތް ފޯރުކޮށްދޭ ބޭންކެއް މެދުވެރިކޮށް، އެކާޑު ލިބިފައިވާ ކޮންމެ ބަޔަކަށްވެސް ބޭނުންކުރެވޭނެއެވެ.

ދުނިޔޭގެ 6 ޤައުމެއްގައި މި ކާޑު ބޭނުންކުރެވެއެވެ. އެއީ، ސިންގަޕޫރު، ޔޫއޭއީ، ބޫޓާން، ނޭޕަލް އަދި މޮރިޝަސްގެ އިތުރުން ދިވެހިރާއްޖެއެވެ. ރާއްޖޭގައި ރުޕޭ ކާޑުގެ ޚިދުމަތް ފަށާފައިވަނީ ބޭންކް އޮފް މޯލްޑިވްސް މެދުވެރިކޮށެވެ. އެގޮތުން އެ ބޭންކުގެ އޭޓީއެމް އަދި ޕީއޯއެސް ކާޑު މެޝިންތަކުގައި ރުޕޭ ކާޑު ބޭނުންކުރެވޭނެ އިންތިޒާމް ވަނީ ހަމަޖައްސާފައެވެ. 

ރުޕޭ ކާޑުގެ ޙިދުމަތާއެކު އިންޑިއާއިން ރާއްޖެ އަންނަ ފަރާތްތަކަށް ރާއްޖޭގައި މުދަލާއި ޙިދުމަތުގެ އަގަށް މިކާޑުން ފައިސާ ދެއްކޭނެއެވެ. މީގެ ސަބަބުން އިންޑިއާގެ ފަތުރުވެރިންގެ މާރކެޓް އިތުރުކުރުމުގެ މަގު ފަހިވެގެން ދާނެއެވެ. 

ރާއްޖޭގައި ރުޕޭ ކާޑުގެ ޚިދުމަތް ރަސްމީކޮށް ތަޢާރަފުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން މިމަހުގެ 7 ވަނަ ދުވަހުއެވެ.