ވަޒީރު ސައީދު ބިއޮންޑް އެއަރލައިންސްއަށް އެއް އަހަރު ފުރުން ފާހަގަކުރުމުގެ ރަސްމިއްޔާތުގައި ބައިވެރިވެވަޑައިގެންފި

ޢިޤްތިޞާދާ ތަރައްޤީއާއި ވިޔަފާރިޔާ ބެހޭ ވަޒީރު މުހައްމަދު ސައީދު، ބިއޮންޑް އެއަރލައިންސްއަށް އެއް އަހަރު ފުރުން ފާހަގަކުރުމުގެ ރަސްމިއްޔާތުގައި ބައިވެރިވެވަޑައިގެންފިއެވެ. 

ވެލާނާ އިންޓަރނޭޝަނަލް އެއަރޕޯޓުގައި ބޭއްވުނު މި ރަސްމިއްޔާތުގައި، ވަޒީރު ސައީދު ވިދާޅުވީ މިހާރު ބިއޯންޑް އެއާލައިންގައި 300 އެއްހާ މުވައްޒަފުން ތިބި ކަމަށާއި އޭގެ ތެރެއިން 30 އިންސައްތައަކީ ދިވެހިންނަށްވުމުން އުފާވެ ފަހުރުވެރިވާ ކަމަށެވެ. އަދި ދިވެހިންނަށް އިތުރު ވަޒީފާގެ ފުރުސަތުތައް ދިނުމަށް ވަޒީރު ވަނީ ބިއޯންޑަށް ހިތްވަރުދެއްވާފަ އެވެ. 

ދިވެހިންނަށް ވަޒީފާގެ ފުރުސަތު އިތުރު ކުރުމުން ސަރުކާރުގެ ފަރާތުން އެ އެއާލައިންއަށް ދޭ އެހީތެރިކަންވެސް އިތުރުވުމުގެ ފުރުސަތު ބޮޑުކަމަށް ވަޒީރު  ސައީދު ވިދާޅުވި އެވެ. މީގެ އިތުރުން ބިއޯންޑްގެ މަތިންދާބޯޓުތަކުގައި ދިވެހި ދެތިން ކެއުން ހިމެނުމަށްވެސް ވަޒީރު ސައީދު ވަނީ އެދިލައްވާފަ އެވެ. 

ބިއޯންޑް އެއާލައިންއަކީ ދުނިޔޭގެ ފުރަތަމަ ‘އޯލް ޕްރިމިއަމް’ އެއާލައިން އެވެ. އެ އެއާލައިންގެ ހިދުމަތް ފަށާފައިވަނީ މިދިޔަ އަހަރުގެ އޮކްޓޫބަރު މަހުގެ ތެރޭގަ އެވެ. މިއީ ރާއްޖޭގެ ސިމްޑީ ގްރޫޕާއި ޔޫއޭއީގެ އަރަބެސްކް ގުޅިގެން ހިންގާ އެއާލައިން އެކެވެ. މި އެއާލައިނުން މިހާރުވެސް ދުނިޔޭގެ 6 މަންޒިލަކަށް ދަތުރު ކުރާއިރު މިހާރުވަނީ އެ އެއާލައިންގެ ފްލީޓަށް އިތުރުން މަތިންދާ ބޯޓެއް އިތުރުކޮށްފަ އެވެ.