އިންޑިއާގެ ޔޫޕީއައި ރާއްޖެއަށް ތައާރަފްކުރުން: ޑިޖިޓަލް ޕޭމަންޓްތަކަށް އިތުރު ބޫސްޓެއް

އިޤްތިޞާދީ ވުޒާރާއިން ހުށަހެޅި ކަރުދާހަށް މަޝްވަރާކުރުމަށްފަހު، ރާއްޖޭގެ މާލީ ނިޒާމަށް އިންޑިއާގެ ޔުނިފައިޑް ޕޭމަންޓް އިންޓަފޭސް (ޔޫޕީއައި) ތައާރަފް ކުރަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ނިންމަވާފައެވެ. އިންޑިއާއިން ތަރައްގީކޮށްފައިވާ ފުޅާދާއިރާއެއްގައި ބޭނުން ކުރެވެމުންދާ ކާމިޔާބު ރިއަލް ޓައިމް ޕޭމަންޓް ސިސްޓަމެއް ކަމަށްވާ ޔޫޕީއައި އަކީ ސީމްލޭސް ޑިޖިޓަލް ޓްރާންސެކްޝަންތައް ކުރެވޭ ނިޒާމެކެވެ. މިއީ އިންޑިއާގެ މާލީ ދާއިރާގައި ޢިޤްތިޞާދު ޒަމާނީ ފެންވަރަށް ތަރައްޤީ ކުރުވައިދޭ މުހިންމު ޑްރައިވަރެކެވެ. ޔޫޕީއައި ރާއްޖެއަށް ތައާރަފްވުމުން، ރާއްޖެއަށް ފަސޭހަ އަދި ރައްކާތެރި މާލީ މުޢާމަލާތްތަކުގެ ފައިދާ ލިބިގެންދާނެއެވެ. މި ފިޔަވަޅަކީ ކްރޮސް-ބޯޑަރ ޕޭމެންޓްސް ފަސޭހަކޮށްދީ، ވިޔަފާރިތަކަށާއި ކޮންސިއުމަރުންނަށް ވެސް ވިޔަފާރި މުޢާމަލާތްތަކުގެ ޚަރަދު ކުޑަވާނެ ކަމެކެވެ. އަދި ފަތުރުވެރިންނަށް މާލީ މުއާމަލާތްތައް ފަސޭހަވުމުގެ އިތުރުން ކުދި ވިޔަފާރިތަކަށް މޯބައިލް މެދުވެރިކޮށް މުއާމަލާތްތައް ތައާރަފް ވެގެންދާނެއެވެ. 

ދިވެހި ރާއްޖޭގެ އީ-ކޮމާރސް އަދި ކްރިއޭޓިވް އިކޮނޮމީގެ ދާއިރާ އަށް ހުރި ގޮންޖެހުންތައް ހައްލުކުރުމާއި ވިޔަފާރިތަކަށް ލުއިފަސޭހަ ހޯދައިދިނުމަށްޓަކައި، އިންޑިއާގެ ޔުނިފައިޑް ޕޭމްންޓް އިންޓަފޭސް ތައާރަފްކުރުމަށް ކެބިނެޓުން ވަނީ ނންމަވާފައެވެ. އަދި މިކަމާ ގުޅިގެން އިންޑިއާ އަދި ރާއްޖެއާ ދެމެދު ވަނީ އެމްއޯޔޫއެއްގައި ވެސް ސޮއިކުރެފައެވެ. މި ނިންމުމަކީ ރާއްޖޭގެ ޑިޖިޓަލް ޓްރާންސްފޯމޭޝަނާއި އިގްތިސާދު ތަރައްގީ ކުރުވައި، އިންޑިއާއާއި ރާއްޖެއާ ދެމެދު އޮންނަ ޢިޤްތިޞާދީ ގުޅުން އިތުރަށް ހަރުދަނާކުރުމަށް ސަރުކާރުން އެޅުއްވި މުހިންމު ފިޔަވަޅެކެވެ.