ވަޒީރު ސަޢީދު ވެލާނާ އިންޓަނޭޝަނަލް އެއަރޕޯޓުގެ ކުރީގެ ރަންވޭ އަލުން ތަރައްޤީކުރުމުގެ މަޝްރޫޢު ޝަރަފްވެރިކޮށް ދެއްވައިފި

އިޤްތިޞާދީ ތަރައްޤީއާއި ވިޔަފާރިޔާ ބެހޭ ވަޒީރު މުޙައްމަދު ސަޢީދު ވެލާނާ އިންޓަރނޭޝަނަލް އެއަރޕޯޓްގެ ކުރީގެ ރަންވޭ އަލުން ތަރައްޤީކުރުމުގެ މަޝްރޫޢު ޝަރަފުވެރި މެހުމާނެއްގެ ގޮތުގައި ބައިވެރިވެވަޑައިގެންފިއެވެ. މި ހަފްލާ އިންތިޒާމުކޮށްފައިވަނީ މޯލްޑިވްސް އެއާރޕޯޓް ކޮންޕެނީ ޕްރައިވެޓް ލިމިޓެޑް (އެމްއޭސީއެލް) އިންނެވެ.

މި މަޝްރޫޢަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ފައްޓަވައިދެއްވި، 20 އަހަރު ދުވަހުގެ އެއާޕޯޓު ތަރައްޤީގެ މަޝްރޫޢުގެ ދަށުން ކުރިއަށް ގެންދާ މަސައްކަތެކެވެ. މި މަޝްރޫޢުގެ ދަށުން، ވެލާނާ އިންޓަރނޭޝަނަލް އެއާޕޯޓުގެ ކުރީގެ ރަންވޭ ތަރައްޤީކުރުމުގެ މަސައްކަތް ވަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާ ހަވާލުކޮށްފައެވެ.

މި ޖަލްސާގައި ވާހަކަފުޅުދައްކަވަމުން މި މަޝްރޫޢު ފެށިގެން ކުރިއަށް ދާއިރު ގިންޖެހުންތަކާއި ފާޑުކިއުންތައް ހުންނާނެކަން ފާހަގަކުރައްވާ މަސައްކަތް ފުރިހަމަކުރުމުން އެކަމުގެ ފައިދާ އެންމެންނަށް ކުރާނެކަން ފާހަގަކުރައްވާފައިވެއެވެ. އަދި މީގެކުރިން އެއާޕޯރޓް އައު ރަންވޭ ތަރައްޤީ ކުރިއިރު ދިމާވި ގޮންޖެހުންތަކާއި، ފާޑުކިއުންތަކަށް އަލިއަޅުވާލެއްވިއެވެ. އަދި އެފާޑުކިއުންތަކަށް ބެލުމެއްނެތި މަސައްކަތް ނިންމާލުމުން މިހާރު އެއާޕޯރޓަށް ލިިބިފައިވާ ކުރިއެރުމާއި ފަސޭހަތައް ފާހަގަކުރެއްވިއެވެ.

މި މަސައްކަތުގެ އެއްބަސްވުމުގައި، އެމްއޭސީއެލްގެ ފަރާތުން ސޮއިކުރެއްވީ މެނޭޖިންގް ޑިރެކްޓަރ އިބްރާހިމް ޝަރީފް މުހައްމަދެވެ. އަދި ބީޔޫސީޖީގެ ފަރާތުން ސޮއިކުރެއްވީ އެކުންފުނީގެ ޖެނެރަލް މެނޭޖަރ ލުއޯ ވޭއި އެވެ.

ވެލާނާ އެއާޕޯޓައި ކުރިން ބޭނުންކުރި ރަންވޭ ބޭނުންކުރުން އެއްކޮށް ހުއްޓާލީ 2022 ވަނަ އަހަރު އައު ކޯޑް-އެފް ރަންވޭ ބޭނުން ކުރަން ފެށުމުންނެވެ. މިއާއެކު އެ ރަންވޭ ބޭނުން ކުރަމުންދިޔައީ ޓެކްސީ ވޭއެއްގެ ގޮތުގައެވެ.

މި އެއްބަސްވުމުގެ ޢަމަލީ މަސައްކަތް އަންނަ ނޮވެމްބަރު މަހު ފެށުމަށް ވަނީ ހަމަޖެހިފައެވެ. އަދި މަސައްކަތް ނިންމުމަށް 2 އަހަރާއި ބައިގެ މުއްދަތެއް ވަނީ ކަނޑައަޅާފައެވެ. މަޝްރޫޢު ނިންމުމަށް ހަމަޖެހިފައިވަނީ 2027 ވަނަ އަހަރުއެވެ.