އިޖުތިމާއީ ރައްކާތެރިކަމުގެ ނިޒާމު އޮންނަންޖެހޭނީ އެންމެ ނިކަމެތި ރައްޔިތުން ރައްކާތެރިކޮށްދޭ ގޮތަށް: ވަޒީރު ޑރ. ޙައިދަރު

އިޖުތިމާއީ ރައްކާތެރިކަމުގެ ނިޒާމު ފަރުމާކުރެވިފައި އޮންނަންޖެހޭނީ މުޖުތަމަޢުގެ އެންމެ ނިކަމެތި ރައްޔިތުން ރައްކާތެރިކޮށްދޭ ގޮތަށްކަމަށް ގެދޮރުވެރިކަމާއި ބިމާއި، އުމްރާނީ ތަރައްޤީއާއި ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

ދިވެހިރާއްޖޭގެ ޞިއްޙީ ވެލްފެއަރ ނިޒާމުގެ ކޮރަޕްޝަން ހިރާސްގެ ދިރާސާ އާންމުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން ވަޒީރު ވިދާޅުވީ އިޖުތިމާއީ ރައްކާތެރިކަމުގެ ނިޒާމުގެ ތެރެއިން އަސާސީ ހިޛުމަތްތައް ދޭންޖެހޭނީ ކޮރަޕްޝަނާއި ނާޖާއިޒު ފައިދާ ނުނެގޭނެފަދަ ގޮތަކަކަށްކަމަށެވެ.

ނާޖާއިޒު ފައިދާ ނެގޭ ގޮތަށް އޮވެއްޖެނަމަ، އެ ހިދުމަތްތަކަށް އެންމެ ބޮޑަށް ބޭނުންވާ ފަރާތްތައް އެކަހެރިވުމާއި، އެ ނިޒާމުގެ މައްޗަށް ރައްޔިތުންގެ މެދުގައި އޮންނަ އިތުބާރު ގެއްލި ނިޒާމުގެ ބޭނުންނެތި ދާނެކަމަށް ވަޒީރު ވިދާޅުވިއެވެ.

"ކޮރަޕްޝަން ނައްތާލުމަކީ ހަމައެކަނި އެކުލަވާލާ ސިޔާސަތަކުން ކުރެވޭނެ ކަމެއް ނޫން. އެއީ ކޮންމެ ރައްޔިތެއްގެ ފަރުދީ ޒިންމާއެއް. އަޅުގަނޑުމެން ކޮންމެ މީހެއްގެ ޒިންމާއަކީ ހަމަހަމަ ނިޒާމަކުން އެންމެ ބޭނުންވާ ފަރުދުންނަށް ހިޛުމަތްދެވޭކަން ޔަޤީންކުރުން" ވަޒީރު ވިދާޅުވިއެވެ

މީގެއިތުރުން ވަޒީރު ވިދާޅުވީ އިޖުތިމާއީ ނިޒާމުގެތެރެއިން ކްރަޕްޝަންގެ އަމުލުތައް އެކި ގޮތްގޮތަށް ހިންގައިފައި އެބަހުރިކަމަށެވެ. އެ ކަންކަމުގެ ސަބަބުން ދައުލަތަށް ބޮޑެތި ގެންލުންތަކެއް ލިބި، އާންމު ގިނަ ރައްޔިތުންގެ ފުރާނައަށް ނުރައްކާވާ ހިސާބަށް ވެސް ކަންކަން ގޮސްފައި އެބަހުރިކަމަށެވެ. އެހެންކަމުން ކޮރަޕްޝަނަށް މަގުފަހިވާ ކަންކަމުން މުޅިން އެއްކިބާވެފައި އޮންނަ ނިޒާމަކަށް އިޖުތިމާއީ ރައްކާތެރިކަމުގެ ނިޒާމު ހަދަން ޖެހޭކަމަށް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ އިޖުތިމާއީ ރައްކާތެރިކަމުގެ ނިޒާމު ހަރުދަނާކުރުމަށް އެންމެ ފުރަތަމަ ކުރަންޖެހޭކަމަކީ ދެފުށް ފެންނަ ނިޒާމެއް ގާއިމުކޮށް އެ ނިޒާމު ހިންގާ ފަރާތްތައް ޖަވާބުދާރީކުރެވޭނެ ގޮތް ހަދަން ޖެހޭކަމަށެވެ.

"އިޖުތިމާއީ ރައްކާތެރިކަމުގެ ނިޒާމު ހަރުދަނާކުރުމަށް ގަވައިދުން އޮޑިޓްކޮށް، ފަންޑުން ހަރަދުކުރެވެމުންދާ ގޮތް ހާމަކޮށް، ފަންޑުން ފައިސާ ދޫކުރުމުގެ ޝަރުތުތައް ހަރުދަނާ ކުރަން ޖެހޭ" ވަޒީރު ވިދާޅުވިއެވެ.

މީގެއިތުރުން އެ ނިޒާމު ހަރުދަނާކުރުމަށް ފަންނިޔާތުގެ ބޭނުން އެންމެ އެކަށޭނަ ގޮތުގައި ކުރަން ޖެހޭކަމަށާއި، އެކި ފަރުދުންގެ ފަރާތުން ފަސާދައާއި ނާޖާއިޒު ފައިދާ ނެގުމަށް ހުޅުވިފައިވާ ދޮރުތައް ފަންނިއްޔާތުގެ ޒަރިއްޔާއިން ބަންދުކުރަންޖެހޭކަމަށް ވަޒީރު ވިދާޅުވިއެވެ.

"ފައިސާ ދެއްކުމުގެ ސުމޭކު ނިޒާމުތަކާއި، ބަޔޯމެޓްރިކް އައިޑީއާއި، ބްލޮކްޗެއިންގެ ފަންނިއްޔާތުތަކަކީ ވެސް އިޖުތިމާއީ ރައްކާތެރިކަމުގެ ނިޒާމު ހަރުދަނާކޮށް އެ ނިޒާމުގައި ނަޒާހަތްތެރިކަން އިތުރުކޮށްދޭ ވަސީލަތްތައް" ވަޒީރު ވިދާޅުވިއެވެ.