ސިޔާސަތުތައް ކަނޑައެޅުމުގައި މިންތީގެ ހަމަހަމަކަމަށް އިސްކަން ދިނުން މުހިންމު: ވަޒީރު ޑރ. ޙައިދަރު

ސަރުކާރުގެ ސިޔާސަތުތައް ކަނޑައެޅުމުގައި މިންތީގެ ހަމަހަމަކަމަށް އިސްކަން ދިނުމަކީ މުހިންމުކަމެއްކަމަށް ގެދޮރުވެރިމާއި، ބިމާއި އުމްރާނީ ތަރައްގީއާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

އިއްޔެ މޯލްޑިވްސް ބިއުރޯ އޮފް ސްޓެޓިސްޓިކްސްއާއި އިޖުތިމާޢީ އަދި އާއިލީ ތަރައްގީއާ ބެހޭ ވުޒާރާއިން ބޭއްވި ޖެންޑާ ޑޭޓާ ޔޫސް ރިޕޯޓް ނެރުމުގެ ރަސްމިއްޔާތަށްފަހު މީޑިއާތަކާ ވާހަކަ ދައްކަވަމުން ވަޒީރު ވިދާޅުވީ މިންތީގެ ހަމަހަމަކަމާއެކު ކަންކަން ރާވައި ހިންގުމަށް ސަރުކާރުން އިސްކަންދޭކަމަށެވެ. އެގޮތުން މިންތީގެ ހަމަހަކަމަށް ހޯދޭ އެކި ހޯދުންތަކުގެ މައްޗަށް ސަރުކާރުގެ ސިޔާސަތުތައް އެކުލަވާލުމުގެ ފްރޭމްވޯކެއް ހަދައިގެން އެގޮތަށް ސަރުކާރުގެ މަސައްކަތްތައް ބައްޓަންކުރަން މަސައްކަތް ކުރާކަމަށް ވެސް މިނިސްޓަރ ވިދާޅުވިއެވެ.

ގިނަ ފަހަރު ސިޔާސަތުތައް އެކުލަވާލުމުގައި މިންތީގެ ހަމަހަމަކަން ގެނެވިފައި ނުވި ނަމަވެސް އަންހެނުންނަށް ސަމާލުކަން ދެވިގެން ނެގޭ ތަފާސް ހިސާބުތަކަކީ މި ސަރުކާރުން ސިޔާސަތުތައް އެކުލަވާލުމުގައި އިސްކަމެއް ދޭނެކަމެއްކަމަށް ވަޒީރު ވިދާޅުވިއެވެ.

ވަޒީރުގެ ވާހަކައިގައި ވަނީ ދިރާސާކުރުމާއި ފެކްޓު ހޯދުމުގެ މުހިންމުކަމަށް ވެސް ވަރަށް ބޮޑަށް އަލި އަޅުވާލައިފައެވެ. އެކިކަހަލަ ދިރާސާތައްކޮށް އެކިކަހަލަ ހޯދުންތައް ހޯދުމަށް ސަރުކާރުން ބޮޑު އަހަންމިއްޔަތުކަމެއް ދޭނެކަން ވަޒީރު ފާހަގަކުރެއްވިއެވެ. ސަރުކާރުގެ ސިޔާސަތުތައް އެކުލަވާލުމަށް އެވިޑަންސް ބޭސްޑް ނުވަތަ ހެއްކާއި ގަރިނާގެ މައްޗަށް އެކުލެވޭ ހޯދުންތަކަށް ރިއާޔަތް ކުރާނެކަމަށް ވެސް ވަޒީރު ވިދާޅުވިއެވެ

ވަޒީރު އިތުރަށް ވިދާޅުވީ ގައުމީ ތަރައްގީގެ 20 އަހަރުގެ މާސްޓަރ ޕްލޭން ހެއްދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވުމާއެކު، އެ މަސައްކަތަށް ވެސް ތަފާތު ދިރާސާތައް ކުރުމާއި ތަފާތު ހޯދުންތައް ހޯދައި ރައްޔިތުން ބޭނުންވާ ގޮތް ބަލައިގެން ވަރަށް ބޮޑަށް ބަލާނެކަމަށެވެ.

"މީ އެއްހަރު ދުވަހުގެ ބޮޑު މަސައްކަތެއް. ރާއްޖޭގެ ހުރިހާ ހިސާބަކުން ޑޭޓާ އެއްކޮށް މީހުންނާ ބައްދަލުކޮށް، ރައްޔިތުން ދެކޭ ގޮތާއި ރައްޔިތުން ބޭނުންވާ ގޮތާއި ރައްޔިތުން ބޭނުންވާ ތަރައްގީ ގެނައުމުގައި ދެ އަހަރު ތެރޭގައި ކުރާނެ ކަންތައްތަކުގެ މައްޗަށް އެކުލަވާލާނެ ޕްލޭނެއް މި ޕްލޭނަކީ" ވަޒީރު ޑރ. ޙައިދަރު ވިދާޅުވިއެވެ.