logo
banner image

އިންޑިއާ-މޯލްޑިވްސް ބިޒްނަސް ފޯރަމް ނިއުދިއްލީގައި ފަށައިފި

އިންޑިއާ-މޯލްޑިވްސް ބިޒްނަސް ފޯރަމް ގެ ފުރަތަމަ ބައަދަލުވުން ނިއުދިއްލީގައި ބާއްވައިފިއެވެ. މި ފޯރަމް ޝަރަފްވެރި ކޮށްދެއްވައިފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއެވެ. މިއީ ރައީސުލްޖުމްހޫރިއްޔާ އިންޑިއާއަށް ކުރައްވާ ފުރަމާނަ ދަތުރުފުޅުގެ ތެރެއިން ކުރިޔަށް ގެންގޮސްފައިވާ ހަރަކާތެކެވެ. މި ފޯރަމްގައި ދެޤައުމުގެ ފަރާތުން ސަރުކާރުގެ އިސްވެރިންނާއި އެކި ދާއިރާތަކުގެ ވިޔަފާރިވެރިން ބައިވެރިވެ ވަޑައިގެންފައިވެއެވެ.

މި ފޯރަމް އަކީ ދެޤައުމުގެ ދެމެދުގައި ޢިޤްތިޞާދީ އަދި ވިޔަފާރިގެ ގުޅުން ބަދަހިކުރުމަށް ކުރެވޭ މަސައްކަތްތަކުގެ ތެރެއިން އެޅިގެންދާ މުހިއްމު ފިޔަވަޅެކެވެ. 

މި ފޯރަމްގައި ވާހަކަދައްކަވަމުން ރައީސް ވިދާޅުވީ، ދިވެހިރާއްޖޭގައި އިންވެސްޓު ކުރުމަށް ބޭނުންވާ ފަރާތްތަކަށް ފަހި މާހައުލެއް އެބަ އޮތް ކަމަށާއި، އިންވެސްޓަރުންނަށް ރާއްޖެއިން ލިބޭ މަންފާ ބޮޑުވާނެ ކަމަށެވެ.

މި ފޯރަމްގައި ވާހަކަދައްކަވަމުން ޢިޤްތިޞާދީ ތަރައްޤީއާއި ވިޔަފާރިޔާ ބެހޭ ވަޒީރު މުހައްމަދު ސައީދު ވިދާޅުވީ، މިއީ ރާއްޖޭގެ ރައީސަކު އިންޑިއާގައި ވިޔަފާރި ފޯރަމްއެއްގެ މިފަދަ ޓުއާއެއްގައި ބައިވެރިވެވަޑައިގަންނަވަ ފުރަތަމަ ފަހަރުކަމަށެވެ. އަދި ވަޒީރު ސައީދު ވަނީ މި ފޯރަމްގެ އިންތިޒާމުތައް ހަމަޖައްސަވައިދެއްވުމުން ފިޗީ އަދި އަސޯޝާމްއަށް ޝުކުރު އަދާކުރައްވާފައެވެ.

މި ފޯރަމްގެ އިންތިޒާމުތައް ހަމަޖައްސާފައި ވަނީ އިންޑިއާގެ ފެޑެރޭޝަން އޮފް އިންޑިއަން ޗެމްބާސް އޮފް ކޮމާސް އެންޑް އިންޑަސްޓްރީ (ފިޗީ) އަދި އެސޯސިއޭޓެޑް ޗެމްބާސް އޮފް ކޮމާސް އެންޑް އިންޑަސްޓްރީ އޮފް އިންޑިއާ (އަސޯޝާމް) އާ ގުޅިގެންނެވެ. މި ފޯރަމް ބޭއްވުމަށް ހަމަޖެހިފައިވަނީ ނިއު ދިއްލީގެ އިތުރުން މުންބާއި އަދި ބެންގަލޫރުގައި ހޯމަ ދުވަހުން ފެށިގެން ބުދަ ދުވަހުގެ ނިޔަލަށެވެ.