ދިވެހިރާއްޖެއާއި އޮސްޓްރޭލިއާއާ ދެމެދު ބޭއްވުނު ފުރަތަމަ ސީނިއަރ އޮފިޝަލް ޓޯކްސްގައި ބަންޑާރަނައިބުގެ އޮފީހުން ބައިވެރިވެއްޖެ

ދިވެހި ސަރުކާރާއި އޮސްޓްރޭލިއާ ސަރުކާުރުގެ ދެމެދު ބޭއްވުނު ފުރަތަމަ ސީނިއަރ އޮފިޝަލް ޓޯކްސްގައި ބަންޑާރަނައިބުގެ އޮފީހުން ބައިވެރިވެއްޖެއެވެ.

މިނިސްޓްރީ އޮފް ފޮރިން އެފެއާޒްގައި ކުރިއަށްދިޔަ މިބައްދަލުވުމުގައި، އޮސްޓްރޭލިއާ އާއި ދިވެހިރާއްޖެއާމެދު ތަފާތު ދާއިރާތަކުން ގުޅުން ބަދަހިކުރުމާގުޅޭގޮތުން ވަނީ މަޝްވަރާކުރެވިފައެވެ. އޭގެ ތެރޭގައި، ޑިފެންސް، ސެކިއުރިޓީ އަދި މެރިޓައިމްއާއި، އިޤްތިޞާދީ ދާއިރާއިންނާއި، ތަރައްޤީއާބެހޭ އެކި ކަންކަމާގުޅޭގޮތުން ދެ ޤައުމުގެ މެދުގައި އެހީތެރިކަން ބަދަލުކުރެވޭނެ ގޮތްތަކާގުޅޭގޮތުން މަޝްވަރާކޮށްފައިވެއެވެ.

މި ބައްދަލުވުމުގައި، ބަންޑާރަނައިބުގެ އޮފީހުން ވަނީ، ދިވެހިރާއްޖޭގެ ވެރިކަން ހިންގުމުގެ ނިޒާމާއި، ޑިމޮކްރަސީއާއި، އިންސާނީ ޙައްޤުތަކާއި ޤާނޫނީ ވެރިކަން ދެމެހެއްޓުމުގައި ސަރުކާރުން މިހާތަނަށް ކޮށްފައިވާ މަސައްކަތްތަކާއި، ކުރިއަށް ރާވާފައި ހުރި ކަންކަމާގުޅޭގޮތުން އޮސްޓްރޭލިއާގެ ޑެލެގޭޝަނަށް މަޢުލޫމާތު ޙިއްސާކޮށްފައެވެ.

އެގޮތުން، ސަރުކާރުގެ ސްޓްރެޓެޖިކް އެކްޝަން ޕްލޭން އެކުލަވައިލުމުގެ މަސައްކަތްތައް ކުރިއަށްދާގޮތާއި، ލެޖިސްލޭޓިވް އެޖެންޑާގައި ފާހަގަކޮށްފައި ހުރި ކަންކަން ޙާސިލްކުރުމަށް ކުރެވެމުންދާ މަސައްކަތްތަކާއި، ބައިނަލްްްއަޤުވާމީ އިންސާނީ ޙައްޤުތަކާބެހޭ މުޢާޙަދާތަކުގެ ދަށުން ދިވެހިރާއްޖެއިން ރިޕޯޓްކުރުމުގެ މަސައްކަތްތައް ކުރަމުންދާ ގޮތާއި، މިންތީގެ ހަމަހަމަކަން ޤާއިމްކުރުމަށްޓަކައި ކުރެވެމުންދާ މަސައްކަތްތަކާއި، އެކަންކަމާގުޅޭ ސަރުކާރުގެ ސިޔާސަތުތަކާގުޅޭގޮތުން މަޢުލޫމާތު ޙިއްސާކުރެވިފައިވެއެވެ. އަދި، މި ބައްދަލުވުމަކީ ދެ ޤައުމުގެ ދެމެދުގައި އޮތް ގާތްގުޅުން މިހާރަށްވުރެ އިތުރަށް ހަރުދަނާކޮށް، ގުޅުން ބަދަހިކުރުމަށް އެޅުނު މުހިންމު ފިޔަވަޅެއް ކަމުގައި މި ބައްދަލުވުމުގެ ބައިވެރިން ވަނީ ފާހަގަކުރައްވާފައެވެ.

މި ބައްދަލުވުމުގައި، މި އޮފީހުގެ ފަރާތުން ބައިވެރިވެވަޑައިގެންނެވީ ސީނިއަރ ސްޓޭޓް ކައުންސެލް އަލްއުސްތާޛާ ފައެނާ ފައްޔާޟް އާއި، ސްޓޭޓް ކައުންސެލް އަލްއުސްތާޛާ މާޒިޔާ ޢަބްދުއްސަތާރާއި، ސްޓޭޓް އެޓަރނީ އަލްއުސްތާޛާ އިފާޒާ ޢަލީއެވެ.