ވަޒީރު ސަޢީދު ވިލާ ކޮލެޖްގެ ކާމިޔާބީތަކަށާއި ޢިލްމީ ދާއިރާގައި ކުރިއެރުވުމަށް ކުރަމުންދާ މަސައްކަތްތަކަށް މަރުޙަބާ ދަންނަވައިފި

ވިލާ ކޮލެޖްގެ ބިޒްނަސް މެނޭޖްމަންޓް ފެކަލްޓީގެ ނަން "ޤާސިމް އިބްރާހީމް ސްކޫލް އޮފް ބިޒްނަސް" އަށް ބަދަލުކުރުމާއެކު، އިނޮވޭޝަން އަދި އަންޓަރޕްރިނިއަރޝިޕް ޑިވެލޮޕްމަންޓް ސެންޓަރ (ސީ.އައި.އީ.ޑީ) ގެ އިފްތިތާޙީ ރަސްމިއްޔާތު ބޭއްވުނެވެ. މި ރަސްމިޔާތު އިފްތިތާހުކޮށް ދެއްވާ، އިޤްތިޞާދީ ތަރައްޤީއާއި ވިޔަފާރީޔާބެހޭ ވަޒީރު މުޙައްމަދު ސަޢީދު ވަނީ ކޮލެޖްގެ ކާމިޔާބީތަކަށާއި، އިލްމީ ދާއިރާގައި ކުރިއެރުވުމަށް ކުރަމުންދާ މަސައްކަތްތަކަށް ތަޢުރީފުކުރައްވައި، މަރުޙަބާ ދަންނަވާފައެވެ.

އެ ފެކަލްޓީ ބިޒްނަސް ސްކޫލެއްގެ ގޮތުގައި އަލުން އޭގެ ނަން ބަދަލުކޮށް އެކަން އިޢުލާންކުރީ މިއަދު އެ ކޮލެޖުގައި ބޭއްވުނު ޚާއްޞަ ރަސްމިއްޔާތެއްގައެވެ. މީގެ އިތުރުން، ދިވެހިރާއްޖޭގެ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށާއި ތަރައްޤީކުރުމަށް، އެފަދަ ވިޔަފާރިތަކަށް ޚާއްޞަކުރެވިފައިވާ މަސައްކަތްކުރާ ޖާގައަކާއެކު، އެ ކޮލެޖުން ވަނީ އިންކިއުބޭޝަން ސެންޓަރެއްވެސް ތަޢާރަފުކޮށްފައެވެ.

މި ކާމިޔާބީތަކަކީ ތަޢުލީމީ ދާއިރާގެ ފެންވަރު މަތިކުރުމަށާއި އައު ގޮތްތައް ހޯދުމަށް މެނޭޖްމަންޓުން ކުރާ މަސައްކަތުގެ ނަތީޖާއެކެވެ. މިއީ މުސްތަޤުބަލަށް ވަރުގަދަ ބިންގަލެއް އެޅުމާއި، ތަޢުލީމީ ދާއިރާ މުއްސަނދިކުރުމަށް އެޅޭ ފިޔަވަޅެކެވެ.

ވިލާ ކޮލެޖުން މިއަދު ތަޢާރަފުކުރި އިންކިއުބޭޝަން ސެންޓަރަކީ ވިޔަފާރިތަކަށް މަގުދައްކައިދީ، އިރުޝާދާއި ލަފާ ފޯރުކޮށްދޭނެ މަރުކަޒެކެވެ. މީގެ އިތުރުން، މި މަރުކަޒުގައި އެކި ދާއިރާތަކުގެ ވިޔަފާރިތަކަށް ބޭނުންވާ ޚިދުމަތްތަކާއި ވަސީލަތްތައް ޤާއިމުކުރެވިފައި ހުންނާނެއެވެ. މި މަރުކަޒަކީ އަލަށް ފަށާ އަދި ކުރިއަރަމުން އަންނަ ވިޔަފާރިތަކަށް އެހީތެރިވެދޭ، އެ ފަރާތްތަކުގެ ކާމިޔާބީއަށް މަގުފަހިކޮށްދޭނެ މުހިންމު މަރުކަޒަކަށް ވެގެންދާނެއެވެ.