ބަންކަރިންގެ ޚިދުމަތުން ބޮޑު އާމްދަނީއެއް ލިބޭނެ: ތަޖުރިބާކާރުން

ބަންކަރިންގެ ޚިދުމަތަކީ ރާއްޖެއަށް އޭގެ ސަބަބުން ބޮޑު އާމްދަނީއެއް ލިބި އިޤްތިސާދީގޮތުންވެސް ބޮޑު ކުރިއެރުމެއް ލިބޭނެ ކަމެއްކަމަށް ރާއްޖޭގެ މެރިޓައިމް ދާއިރާގެ ތަޖުރިބާކާރުން ބުނެފިއެވެ.

ދުނިޔޭގެ އެންމެ ފާހަގަކޮށްލެވޭ ބަންކަރިން ކުންފުންޏެއް ކަމުގައިވާ ވިޓޯލްއާ ގުޅިގެން، އެސްޓީއޯއިން ރާއްޖޭގައި މި މަހު ތަޢާރަފުކުރާ އޮފްޝޯ ބަންކަރިން ވިޔަފާރިއާ ގުޅޭގޮތުން، އެމްޕީއެލްއިން މެރިޓައިމް ދާއިރާގެ މާހިރުންނާއެކު އިއްޔެ ބޭއްވި މަޝްވަރާ ބައްދަލުވުމަށްފަހު، "މިރާ" އާ ވާހަކަދެއްކެވި އެންމެހައި ތަޖުރިބާކާރުން ދެކޭގޮތުގައި މި މަސައްކަތަކީ ރާއްޖޭގެ އިޤްތިޞާދު އައު ހަރުފަތަކަށް ގެންދިއުމުގެ ފާލަމަކަށް ވެގެންދާނެކަމަށެވެ. އަދި މި ވިޔަފާރި ފެށުމުގައި ގޮންޖެހުންތަކެއް ހުރި ނަމަވެސް، ފަތުރުވެރިކަމުގެ ސިނާޢަތް ފަދައިން، ދުރު މުސްތަޤުބަލުގައި ބިޔަ އިންޑަސްޓްރީއެއް ރާއްޖޭގައި އުފެދިގެންދާނެކަމަށެވެ. މީގެ ސަބަބުން، ބޭރު ފައިސާ ވަންނާނެ އިތުރު މަގެއް ހުޅުވިގެންދާނެކަމަށެވެ.

ދިވެހިރާއްޖޭގެ އިޤްތިޞާދު އައު ދާއިރާއަކަށް ފުޅާކުރުމަށްޓަކައި، ބަންކަރިންގ ވިޔަފާރިއަށް ވަނުމުގެ ވާހަކަ ދެކެވެމުން އައީ ގިނަ ދުވަސްތަކެއް ވަންދެނެވެ. ނަމަވެސް، މިހާތަނަށް އެކަން ޢަމަލީ ސިފައެއްގައި ފެށިފައެއް ނުވެއެވެ. މި މަޝްރޫޢުގެ ވާހަކަ ދެކެވެމުން އަންނަތާ 30 އަހަރު ވެފައިވާއިރު، ރައީސް ޑރ. މުޙައްމަދު މުޢިއްޒުގެ ސަރުކާރުން ނިންމާފައިވަނީ އޮފްޝޯ ބަންކަރިންގ ވިޔަފާރި ކަނޑުމަތީގައި އަވަހަށް ފެށުމަށެވެ. އަދި މި މަސައްކަތް ކުރަމުން ގެންދަނީ ރައީސް ޑރ. މުޙައްމަދު މުޢިއްޒުގެ އިރުޝާދާ އެއްގޮތަށެވެ.

މި މަޝްރޫޢަށް ބޭނުންވާ ބައެއް އުޅަނދުފަހަރު ރާއްޖެއަށް ގެނެވިފައިވާއިރު، ދިވެހިރާއްޖޭގެ އިޤްތިޞާދު މި އައު ސިނާޢަތަށް ފުރޮޅެން ތައްޔާރުވަމުން މިދަނީއެވެ. މިކަމާ އެންމެ ހިތްހަމަޖެހިގެން ތިބީ ރާއްޖެއާއި ބައިނަލްއަޤްވާމީ ފެންވަރުގައި މެރިޓައިމް ދާއިރާގެ ތަޖުރިބާކާރުންގެ ގޮތުގައި ދިވެހިރާއްޖޭގައި ތިއްބެވި ބޭފުޅުންނެވެ. އެއީ އެ ބޭފުޅުންގެ ޢުމުރުގެ ގިނަ ދުވަސްތަކެއް ހޭދަކުރެއްވީ މި މަޝްރޫޢުގެ ވާހަކަ ދެއްކެވުމުގައި ކަމަށްވާތީއެވެ. މިހާރު މި މަޝްރޫޢު ޙަޤީޤަތަކަށް ވުމުގެ މަސައްކަތް ވަނީ ފަށައިގަނެވިފައެވެ.

ރާއްޖޭގައި ބަންކަރިންގެ ޚިދުމަތްދެނީ ދުނިޔޭގެ މުދާ އުފުލާ އަދި ޝިފިންގ މަސައްކަތްތައް ކުރަމުންދާ މަޝްހޫރު ކުންފުންޏެއްކަމަށްވާ ވިޓޯލް ބަންކާސްއާ ގުޅިގެންނެވެ. އެކި ސަރަޙައްދުތަކުގައި ބޯޓުފަހަރަށް ތެޔޮ ފޯރުކޮށްދިނުމުގެ ޚިދުމަތް ފުޅާ ދާއިރާއެއްގައި ދެމުން އަންނަ ވިޓޯލް ބަންކާސްގެ މެޕުގައި ދިވެހިރާއްޖެ މިހާރު ވަނީ ހިމަނާފައެވެ.

ރާއްޖޭގައި ބަންކަރިންގެ ޚިދުމަތް ފެށުމަށް ގެނައި ފުރަތަމަ ބޯޓު ކުޅުދުއްފުށި ސިޓީއަށް މިހާރުވަނީ ބަނދަރުކޮށްފައެވެ. ބަންކަރިންގެ ޚިދުމަތް ފެށުމަށް ރާއްޖެއަށް ގެންނަނީ 4000 ޓަނުގެ ތެޔޮ އުފުލޭ 2 އުޅަނދެވެ. ދެވަނަ ބޯޓުވެސް ރާއްޖެއަށް ވަރަށް އަވަހަށް އަންނާނެ ކަމަށް އެސްޓީއޯއިން ވިދާޅުވެއެވެ. ބަންކަރިންގެ ޚިދުމަތް އެންމެ ފުރަތަމަ ފަށަނީ އިހަވަންދިއްޕޮޅުގައެވެ.

ރާއްޖޭގެ އުފެއްދުންތެރިކަން ނުވަތަ ޖީޑީޕީއަކީ މިހާރު 6.5 ބިލިޔަން އެމެރިކާ ޑޮލަރެވެ. ނަމަވެސް ބަންކަރިންގެ ޚިދުމަތް ފެށުމުން އޭގެ ތެރެއަށް މުޅިން އަލަށް 400 މިލިއަން ޑޮލަރު ވަންނާނެކަމަށް ޢިޤްތިޞާދީ ވަޒީރު ސަޢީދު ވަނީ ވިދާޅުވެފައެވެ. މިއާއެކު 6 ބިލިޔަން ދިވެހި ރުފިޔާގެ މުޅިން އައު ސިނާއަތެއް އުފެދޭނެއެވެ. ރާއްޖޭގެ އިޤްތިޞާދު ސިންދަފާތުކޮށް އާމްދަނީ ލިބޭނެ އިތުރު މަގުތައް ތަނަވަސްކޮށްދިނުމަކީ ރައީސް ޑރ. މުޙައްމަދު މުއިއްޒު ޚާއްސަ އިސްކަމެއްދެއްވާ ކަމެކެވެ. މި މަސައްކަތުގެ ދަށުން ސަރުކާރުން މިހާރު ތައްޔާރުވަމުންދަނީ މިމަހު ރާއްޖޭގައި ބަންކަރިންގެ ޚިދުމަތް ފެށުމަށެވެ.