އިޤުތިޞާދީ ވަޒީރު މޫޑީސް ރޭޓިންގްސްގެ އޮފިޝަލުންނާ ބައްދަލު ކުރައްވައިފި
އިޤުތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު، ވިޔަފާރީގައި އިލްމުވެރި އެމެރިކާގެ މޫޑީސް ރޭޓިންގްސްގެ އޮފިޝަލުންނާ މިއަދު ބައްދަލު ކުރައްވައިފިއެވެ. މި ބައްދަލުވުމުގައި ވަޒީރު ވަނީ ސަރުކާރުގެ އިންވެސްޓްމަންޓްގައި ދިމާވެދާނެ ކަންތައްތަކާއި އިގްތިޞާދީ ރޭވުންތަކާ ބެހޭ މައުލޫމާތު މޫޑީސް ޓީމަށް ދެއްވާފައެވެ.
މި ބައްދަލުވުމުގެ މައިގަނޑު އަމާޒަކީ ރާއްޖޭގެ އިގްތިޞާދަށް އާމްދަނީ ހޯދޭނެ އިތުރު ގޮތްތަކާއި، މިހާރު ލިބެން ހުރި ވަސީލަތްތަކުން އެންމެ ހެޔޮގޮތުގައި ފައިސާ ހަރަދުކުރުމަށް އެޅޭނެ ފިޔަވަޅުތަކަކީ ކޮބައިކަން ދެނެގަތުމެވެ.
މި ބައްދަލުވުމުގައި ރާއްޖޭގައި ފުޑް ސެކިއުރިޓީ ޒޯނެއް އެކުލަވައިލުމާއި، ޗައިނާގެ ފްރީ ޓްރޭޑް އެއްބަސްވުމުގައިވާ ނުކުތާތަކުގެ އަލީގައި ރީ-އެކްސްޕޯޓް ކުރުމާއި، ސާފު މާހައުލެއްގައި ގެންގުޅެވިފައިވާ ކެއުމަށް ބޭނުންކުރާ ދޫނިސޫފާސޫފި ރީ-އެކްޕޯޓުކުރުމުގެ އިތުރުން، ސަރަހައްދީ ޓޫރިޒަމް އަދި އޭވިއޭޝަން ފުޅާކުރުމާއި، ލޮނު އުފެއްދުމުގެ މަޝްރޫއެއް ފެށުމަށް މަޝްވަރާ ކުރެވިގެންދިއައެވެ. ހަމައެހެންމެ ކަނޑު އުޅަންދުފަހަރަށް ތެޔޮ ސަޕްލައި ކުރުމަށް ކުރެވިދާނެ ކަންތައްތައް ދެނެގަނެ، ތެލަށް ބަރޯސާވުން ކުޑަކުރުމަށް އިއާދަކުރަނިވި ހަކަތަ ބޭނުން ކުރެވިދާނެ ގޮތްތަކަކީ ކޮބައިކަމާމެދުވެސް މަޝްވަރާކުރެވުނެވެ. މީގެ އިތުރުން ބޮޑެތި ވިޔަފާރި ވެރިންނާއި އެކު ފައިސާ ބަދަލުކުރުމާއި މާލީ ޚިދުމަތްދޭ ސިނާޢަތާއި މާލީ މަރުކަޒުތައް ޤާއިމުކޮށް ރާއްޖޭގައި ޑިވެލޮޕްމަންޓް ބޭންކެއް ގާއިމުކުރުމަމާގުޅޭގޮތުންވެސް ވަނީ ވާހަކަ ދެކެވިފައެވެ.
މި ބައްދަލުވުމަކީ ރައްޖޭގެ އިގްތިޞާދު ވެއްޓިފައިވާ އަޑިގަނޑުން އަރައިގަތުމަށް އެޅުނު މުހިންމު ފިޔަވަޅެކެވެ. މިބައްދަލުވުމުގައި ވަޒީރުގެ އިތުރުން ވިޒާރާގެ ކަމާގުޅޭ އިސްވެރިންވެސް ބައިވެރިވެވަޑައިގެންނެވިއެވެ.