ރާއްޖެ އަށް ޕޭޕަލް ތައާރަފު ކުރުމުގެ ރަސްމީ ޕްރޮޕޯޒަލް ފޮނުވައިފި: ކުރިއަށް އޮތީ އޮންލައިންކޮށް ފައިސާ ދެއްކުމަށް އާ ޒަމާނެއް
ދިވެހިރާއްޖެއަށް ޕޭޕަލްގެ ޚިދުމަތް ތައާރަފުކުރުމަށް، ފުލް ޕްރޮޕޯސަލް ޕޭޕަލް ކުންފުންޏަށް ހުށަހަޅައިފިއެވެ. މި ޕްރޮޕޯސަލަކީ އީ-ކޮމާސްގެ ގޮންޖެހުންތައް ހައްލުކުރުމާ ބެހޭ ގޮތުން ކުރިން ކުރެވުނު މަޝްވަރާތަކުގެ މައްޗަށް ބިނާކޮށް އެކުލަވާލާފައިވާ ހުށަހެޅުމެކެވެ. މި ހުށަހެޅުމުގައި ޕޭޕަލްގެ ޕޭމަންޓް ޕްރޮސެސިން ކެޕޭސިޓީތައް ރާއްޖޭގެ ވިޔަފާރިތަކަށާއި ހިދުމަތްދޭ ފަރާތްތަކަށް ހޯދައިދިނުން ހިމެނެއެވެ. މި ބައްދަލުވުމަކީ ރާއްޖޭގެ ޕޭމަންޓް ސިސްޓަމްތައް ތަރައްގީކޮށް، އީ-ކޮމާސްގެ މުޢާމަލާތްތައް އިތުރަށް ރަނގަޅުކޮށް ހައްލު ހޯދުމުމުގެ މަގްސަދުގައި، ކުރިން މަޝްވަރާކުރެވުނު ޕްލޭންތައް ރަސްމީކޮށް ކުރިއަށް ގެންދިއުމަށް ބޭއްވުނު ބައްދަލުވުމެކެވެ.
ވަޒީރު ސައީދާއި ޕޭޕަލްގެ މަންދޫބުންނާ ދެމެދު ބޭއްވުނު މަޝްވަރާތަކުގައި ރާއްޖޭގެ ޕޭމަންޓް ސިސްޓަމްތައް ތަރައްގީކޮށް، އީ-ކޮމާސްގެ މުޢާމަލާތްތައް އިތުރަށް ރަނގަޅުކޮށް ހައްލު ހޯދުމުމުގެ މަގްސަދު ހިމެނެއެވެ. މީގެ އިތުރުން ރާއްޖޭގެ ވިޔަފާރިތަކަށް ދިމާވެފައިވާ މުހިންމު މައްސަލަތަކުގެ ތެރޭގައި މި ސަރަހައްދުގައި ޕޭޕަލްގައި ހުރި ލިމިޓެޝަންތައް ފާހަގަކޮށްފައިވެއެވެ. އަދި ބައިނަލްއަގްވާމީ ގޮތުން ފައިސާ ފޮނުވުމުގައި ޕޭޕަލް މަގުބޫލު ނަމަވެސް، ރާއްޖޭގައި އެ ޕްލެޓްފޯމް މެދުވެރިކޮށް ފައިސާ ނުލިބޭކަންވެސް ވަނީ ފާހަގަ ކުރައްވާފައެވެ.
ޕޭޕަލްގެ ފުރިހަމަ ހިދުމަތްތައް ތައާރަފް ވުމުން ރާއްޖޭގެ ވިޔަފާރިތަކަށް މިހާރަށްވުރެ އޮމާން މުއާމަލާތްތަކެއް ކުރެވޭނެ ކަމަށާއި މާކެޓް ރީޗް ފުޅާވެގެންދާނެ ކަމަށް ބެލެވެއެވެ. އިންޑިއާ ރުޕޭ ކާޑު ހިމެނޭ ގޮތަށް އިތުރު އީ-ވޮލެޓް ހައްލުތައް ހިމަނައިދިނުމުގެ ގިނަގުނަ ބުރަ މަސައްކަތްތަކެއް ސަރުކާރުން ކުރަމުންދާއިރު، ޕޭޕަލްގެ ފުރިހަމަ ހިދުމަތްތައް ކާމިޔާބުކަމާއެކު ތަންފީޒުކުރުމަކީ ރާއްޖޭގެ އީ-ކޮމާސް އިންފްރާސްޓްރަކްޗަރ ޒަމާނީ ފެންވަރަށް ވަރުގަދަ ކުރުމަށް އެޅިގެންދާނެ ވަރަށް މުހިންމު ފިޔަވަޅެކެވެ.
ރާއްޖޭގެ ވިޔަފާރިތައް ކުރިއަރުވައި، ރާއްޖޭގައި ޕޭމަންޓް ލޭންޑްސްކޭޕް ފުޅާކުރުމަށް އެހީތެރިވުމަށް ސަރުކާރުންދަނީ ގިނަގުނަ މަސައްކަތްތަކެއް ކުރަމުންނެވެ. މި މަޤްޞަދުތައް ޙާޞިލުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިސްކަންދޭ ކަމެއް ކަމުގައި، ވަޒީރު ސައީދު ވަނީ ފާހަގަކުރައްވާފައެވެ.