logo
banner image

ރީޖަނަލް އެއަރޕޯޓްސްއާއި އެމްއޭސީއެލް އެއްކޮށްލުމުން ބޮޑު ޚަރަދެއް ސަލާމަތްކުރެވޭނެ: ވަޒީރު ސަޢީދު

ރީޖަނަލް އެއަރޕޯޓްސް ކޮމްޕެނީއާއި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އެއްކޮށްލުމަށް ވަޒީރުންގެ މަޖިލީހުން ނިންމައިފިއެވެ. ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، ވަޒީރުންގެ މަޖިލީހުން މިއަދު ނިންމެވި އެންމެ މުހިންމު އެއް ނިންމެވުމަކީ ރީޖަނަލް އެއަރޕޯޓްސްއާއި އެމްއޭސީއެލް އެއްކޮށްލުން ނުވަތަ މާޖްކޮށްލުންކަމަށެވެ. މި ނިންމުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅު ތެރެއިން ސަރުކާރު ހިއްސާވާ ކުންފުނިތައް ރީ-ފޯރމްކުރުމުގެ ސިޔާސަތުގެ ބައެއްކަމުގައި ވަޒީރު ސަޢީދު ވިދާޅުވިއެވެ.

އަދި މި ދެ ކުންފުނި އެއްކޮށްލުމުގެ ސަބަބުން ޚަރަދު ކުޑަވެ، އެއަރޕޯޓްތައް ހިންގުން އިތުރަށް ހަރުދަނާވެގެންދާނެކަމަށެވެ. ޚާއްޞަކޮށް ހިންގުމުގެ ޚަރަދާއި ކުލީގެ ޚަރަދު ބޮޑުތަނުން ކުޑަވާނެ ކަމަށްވެސް ވިދާޅުވިއެވެ. ހަނިމާދޫ އެއަރޕޯޓު ހިމެނޭގޮތަށް ޖުމްލަ 8 އެއަރޕޯޓެއް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބެލުމުގެ ދަށަށް ގެނެވޭނެއެވެ. މި ދެ ކުންފުނި އެއްކޮށްލުމުގެ މަސައްކަތް 31 ޖެނުއަރީ 2025 އަށް ނިމޭނެކަމަށް ލަފާކުރެވޭ ކަމަށާއި، މި މަސައްކަތް ކުރިއަށްދާނީ ކޯރޕަރޭޓް ގަވަރނަންސް އުޞޫލުންކަމަށެވެ.

އެމްއޭސީއެލްއަކީ ފައިދާވާ ކުންފުންޏެއްގެ އިތުރުން، ވަރަށް ބޮޑު މަސްއޫލިއްޔަތެއް އަދާކުރާ ކުންފުންޏެކަމަށާއި މީގެ އިތުރުން، ދިވެހިރާއްޖޭގެ ފަތުރުވެރިކަމުގެ މައި ދޮރާށިކަމުގައިވެސް ފާހަގަކުރެއްވިއެވެ. އެ ކުންފުނީގެ ޓެލެންޓުތައް ރީޖަނަލް އެއަރޕޯޓްތަކަށް ބޭނުންކުރެވޭނެކަމަށް ވިދާޅުވިއެވެ. އަދި ދެ ކުންފުނި އެއްކުރުމުން ޚިދުމަތްތަކަށް އަސަރެއް ނުކުރާނެ ކަމަށާއި، މަސައްކަތްތައް އިތުރަށް ހަރުދަނާވެ، ކުރިއަރައިގެންދާނެ ކަމަށްވެސް ވަޒީރު ވިދާޅުވިއެވެ.

ސަރުކާރުގެ އިޤްތިޞާދީ އިޞްލާޙުތައް ބައިނަލްއަޤްވާމީ މާލީ އިދާރާތަކުން ބަލައިގަނެފައިވާ ކަމަށާއި، މި މަސައްކަތްތަކަކީ ރާއްޖޭގެ އިޤްތިޞާދު ހަމަމަގަށް އެޅުވުމަށް ކުރެވޭ މަސައްކަތްތަކެއްކަމަށް ވަޒީރު ފާހަގަކުރެއްވިއެވެ.