ވަޒީރު ސައީދު ލިންކޯ ސްޓޫޑިއޯ އަށް ޒިޔާރަތް ކުރައްވައިފި

އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ވަޒީރު މުޙައްމަދު ސަޢީދު، ދިވެހިރާއްޖޭގެ ކުރިއަރަމުންދާ ކްރިއޭޓިވް އިކޮނޮމީގެ ކުދި އަދި މެދު ފަންތީގެ ވިޔަފާރިއެއް ކަމުގައިވާ ލިންކޯ ސްޓޫޑިއޯއަށް ޒިޔާރަތްކުރައްވައިފިއެވެ. މި ޒިޔާރަތުގައި ވަޒީރު ސަޢީދު ލިންކޯގެ އުފެއްދުންތެރި މަސައްކަތްތައް ބައްލަވާލައްވާ، ކުންފުނީގެ ވެރިންނާއެކު މަޝްވަރާކުރައްވާފައިވެއެވެ. މި މަޝްވަރާގައި މިވިޔަފާރި ކުރިއެރުވުމަށް ހުރި ގޮންޖެހުންތަކާ ބެހޭގޮތުން ވާހަކަދެކެވުނެވެ.

ލިންކޯގެ ވެރިން ކަމުގައިވާ އިއްބެއާއި ނަޒީ ވިދާޅުވި ގޮތުގައި، ލިންކޯއަކީ ހަމައެކަނި ޕްރިންޓިންގ ސްޓޫޑިއޯއެއް ނޫނެވެ. އަދި ލިންކޯގައި ވިއްކަނީ ހަމައެކަނި ޓީޝާޓެއްވެސް ނޫނެވެ. މިއިން ކޮންމެ ޕްރޮޑަކްޓަކީ ރާއްޖޭގެ އާރޓިސްޓުންގެ ހިތާއި ފުރާނައެވެ. މިއިން ކޮންމެ ކުރެހުމަކުންވެސް ތަފާތު ވާހަކައެއް ދައްކުވައިދެއެވެ. އަދި ލިންކޯއަކީ އެ ވާހަކަތައް އާންމުންނާ ހަމައަށް ފޯރުކޮށްދޭ މެދުވެރިއާއެވެ.

ދިވެހިރާއްޖޭގައި އުފައްދާ އަދި ދިވެހި އާރޓިސްޓުން ފަރުމާކޮށްފައިވާ ލިންކޯގެ ކޮންމެ ޕްރޮޑަކްޓެއް ރަމްޒުކޮށްދެނީ ދިވެހި އާރޓިސްޓުންގެ ފަންނުވެރިކަން، ހުނަރުވެރިކަން އަދި ތަފާތު ވިސްނުންތަކެވެ. މިގޮތުން، މިއިން ކޮންމެ އާރޓް-ޕީސްއެއް ޓީޝާޓެއްގެ ސިފައިގައި އާންމުނަށް ގެނެސްދިނުމަށްޓަކައި ލިންކޯ ބޭނުންކުރަނީ ސުޕީމާ ކޮޓަނުގެ ޓީޝާޓެވެ. ދުނިޔޭގެ ނަން މަޝްހޫރު ބްރޭންޑުތަކުން ބޭނުންކުރާ މި ޓީޝާޓުތަކުން ދައްކުވައިދެނީ ފެންވަރެވެ. ކޮންމެ ޓީޝާޓެއްގައިވެސް ސުޕީމާ ސެޓުފިކެޓު ލޭބަލެއް ހަރުކޮށްފައި ވާނެއެވެ. މިއީ ގަންނަ ފަރާތްތަކަށް ދިގު މުއްދަތަކަށް ދެމިހުންނަގޮތަށް ތައްޔާރުކޮށްފައިވާ އުފެއްދުމެއް ލިބޭކަމުގެ ޔަޤީންކަން ދިނުމަށްޓަކައެވެ. ތަފާތު ކުލަތަކާއި ސައިޒުތަކުން ލިބެންހުންނަ މި ޓީޝާޓުތަކަކީ، ލިންކޯއިން ދިވެހި ސަގާފަތާއި ޒަމާނީކަން ލާމެހިފައިވާ ގޮތަށް އެކުލެވޭ އާރޓް-ޕީސްތަކެކެވެ. ލިންކޯގެ އުފެއްދުންތައް ހަމައެކަނި ޓީޝާޓުތަކަށް ހަނިވެފައެއް ނުވެއެވެ. ލިންކޯގެ ތަފާތު އުފެއްދުންތަކުގެ ތެރޭގައި ފޮތި ކޮތަޅުތަކާއި ފޮޓޯ ޕްރިންޓު އަދި ސްޓިކަރތައްވެސް ހިމެނެއެވެ.

ލިންކޯއާއެކު މަސައްކަތްކުރަން އެދޭ ފަރާތްތަކަށް ލުއިފަސޭހަ، އަދި ކަސްޓަމަރުންގެ ބޭނުންތަކަށް އަމާޒުކުރެވިފައިވާ ހާއްސަ އުސޫލުތަކެއް ގާއިމުކުރެވިފައިވެއެވެ. ޑިޒައިން ހޮވުމުން ފެށިގެން، އުފެއްދުމުގެ މިންވަރު ކަނޑައެޅުމާ ހަމައަށް، ލިންކޯގެ ޓީމުން ވަނީ ކަސްޓަމަރުންގެ ޚިޔާލުތައް ޙަޤީޤަތަކަށް ހެދޭނެ މަގު ފަހިކޮށްދެއްވާފައެވެ.

އެބޭފުޅުން ވިދާޅުވިގޮތުގައި، ލިންކޯގެ އަމާޒަކީ "އާރޓަށް ލޯބިކުރާ ބައެއްގެ ހައިސިއްޔަތުން، ހުރިހާ ވައްތަރެއްގެ އާރޓްގެ އަގު ވަޒަންކޮށް، އާރޓިސްޓްރީއަށް އެކަށީގެންވާ ހިތްވަރު ލިބިދޭ މުޖުތަމަޢެއް ބިނާކުރުމަށް މަސައްކަތްކުރަމުން ގެންދިއުމެވެ." މިފަދަ ފަރާތްތަކުގެ އަގު ވަޒަންކުރައްވާ، އިޤްތިޞާދު ކުރިއަރުވާ ސިންދަފާތުކުރުމަށް، ކްރިއޭޓިވް އިކޮނޮމީއެއް ޤާއިމްކުރުމަކީ ޑރ.މުއިއްޒުގެ މުހިންމު ވަޢުދުފުޅެކެވެ. މީގެތެރޭގައި ދިވެހީންގެ ހުނަރުވެރިކަން ކުރިއެރުވުމާއި، ޑިޖިޓަލް ކޮންޓެންޓް އުފެއްދުން ކުރިއެރުވުމާއި، ކްރިއޭޓަރުން ބާރުވެރިކުރުން ހިމެނެއެވެ. މިގޮތުން، ދިވެހި ކްރިއޭޓާރސްއަށް ހިތްވަރުދެއްވައި، ގޮންޖެހުންތައް ދެނެގަނެ، އެހީތެރިކަން ބޭނުންވާ ދާއިރާތައް އޮޅުން ފިލުއްވުމަށް ވަޒީރު ސަޢީދު ގެންދަވަނީ ސިލްސިލާކޮށް މިފަދަ ދިވެހި އުފެއްދުންތެރިންނާއި ބައްދަލުކުރައްވަމުންނެވެ.