އިޤްތިޞާދު ސިންދަފާތުކޮށް އާމްދަނީ އިތުރުކުރުމުގެ މަސައްކަތް މަޑު ނުޖެހި ދަނީ ކުރިއަށް: ވަޒީރު ސައީދު

އިޤްތިސާދީ ތަރައްޤީއަށް އަމާޒުކޮށް ސަރުކާރުން މުހިންމު ފިޔަވަޅުތަކެއް އަޅަމުންދާކަމަށް އިޤްތިސާދާއި ތަރައްޤީއާ ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. މިރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، އިޤްތިޞާދު ސިންދަފާތުކޮށް އާމްދަނީ އިތުރުކުރުމުގެ މަސައްކަތް މަޑު ނުޖެހި ދަނީ ކުރިއަށްކަމަށެވެ.

ތަފުސީލުދެއްވަމުން ވިދާޅުވީ ޑިވެލޮޕްމަންޓް ބޭންކުގެ މަސައްކަތް ވަރަށް އަވަހަށް ފެށޭނެ ކަމަށާއި، ފުނަދޫގައި ފައިނޭންޝަލް ސެންޓަރެއް ޤާއިމްކުރެވެމުންދާ ކަމަށެވެ. މީގެ އިތުރުން، އުތުރުގައި ބަންކަރިންގ ޚިދުމަތް ފެށޭ މަހުގެ 12 ވަނަ ދުވަހު ފެށޭނެ ކަމަށްވެސް ވަޒީރު ހާމަކުރެއްވިއެވެ. އަދި ނޮވެމްބަރު މަހު އެސް.އީ.ޒެޑް ދަށުން ސޯލާ ސިޓީ ޕްރޮޖެކްޓްގެ އަމަލީ މަސައްކަތް ފެށިގެންދާނެ ކަމަށެވެ. މީގެ އިތުރުން، މި އަހަރުގެ ތެރޭގައި އެގްރިކަލްޗަރަލް އިކޮނޮމިކް ޒޯންގެ މަސައްކަތްވެސް ފެށިގެންދާނެ ކަމުގެ ޔަޤީންކަން ވަޒީރު ދެއްވިއެވެ. އަދި އުތުރުގެ އަތޮޅުތަކުގައި ރިސޯޓުތައް ޤާއިމުކުރުމުގެ މަސައްކަތް ފަތުރުވެރިކަމުގެ ވުޒާރާއިން ދަނީ ކުރިއަށް ގެންދަމުންކަމަށާއި މި ކަންކަމުގެ ސަބަބުން ރާއްޖޭގެ ޢިޤްތިޞާދު މިހާރު ލަފާކޮށްފައިވާ ވަރަށް ވުރެ ބޮޑަށް ކުރިއަރާނެކަމަށްވެސް ވަޒީރު ވިދާޅުވިއެވެ.

ސަރުކާރުން އަޅާފައިވާ ފިޔަވަޅުތަކާއެކު މިއަހަރުގެ ހަމަސްދުވަހުގެ ތެރޭގައި 16 ބިލިއަން ރުފިޔާ ސަލާމަތްކުރެވިފައިވާކަން ފާހަގަކުރެއްވިއެވެ. އަދި ދަރަނި ދެއްކުމަށް އޮތް ސޮވެރިން ފަންޑުގައި މިހާރު 60 މިލިއަން ޑޮލަރު އެބަހުރި ކަމަށާއި ރައިސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު ހުރީ 2 މިލިއަން ޑޮލަރު ކަމުގައެވެ.

ދަރަނީގެ ވާހަކަ ދައްކަވަމުން ވަޒީރު ވިދާޅުވީ، މިހާތަނަށް އެއްވެސް ދަރަންޏެއް ޑިފޯލްޓްވެފައި ނުވާ ކަމަށާއި، ސަރުކާރުން ދަރަނި އަދާކުރުމަށް މަސައްކަތްކުރަމުންދާ ކަމަށެވެ. އަދި މިހާރު ދައްކަމުންދާ ދަރަނިތަކަކީ ކުރީގެ ސަރުކާރުން ނަގާފައިވާ ދަރަނިތައް ކަމަށާއި، މިފަދަ ހާލަތެއް ތަކުރާރުވާން ރައީސް ޑރ. މުހައްމަދު މުއިއްޒުގެ ސަރުކާރުން ފުރުސަތު ނުދެއްވާނެކަމަށެވެ.

ވަޒީރު ސަޢީދު ފާހަގަކުރެއްވި ގޮތުގައި، ކުރީގެ ސަރުކާރުން މާލީ ނިޒާމު ބެލެހެއްޓުމުގައި ގޯސްތަކެއް ހަދުމުގެ ސަބަބުން އިޤުތިޞާދަށް ބޮޑެތި ގެއްލުންތަކެއް ލިބިފައިވާކަމަށެވެ. އޭގެ ތެރޭގައި 3 އަހަރު ތެރޭ 8 ބިލިއަން ރުފިޔާ ޗާޕުކޮށް،ކުރަން ނުޖެހޭ ޚަރަދުތަކެއް ކުރުމާއި، 5 އަހަރުތެރޭ ރާއްޖޭގެ ތާރީޚުގައި ނުއުފެއްދޭވަރުގެ ދަރަންޏެއް އުފެއްދުން ހިމެނޭކަމަށެވެ.