logo
banner image

ދިވެހިރާއްޖޭގައި ކްރިއޭޓިވް އިކޮނޮމީއެއް ބިނާކުރުން

ކްރިއޭޓިވް އިކޮނޮމީއެއްގެ އަސާސް ބިނާވެފައިވަނީ، ޓެކްނޯލޮޖީއާއި އިލްމުގެ އަލީގައި ފަންނީ، އީޖާދީ، އަދި އުފެއްދުންތެރި ދާއިރާތައް ކުރިއަރުވައިގެން އިޤްތިޞާދު ތަރައްގީކޮށް ސިންދަފާތުކުރާ އިކޮނޮމިކް މޮޑެލްއެއްގެ މައްޗަށެވެ. ދިވެހި ރާއްޖޭގައި ކްރިއޭޓިވް އިކޮނޮމީއެއް ޤާއިމުވުމުގެ މާނައަކީ، ފަންނީ އަދި އީޖާދީ މަސައްކަތްތެރި ކަމުގައި އުޅޭ ފަރާތްތަކަށް އެ މަސައްކަތްތައް އެންމެ ފުރިހަމައަށް ކެރެވޭނެ ގޮތަކަށް، މަގުފަހިވާނެ މާހައުލެއް ގާއިމުވެގެންދިއުމެވެ.

މައިގަނޑު 10 ކަމެއްގެ މައްޗަށް ބިނާކޮށް، ދިވެހިރާއްޖޭގައި ކްރިއޭޓިވް އިކޮނޮމީއެއް ބިނާކުރުމަށް 31 ޑިސެމްބަރ 2023 ގައި ވަޒީރުން މަޖިލީހުން ނިންމަވައި، މި މަސައްކަތް އިޤުތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާއާ ވަނީ ހަވާލުކުރައްވާފައެވެ. ވަޒީރުންގެ މަޖިލީހުގެ ނިންމެވުން ބިނާކުރެވިފައިވަނީ ރައީސް ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅުތައް ތަންފީޒު ކުރުމަށްޓަކައި މި ވުޒާރާގެ ފަރާތުން ދިވެހި އުފެއްދުންތެރިންނަށް ދިމާވެފައިވާ ގޮންޖެހުންތަކާއި، ބޭރުދުނިޔޭގައި މިފަދަ ސިޔާސަތުތައް ތަންފީޒުކުރުމަށް ކުރެވިފައިވާ މަސައްކަތްތަކުގެ މައްޗަށެވެ.

ކްރިއޭޓިވް އިކޮނޮމީގެ ތެރެއިން، އުފެއްދުންތެރި އަދި އީޖާދީ މަސައްކަތްތައް ކުރަމުންދާ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް އެހީތެރިވެދީ، އެބޭފުޅުންގެ އުފެއްދުންތައް ދުނިޔޭގެ އެކި ކަންކޮޅުތަކަށް އެކްސްޕޯޓު ކުރުމުގެ މަގުފަހިކޮށްދިނުމާއި، ފަސޭހައިން ފައިސާ ފޮނުވާ، ލިބިގަނެވޭނެ ގޮތްތައް ގާއިމު ކުރެވިގެންދާނެއެވެ. މީގެ އިތުރުން ފަންނީ އުފެއްދުންތައް ހިމާޔަތް ކުރާނެ ޤާނޫނުތަކާއި ގަވާއިދުތައް އެކުލަވާލުމާއި، ޓެކްނޯލޮޖީއާއި ފައިނޭންޝަލް އިންފްރާސްޓްރަކްޗަރ ގާއިމުކުރުމުގެ މަސައްކަތް ކުރެވިގެންދާނެއެވެ.