ތައި ޗެމްބަރ އޮފް ކޮމާސްގެ މަންދޫބުންނަށް ބިޒްނަސް ބްރީފިންގ ސެޝަނެއް ބާއްވައިފި

ތައި ޗެމްބަރ ގެ ފަރާތުން މިވަގުތު ރާއްޖެވަޑައިގެން އުޅުއްވާ ވަފުދުގެ ބޭފުޅުންނަށް ބިޒްނަސް ބްރީފިންގ ސެޝަނެއް ކްރޮސްރޯޑް މޯލްޑިވްސްގައި މިއަދު ބާއްވައިފިއެވެ.

ރާއްޖޭގެ އިގްތިސާދި ތަރައްޤީއާއި ވިޔަފާރިއާބެހޭ ވުޒާރާ އާއި ތައިލެންޑްގެ ޗެމްބަރ އޮފް ކޮމާސް ގުޅިގެން ކުރިއަށްގެންދިޔަ މިސެޝަންގެ މަގުސަދަކީ ދިވެހި ސަރުކާރުގެ ތަރައްޤީގެ އެޖެންޑާ އާއި ރާއްޖޭގައި ހުރި އިންވެސްޓް ކުރުމުގެ ފުރުސަތުތަކުގެ މައުލޫމާތު ބައިވެރިންނާ ހިއްސާކުރުމެވެ. މި ސެޝަންގައި ތައިލެންޑްގެ ސަރުކާރާއި އަމިއްލަ ވިޔަފާރިތަކުގެ އިސްމަގާމުތައް އަދާކުރައްވާ ބޭފުޅުންނާއި އެކު މުޅި ޖުމްލަ 170 އަށްވުރެ ގިނަ ބޭފުޅުން ބައިވެރިވެވަޑައިގެންނެވިއެވެ.

ތައިލެންޑްގެ މި ޑެލިގޭޝަންގައި ހިމެނެނީ ޔުނިވާސިޓި އޮފް ތައި ޗެމްބަރ އޮފް ކޮމާސް (ޔޫޓީސީސީ) އިން ހިންގާ "ޓޮޕް އެގްޒެކެޓިވް ޕްރޮގްރާމް އިން ކޮމާސް އެންޑް ޓްރޭޑް" (ޓެޕްކޮޓް) ގެ ބައިވެރިންވެނެވެ. މި ޕްރޮގްރާމަކީ ޔޫޓީސީސީ އާއި ތައިލެންޑްގެ މިނިސްޓްރީ އޮފް ކޮމާސް، މިނިސްޓްރީ އޮފް ފިނޭންސް، މިނިސްޓްރީ އޮފް އިންޑަސްޓްރީ، މިނިސްޓްރީ އޮފް ސިވިލް އެފެއާޒް އަދި ތައި ޗެމްބަރ އޮފް ކޮމާސް ގުޅިގެން ހިންގާ ޕްރޮގްރާމް އެކެވެ. އަހަރަކު އެއްފަހަރު ހިންގާ މި ޕްރޮގްރާމުގެ ބޭނުމަކި ވިޔާފާރިތަކާއި ސިނާއަތް ތަކުގެ މެދުގައި ބިނާކުރަނިވި ވާދަވެރި މާހައުލެއް އުފައްދަން ބޭނުންވާ ވިސްނުން އަށަގެންނެވުމެވެ. މިޕްރޮގްރާމުގައި ތައިލެންޑްގެ ހުރިހާ ހިސާބެއްގެ ވިޔާފާރިވެރިން ބައިވެރިވެއެވެ.

އިގްތިސާދީ ވުޒާރާގެ އިތުރުން ދިވެހިރާއްޖޭގެ ފަރާތުން މި އިވެންޓްގައި ބައިވެރިވީ މާލީ ވުޒާރާ އަދި މޫސުމީ ބަދަލުތާކައި ތިމާވެއްޓާއި ހަކަތައާ ބެހޭ ވުޒާރާ އިންނެވެ.