ރޮދިން ކުރެހުމުގެ ފަންނު އާލާކުރަމުންއަންނަ އަބުޑީ މޯލްޑިވްސްގެ މަސައްކަތް ވަޒީރު ސަޢީދު ބައްލަވާލައްވައިފި

ރޮދިން ކުރެހުމުގެ ފަންނު އާލާކުރުމަށް މަސައްކަތްކުރަމުންއަންނަ ފަންނާނު އާމިނަތު ޝިހާނާ އަބޫބަކުރު (އަބުޑީ) ގެ މަސައްކަތް ބައްލަވާލެއްވުމަށް ޢިޤްތިޞާދީ ތަރައްޤީއާއި ވިޔަފާރިޔާ ބެހޭ ވުޒާރާގެ ވަޒީރު މުޙައްމަދު ސަޢީދު ޒިޔާރަތްކުރައްވައިފިއެވެ.

މި ޒިޔާރަތުގައި އަބުޑީގެ ކުރެހުންތައް ބައްލަވާލައްވައި، އޭނާގެ މަސައްކަތުގެ ތަފްސީލު އަޑުއެއްސެވިއެވެ. މި ބައްދަލުވުމުގައި، ރޮދިން ކުރެހުމުގެ ފަންނު އިތުރަށް ކުރިއެރުވުމަށްޓަކައި ކުރެވިދާނެ ކަންތައްތަކާއި ދިމާވާ ގޮންޖެހުންތަކާ ބެހޭގޮތުން މަޝްވަރާކުރެވުނެވެ.

މީގެ ތެރޭގައި ޤައުމީ ފެންވަރުގެ މައުރަޒެއް ބޭއްވުމާއި، މި ދާއިރާއިން ތަމްރީނު ޕްރޮގްރާމްތައް ހިންގުން ހިމެނެއެވެ.

އަދި މަސައްކަތްކުރާނެ ތަނުގެ ދަތިކަމާއި، މަސައްކަތް ރައްކާކޮށް މާކެޓްކުރުމުގެ ފުރުޞަތު މަދުކަން އަބުޑީ ވަނީ ފާހަގަކޮށްފައެވެ. މީގެ އިތުރުން، މި ޚާއްޞަ މަސައްކަތް ތަޢާރަފުކުރުމުގެ ދަތިކަމާއި، ރިސޯޓް ތަކުގައި މިފަދަ އުފެއްދުންތައް ވިއްކުމަށް ހުރި ގޮންޖެހުންތައް ފާހަގަ ކުރެއްވިއެވެ.

އަދި އަބުޑީ ވަނީ ސަރުކާރުން މަސައްކަތްތެރިންނާ ބައްދަލުކޮށް، އެ ފަރާތްތަކުގެ މަސައްކަތްތައް ބައްލަވައި، އެ ފަރާތްތަކުގެ އަޑު އައްސަވައި، ސަރުކާރުގެ ފަރާތުން ކޮށްދެވޭނެ ކަންތައްތައް ހިއްސާކޮށްދެއްވުމަކީ މަސައްކަތްތެރިންނަށް އިތުރު ހިތްވަރަކަށް ވެގެންދާނެ ކަމެއް ކަމުގައި އުފަލާއެކު ފާހަގަކޮށްފައެވެ.

އަބުޑީގެ ރޮދިން ކުރެހުމުގެ މަސައްކަތުގައި ކުރިއަށް ދިއުމުގައި އެންމެބޮޑު ހިތްވަރު ލިބުނީ ފަންނު އެކްސްޕޯއަށް ތައްޔާރުކުރި ކުރެހުމަށް ލިބުނު ކާމިޔާބީއާއިއެކުގައެވެ. އެ ފަހަރު އޭނާ ރޮދިން ތައްޔާރުކުރީ ޝަހީދު ހުސެން އާދަމްގެ ކުރެހުމެކެވެ. އަބުޑީގެ އެ ހުރިހާ މަސައްކަތެއްގައި ވެސް ބޭނުންކުރަނީ ރޮއްޖެވެ. މައުރަޒަށް ޒިޔާރަތްކުރި ގިނަ ފަރާތްތަކުން މި މަސައްކަތަށް ބޮޑު ތަރުހީބެއް ދިނުމުގެ ސަބަބުން މި މަސައްކަތް ރަސްމީ ގޮތެއްގައި ކުރިއަށް ގެންދިއުމުގެ ހިތްވަރު ލިބުނުކަމަށް ފަންނުވެރިޔާ ފާހަގަކުރިއެވެ. އަބުޑީ އަންނަނީ އޭނާގެ މި ހުނަރު އެހެން މީހުންނަށް ދަސްކޮށްދިނުމުގެ ގޮތުން ވޯކްޝޮޕްތައް ވެސް ބާއްވަމުންނެވެ.