logo
banner image

ވަޒީރު ސަޢީދު 'ތަކެތި' ގެ އިސްވެރިޔާއާ ބައްދަލު ކުރައްވައިފި

މަޝްހޫރު ލޯކަލް ބްރޭންޑް 'ތަކެތި' ގެ އިސްވެރިޔާ އާމިނަތު ޝަރީހާން އިބްރާހިމްއާ ވިޔަފާރިއާއި އިޤުތިޞާދީ މަސައްކަތްތަކާއި ބެހޭ ވަޒީރު މުޙައްމަދު ސަޢީދު ބައްދަލު ކުރައްވައިފިއެވެ. ވަޒީރު ސަޢީދު ވަނީ ތަކެތީގެ އުފެއްދުންތައް ވިއްކުމަށް ޚާއްސަ ފިހާރަ "އެހެނިހެން" އަށް ޒިޔާރަށް ކުރައްވައި އުފެއްދުންތައް ބައްލަވައިލައްވާ، ދިމާވާ ދަތިތަކާއި ހުރި ގޮންޖެހުންތައް އޮޅުން ފިލުއްވާފައެވެ.

ތަކެތީގެ އުފެއްދުންތަކާ ބެހޭގޮތުން މަޢުލޫމާތުދެއްވަމުން ޝަރީހާން ވިދާޅުވީ އެންމެ އިސްކަމެއް ދެއްވަނީ ކުޑަކުދިންނަށް ޚާއްސަ، ދިވެހިބަހުގެ ފޮތްތަކާއި އެކިކަހަލަ ގޭމްސް އަދި އެހެނިހެންވެސް ދިވެހި ބަހުގެ އުފެއްދުންތައް ބާޒާރަށްނެރެ، ކުދިންގެ މެދުގައި ދިވެހިބަހަށް އޮންނަ ށައުގުވެރިކަން އިތުރު ކުރުމަށެވެ. ތަކެތީގެ މަސައްކަތަށް އަށް އަހަރުވެފައިވާއިރު، މި އަހަރުގެ ޖޫންމަހު ވަނީ "އެހެނިހެން" ގެ ނަމުގައި މި ތަކެއްޗަށް ހާއްސަ ފިހާރައެއް ހުޅުވާފައެވެ. މި ވިޔަފާރި މެދުވެރިކޮށް މިބާވަތުގެ އުފެއްދުންތައް އުފައްދާ ދިވެހި ބްރޭންޑް ތަކަށް، އެ އުފެއްދުންތައް ބާޒާރަށް ނެރުމަށްވެސް ޝަރީހާން ގެންދަވަނީ އެހީތެރިވެ ދެއްވަމުންނެވެ.

މިހާތަނަށް އައި އިރު އެކިކަހަލަ ގޮންޖެހުންތައް ކުރިމަތިވެފައިވާ ކަމަށާއި އެގޮތުން އެންމެ ބޮޑު ގޮންޖެހުމަކީ ޖާގައިގެ ދަތިކަންކަމުގައި ޝަރީހާން ފާހަގަކުރެއްވިއެވެ. އެގޮތުން ފިހާރަ ހުޅުވިއިރުވެސް މި ގޮންޖެހުންތައް ހުރިކަން ފާހަގަ ކުރައްވަމުން، މިހާރުވެސް އިތުރު ބާވަތްތައް ޑިސްޕްލޭ ކުރުމުގަ އާއި އެހެން ބޭފުޅުންނަށް ފުރުސަތު ފަހިކޮށް ދިނުމުގައި މި ގޮންޖެހުން ހުރިކަން ފާހަގަ ކުރެއްވިއެވެ.

ކޮންމެ އަހަރަކުވެސް ބުކްފެއާއެއް ބޭއްވިގެން ދިއުމަކީ ކުރައްވާ ވަރަށް ބޮޑު އުންމީދެއްކަމަށާއި އެކަން އެހެން ވެއްޖެ ނަމަ އާންމުންނަށް ދިވެހިބަހުގެ އުފެއްދުންތަކުގެ ތަނަވަސްކަން އެނގިގެންދާނޭކަމުގައި ޝަރީހާން ދެކިލައްވައެވެ.

އިޤުތިޞާދީ ވުޒާރާއިން ޚާއްސަކޮށް ވަޒީރު ވަޑައިގެން، ހުރި ގޮންޖެހުންތަކާއި ދިމާވާ ދަތިތަކުގެ ވާހަކަ އަޑުއެއްސެވުމަކީ ލިބުނު ވަރަށް ބޮޑު އުފަލެއްކަމަށާއި، އުންމީދަކީ ކުރިއަށް އޮތްތަނުގައި ވިޔަފާރިތަކަށް، ޚާއްސަކޮށް އުފެއްދުންތެރިކަމުގެ ދާއިރާއަށް ނިކުންނަ ފަރާތްތަކަށް މަގުތައް ފަހިވެގެން ދިއުންކަމުގައިވެސް ޝަރީހާން ވިދާޅުވިއެވެ.

ވަޒީރު ސަޢީދު ގެންދަވަނީ ސިލްސިލާކޮށް ދިވެހި އުފެއްދުންތެރިންނާއި ބައްދަލުކުރައްވައި އެފަރާތްތަކަށް ހިތްވަރުދެއްވައި، ކުރިއަށް ދިއުމުގައި ހުރި ގޮންޖެހުންތަކާއި އެހީތެރިކަން ފޯރުކޮށްދެވެންހުރި ގޮތްތައް އޮޅުން ފިލުއްވަމުންނެވެ. ދިވެހިރާއްޖޭގެ އިޤްތިޞާދު އިތުރަށް ފުޅާކޮށް، ސިންދަފާތު ކުރުމަށް، ރާއްޖޭގައި ކްރިއޭޓިވް އިކޮނޮމީއެއް ބިނާކުރުމަކީ ރައީސް ޑޮކްޓަރ މުޙައްމަދު މުޢިއްޒުގެ ސަރުކާރުން ހާއްސަ އިސްކަމެއް ދެއްވައިގެން ކުރިއަށް ގެންދަވާ މަސައްކަތެކެވެ.