ޓްރޭޑްމަރކުގެ ހައްޤުތަކާއި ގުޅޭ ސެމިނާރއެއް ބާއްވައިފި

ޓްރޭޑްމަރކުގެ ހައްޤުތަކާއި ގުޅޭގޮތުން ކަމާގުޅުންހުރި އިދާރާތަކުގެ މުވައްޒަފުން ތަމްރީން ކުރުމަށާއި، އަދި މިހާރު އެކުލަވާލައި މަޖިލިހަށް ފޮނުވުމަށް މަސައްކަތްކުރަމުންދާ ޓްރޭޑްމާރކާއި ބެހޭ ބިލާމެދު ކަމުގެ މާހިރުންނާއެކު ހިޔާލުބަދަލުކޮށް މަޝްވަރާކުރުމަށްޓަކައި ދެދުވަހުގެ ސެމިނަރއެއް ބާއްވައިފިއެވެ.

ޔުނައިޑެޓް ސްޓޭޓްސް ޕޭޓަންޓް އެންޑް ޓްރޭޑްމާރކް އޮފީސް (ޔޫ.އެސް.ޕީ.ޓީ.އޯ) އާއި އިގްތިސާދާ ތަރައްޤީއާއި ވިޔަފާރިއާބެހޭ ވުޒާރާ އަދި މޯލްޑިވްސް ކަސްޓަމްސް ސާރވިސް ގުޅިގެން ބޭއްވި މި ސެމިނާރގައި ބަންޑާރަނައިބުގެ އޮފީހާއި، ޕްރޮސެކިއުޓަރ ޖެނެރަލްގެ އޮފީސް، ޒުވާނުންނާ ބެހޭ ވުޒާރާ، ދިވެހި ފުލުހުންގެ ޚިދުމަތް، ބާ ކައުންސިލް އަދި ބިޒްނަސް ސެންޓަރ ކޯޕަރޭޝަންގެ މުވައްޒަފުން ބައިވެރިވިއެވެ. ކަސްޓަމްސްގެ އޮފީހުގައި މިސެމިނާރ ބާއްވާފައިވަނީ މި މެއި މަހުގެފަސްވަނަ ދުވަހާއި ހަވަނަދުވަހުއެވެ.

މި ސެމިނަރގައި ޓްރޭޑްމަރކް ރަޖިސްޓްރީކުރުމުގައި ބަލަންޖެހޭ ކަންކަމާއި، ރަޖިސްޓްރީ ކުރުމުގެ ކަންކަން ހިނގާގޮތާއި، ރަޖިސްޓްރީކުރުމުގައި ދިމާވާ ދަތިތަކާއި ގުޅޭގޮތުން ސެމިނަރގެ ބައިވެރިންނަށް މައުލޫމާތު ދެވުނެވެ.

ވިޔަފާރިތަކަށް އެންމެ ފުރިހަމަ ގޮތުގައި ފިކުރީމުދަލުގެ ނަފާ ލިބޭނެގޮތް ހޯދައިދީ، ދިވެހިރާއްޖޭގައި އިންވެސްޓްކުރާ ފަރާތްތަކަށް ދިވެހިރާއްޖޭގެ ވިޔަފާރީގެ މާހައުލަށް އިތުބާރު ހޯދައިދިނުމަށްޓަކައި ފިކުރީމުދާ ހިމާޔަތްކޮށް ރައްކާތެރިކޮށްދިނުމަކީ ސަރުކަރުން ވަރަށް އިސްކަމެއް ދީގެން ކުރަމުންގެންދާ މަސައްކަތެކެވެ. މިގޮތުން ކޮޕީރައިޓާއި އެއާއި ގުޅޭ އެހެނިހެން ހައްޤުތަކުގެ ޤާނޫނު އިސްލާހުކުރުމަށް މިހާރުވަނީ މަޖިލީހަށް ފޮނުވާފައެވެ. އަދި މިއަހަރުތެރޭގައި ޓްރޭޑްމަރކާއި ބެހޭ ބިލް މަޖިލީހަށް ފޮނުވުމަށް މަސައްކަތްކުރަމުންދާކަމަށް އިގްތިސާދާބެހޭ ވުޒާރާއިން ބުނެއެވެ.

"މިހާރުމިގެންދަނީ ޕޭޓަންޓައި ބެހޭ ބިލަކާއި، ޖޯގްރަފިކަލް އިންޑިކޭޝަންސް އާއި ބެހޭ ބިލެއް ތައްޔާރުކުރުމުގެ މަސައްކަތްކުރަމުންނެވެ. މީގެ އިތުރުން އަދަބީ އަދި ފަންނީ މަސައްކަތްކުރާ ފަރާތްތަކަށް އެމީހުންކުރާ މަސައްކަތަށް ރޯޔަލްޓީ ލިބޭނެ އިންތިޒާމެއް ހަމަޖެއްސުމަށްޓަކައި ކަލެކްޓިވް މެނޭޖްމަންޓް އޯގަނައިޒޭޝަންއެއް އުފެއްދުމަށް މަސައްކަތްކުރަމުންނެވެ." އެވުޒާރާއިން މިސެމިނާރއާގުޅޭގޮތުން ނެރުނު ނޫސް ބަޔާނުގައިވެއެވެ.