އިންވެސްޓަރުންގެ ޝައުގުވެރިކަން ރާއްޖެއަށް ދަނީ ލިބެމުން: ވަޒީރު ސައީދު
ރާއްޖޭގައި ސިޔާސީ ހަމަޖެހުން ޤާއިމްވެ އިންވެސްޓަރުންގެ ޝައުގުވެރިކަން ރާއްޖެއަށް ބޮޑުވަމުން އަންނަކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.
ޕްރޮގްރާމުގައި ވާހަކަ ދައްކަވަމުން ވަޒީރު ވިދާޅުވީ ނިމިދިޔަ މަޖިލިސް އިންތިޚާބުގައި ދިން ވޯޓުން ދިވެހި ރައްޔިތުން ބޭނުންވާގޮތް ވަރަށް ސާފުކޮށް ދައްކަދިފައިވާ ކަމަށާއި މިސަރުކާރުގެ ވައުދުތައްކަމަށްވާ ބޯހިޔާވަހިކަމާއި ގެދޮރުވެރިކަން ރައްޔިތުން ބޭނުންވާކަން ހާމަކޮށްދީފައިވާކަމުގައެވެ. ވަޒީރު އިތުރަށް ވިދާޅުވީ ވޯޓުން ރައްޔިތުން އަންގައިދީފައިވަނީ ރާއްޖޭގެ އިގްތިސާދު ރަގަނޅުވާން ބޭނުންވާކަމާއި ވަޒީފާތައް އުފެދި ބިޔަ މަޝްރޫއުތައް ހިންގަން އެމީހުން ބޭނުންވެފައިތިބި ކަންކަމުގައެވެ.
ރައްޔިތުން ވޯޓު ދީފައިވާގޮތުން ރާއްޖޭގައި ސިޔާސީ ހަމަޖެހުން ގާއިމުވެފައިވާކަން ބޭރުގެ އިންވެސްޓަރުން ގަބޫލުކުރެވިފައިވާ ކަމަށާއި ރާއްޖޭގައި އިންވެސްޓު ކުރުމުގެ ޝައުގުވެރިކަން އެމީހުން ފާޅުކުރަމުން އަންނަކަމުގައިވެސް ވަޒީރު ވިދާޅުވިއެވެ.
"ވޯލްޑް ބޭންކް އައިއެމްއެފްއިން ލަފާކޮށްފައި މިއިނީ މިއަހަރު %5.5 ގައި އިޤްތިޞާދު ކުރިއަރައި ދާނެކަމަށް. އިރާދަކުރެއްވިއްޔާ ރާއްޖޭގެ އިކޮނޮމީ ދާނީ ކުރިއަށް. ރާއްޖެއާއި މެދު އިތުބާރު ޤާއިމްކުރެވިއްޖެ. ޚާއްސަ ގޮތެއްގައި މަޖިލިސް އިންތިޚާބަށް ފަހު. އޭގެ ސަބަބުން ރާއްޖެއަށް މީގެކުރިން ރާއްޖެއަށް ނާންނަ ކުރިއެރުންތަކެއް އަންނާނެ. އަޅުގަނޑު އެހެން މި ފާހަގަކުރީ ރާއްޖޭގައި އިންވެސްޓްކުރާ ފަރާތްތަކުން ޚާއްސަކޮށް މިބަލަނީ ސްޓެބިލިޓީއަށް." ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ ބޭންކު ތަކުންނާއި އިންވެސްމަންޓް ވިޔަފާރިތަކުން މިހާރުވެސް ރާއްޖޭގައި އިންވެސްޓު ކުރަމުން ދާ ކަމަށައި ކުރިއަށް އޮތްތަނުގައި މިކަމުގެ ހެޔޮ ނަތީޖާ ދިވެހިރައްޔިތުންނަށް ފެނިގެންދާނޭކަމުގައެވެ.
މި ސަރުކާރުން ކުރަމުން އަންނަ މަސައްކަތުގެ ސަބަބުން ދިވެހި ރުފިޔާ ވަރުގަދަވަމުން އަންނަކަމަށާއި، ރާއްޖޭގެ ރިޒާވްވެސް ވަރުގަދަވަމުން އަންނަކަމަށް ވަޒީރު ވިދާޅުވިއެވެ. މިސާލެއްގެ ގޮތުގައި ވަޒީރު ވިދާޅުވީ މި ސަރުކާރުން މިހާތަނަށް ސޮވެރިން ޑިވެލޮޕްމަންޓް ފަންޑަށް އެކަނިވެސް 30 މިލިއަން ޑޮލަރު ޖަމާކޮށްފައިވާކަމުގައެވެ.