އިންޑިއާގެ ޚާރިޖީ ކަންތައްތަކާއިބެހޭ ވަޒީރާއެކު ބޭއްވި ރަސްމީ ބައްދަލުކުރެއްވުމުގައި އިގްތިސާދީ ވަޒީރު ބައިވެރިވެވަޑައިގެންފި
އިންޑިއާގެ ޚާރިޖީ ކަންތައްތަކާއިބެހޭ ވަޒީރު ޑރ. ސުބްރަމާނިޔަމް ޖައިޝަންކަރާ އެކު ބޭއްވި ރަސްމީ މަޝްވަރާ ބައްދަލުވުމުގައި އިގްތިސާދީ ވަޒީރު މުހައްމަދު ސައީދު ބައިވެރިވެ ވަޑައިގެންފިއެވެ. މި ބައްދަލުވުމުގައި އިގްތިސާދީ ވަޒީރުގެ އިތުރުން، މާލީ ވަޒީރު ޑރ. މުހައްމަދު ޝަފީގުގެ އަދި މޯލްޑިވްސް މަނިޓަރީ އޮތޯރިޓީގެ ގަވަރުނަރު، އަހްމަދު މުނައްވަރު ވެސް ވަނީ ބައިވެރިވެ ވަޑައިގަންނަވާފައެވެ.
މި ބައްދަލުވުމަކީ އިޤްތިޞާދީ ތަރައްޤީއާއި ވިޔަފާރީގެ ގުޅުންތައް އިތުރުކުރުމަށް ކުރެވޭ މަސައްކަތްތައް ކުރިއެރުވުމަށް އެޅި ވަރަށް މުހިންމު ފިޔަވަޅެކެވެ. މި މަޝްވަރާތަކުގައި ވިޔަފާރީގެ ގުޅުންތައް ރަނގަޅުކުރުމާއި، އިގްތިސާދީ ކުރިއެރުން ހީވާގިކުރުމާއި، މަޝްވަރާ ކުރެވުނު ގޮންޖެހުންތަކަށް ހައްލެއް ހޯދޭނެ ތަފާތު ސްޓްރެޓެޖީތަކަށް އަލިއަޅުވާލާފައިވާއިރު، މަޝްވަރާއަށް އަގުހުރި ވިސްނުންތަކެއް ޑރ. ސުބްރަމާނިޔަމް ޖައިޝަންކަރު ވަނީ ދެއްވާފައެވެ.
މީގެ އިތުރުން އިޤްތިޞާދީ އަދި ވިޔަފާރީގެ ޕާޓްނަރޝިޕް އިތުރުކުރެވޭނެ ގޮތްތަކާއި، ޖޮއިންޓް ޑިވެލޮޕްމަންޓްގެ ފުރުޞަތުތައް ހޯދުމަށް މަޝްވަރާކުރެވި، ދެ ގައުމުގެ ކުރިއެރުމަށްޓަކައި އެއްބާރުލުން ހަރުދަނާކުރުމުގެ މައްޗަށްވެސް މި މަޝްވަރާ ބައްދަލުވުމުގައި ވަނީ ވާހަކަ ދެކެވިފައެވެ.