ތިލަފުށީގެ ވޭސްޓް-ޓު-އެނާޖީ މަޝްރޫޢާއި ކަރަންޓު ވިއުގަ ބައްލަވާލެއްވުމަށް މިނިސްޓްރީއާއި އޭޑީބީގެ ވަފުދެއް އެރަށަށް ޒިޔާރަތްކޮށްފި
ތިލަފުށީގައި ކުރިއަށްދާ ވޭސްޓް-ޓު-އެނާޖީ (ކުނިން ހަކަތަ އުފެއްދުމުގެ) މަޝްރޫޢުގެ މަސައްކަތްތައް ކުރިއަށްދާ މިންވަރާއި، އެރަށުގެ ކަރަންޓު ވިއުގަ ބައްލަވާލެއްވުމަށް ކަމާބެހޭ ވުޒާރާގެ އިސް ބޭފުޅުންނާއި އޭޝިއަން ޑިވެލޮޕްމަންޓް ބޭންކް (އޭޑީބީ) ގެ ވަފުދެއް ތިލަފުއްޓަށް ޒިޔާރަތްކުރައްވައިފިއެވެ.

މި ޒިޔާރަތުގެ މައިގަނޑު ބޭނުމަކީ ތިމާވެއްޓާ ރައްޓެހި ދެމެހެއްޓެނިވި ގޮތެއްގައި ކުނި މެނޭޖުކުރުމަށް ސަރުކާރުން ކުރިއަށްގެންދާ މި މުހިންމު މަޝްރޫޢުގެ މިހާރުގެ ޙާލަތު ވަޒަންކުރުމާއި، މަސައްކަތްތައް ރޭވިފައިވާ ތާވަލާ އެއްގޮތަށް ކުރިއަށްދޭތޯ ބެއްލެވުމެވެ.
މި ދަތުރުފުޅުގެ ތެރެއިން، މަޝްރޫޢުގައި މިހާތަނަށް ޙާޞިލުކުރެވިފައިވާ މުހިންމު ލަނޑުދަނޑިތަކާ ގުޅޭގޮތުން ދެފަރާތުގެ ދެމެދުގައި ފުޅާ ދާއިރާއެއްގައި މަޝްވަރާކުރެވުނެވެ. މީގެއިތުރުން، މަޝްރޫޢުގެ ކުރިއަށް އޮތް ފިޔަވަހީގެ މަސައްކަތްތައް ފެށުމަށް ވާންޖެހޭ ތައްޔާރީތަކާއި، އެކަމަށް ބޭނުންވާ ފަންނީ އަދި މާލީ އެހީތެރިކަމާ ގުޅޭގޮތުން ވެސް ވަނީ ޚިޔާލު ބަދަލުކުރައްވާފައެވެ.

ހަމައެއާއެކު، މާލެ ސަރަޙައްދު (ގްރޭޓާ މާލެ ރީޖަން) އެއްވިއުގައަކުން ގުޅާލެވޭ ފުރިހަމަ ކަރަންޓު ވިއުގައެއް (އިންޓަގްރޭޓަޑް ޕަވަރ ނެޓްވޯކް) ޤާއިމުކުރުމަށް އޭޑީބީން ދެވިދާނެ އެއްބާރުލުމާއި އެހީތެރިކަމާ ގުޅޭގޮތުން ވެސް މި ބައްދަލުވުމުގައި ޚާއްޞަ ސަމާލުކަމެއް ދީގެން މަޝްވަރާކުރެވުނެވެ.
މި މަޝްރޫޢު ކާމިޔާބުކަމާއެކު ނިމިގެންދިޔުމުން، މާލެ ސަރަޙައްދުގެ ކުނީގެ މައްސަލައަށް ދާއިމީ ޙައްލެއް ލިބިގެންދިއުމުގެ އިތުރުން، އިއާދަކުރަނިވި ހަކަތައިގެ ޒަރީއާއިން ޤައުމީ ކަރަންޓު ވިއުގައަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.
