ސްޓޮކްހޯމް ކޮންވެންޝަންގެ ޕޮޕްރޮކް ބައްދަލުވުމުގައި ދިވެހިރާއްޖެއިން ބައިވެރިވެ މުހިންމު ދައުރެއް އަދާކޮށްފި

ސްޓޮކްހޯމް ކޮންވެންޝަންގެ ދަށުން ބާއްވާ ޕާސިސްޓެންޓް އޯގަނިކް ޕޮލިއުޓެންޓްސް ރިވިއު ކޮމިޓީ (ޕޮޕްރޮކް) ގެ 22 ވަނަ ބައްދަލުވުމުގައި ދިވެހިރާއްޖެއިން ބައިވެރިވެއްޖެއެވެ.

މި ބައްދަލުވުން ކުރިއަށް ގޮސްފައިވަނީ އިޓަލީވިލާތުގެ ރޯމްގައި، 2026 ސެޕްޓެމްބަރު 21 އިން 25 ގެ ނިޔަލަށެވެ. މިއީ އިންސާނުންގެ ސިއްހަތަށާއި ތިމާވެއްޓަށް ގެއްލުންދޭ ކެމިކަލްތައް ދިރާސާކޮށް، އެފަދަ މާއްދާތަކާ މެދު އަޅަންޖެހޭ ފިޔަވަޅުތައް ކަނޑައެޅުމަށް ސައިންސްވެރިންނާއި ފަންނީ މާހިރުން އެއްތަންވެ ބޭއްވި މުހިންމު ބައްދަލުވުމެކެވެ.

އޭޝިއާ-ޕެސިފިކް ސަރަޙައްދު ތަމްސީލުކުރައްވާ ކޮމިޓީ މެންބަރެއްގެ ހައިސިއްޔަތުން މި ބައްދަލުވުމުގައި ރާއްޖެއިން ބައިވެރިވެވަޑައިގެންނެވީ ޙަސަން އަޒްހަރެވެ. މި ބައްދަލުވުމުގެ ތެރެއިން، އިލެކްޓްރޯނިކްސް ސާމާނާއި، ފޭރާމާއި، އިމާރާތްކުރުމަށް ބޭނުންކުރާ ތަކެތީގައި އަލިފާން ރޯވުން ލަސްކުރުމަށް ބޭނުންކުރާ ކެމިކަލެއް ކަމަށްވާ "ޑެކަބްރޯމޯޑިފެނައިލްއީތޭން" (ޑީބީޑީޕީއީ) އާ ގުޅޭގޮތުން މަޝްވަރާކުރި ކޮންޓެކްޓް ގްރޫޕުގެ ރިޔާސަތު ބެލެހެއްޓެވީ އަޒްހަރެވެ. އޭނާގެ އިސްނެންގެވުމާއެކު ކުރެވުނު މަސައްކަތުން، އެ ކެމިކަލް ދިރާސާކުރުމުގެ ދެވަނަ މަރުހަލާއަށް ގެންދިއުމަށް ކޮމިޓީން ވަނީ އެއްބަސްވެފައެވެ.

މީގެއިތުރުން، ތިމާވެއްޓަށް ނުރައްކާވާ ވަކި ބާވަތްތަކެއްގެ ބްރޯމިނޭޓެޑް ޑައިއޮކްސިންސް އަދި ފިއުރަންސް ފަދަ ވިހަ މާއްދާތަކާ ދެކޮޅަށް ދުނިޔޭގެ ފެންވަރުގައި ފިޔަވަޅު އަޅަންޖެހޭ ކަމަށް މި ބައްދަލުވުމުގައި ވަނީ ނިންމާފައެވެ. އަދި އަލިފާން ނިއްވުމާއި ރޯވުން ހުއްޓުވުމަށް ބޭނުންކުރާ އިތުރު ކެމިކަލެއް ކަމަށްވާ "ޓީބީޕީއެޗް" އާ ގުޅޭގޮތުން އިތުރު ދިރާސާތަކާއި މަސައްކަތްތައް ކުރަންޖެހޭ ކަމަށްވެސް މި ބައްދަލުވުމުގައި ބައިވެރިވި ފަރާތްތަކުން ވަނީ އެއްބަސްވެފައެވެ.