އިއާދަކުރަނިވި ހަކަތައިގެ އަމާޒަށް ވާސިލުވުމަށް ސޯލާ ޕީވީ ހަރުކުރާނެ ތަންތަން ދެނެގަތުމުގެ ސާވޭއެއް ފަށައިފި

ދިވެހިރާއްޖޭގެ ހަކަތައިގެ 33 އިންސައްތައަކީ އިއާދަކުރަނިވި ހަކަތައަށް ހެދުމަށް ސަރުކާރުން ކަނޑައަޅާފައިވާ ލަނދުދަނޑި ހާސިލުކުރުމުގެ ގޮތުން، ސޯލާ ޕީވީ ހަރުކުރާނެ އެކަށީގެންވާ ތަންތަން ދެނެގަތުމަށް ޚާއްޞަ ސާވޭއެއް ފަށައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިރުގެ އަލިންނާއި އެހެނިހެން ގުދުރަތީ ވަސީލަތްތަކުން އުފައްދާ ތިމާވެއްޓާ ރައްޓެހި ހަކަތައަށް ހެދުމަށެވެ. މި އަމާޒަށް ވާސިލުވުމުގެ މަސައްކަތް އަވަސްކުރުމުގެ ގޮތުން މިހާރު ވަނީ ސޯލާ ޕީވީ ނިޒާމުތައް ގާއިމުކުރެވިދާނެ ތަންތަން ދެނެގަތުމަށް ބޭނުންވާ ފުރަތަމަ މަރުހަލާގެ ސައިޓް ސާވޭތައް ކުރިއަށް ގެންގޮސްފައެވެ.

މި ސާވޭގެ މައިގަނޑު ބޭނުމަކީ ރާއްޖޭގެ އެކި ސަރަޙައްދުތަކުގައި ސޯލާ ޕީވީ ހަރުކުރުމަށް އެންމެ އެކަށޭނަ ބިންތަކާއި، އިމާރާތްތަކުގެ ފުރާޅުތައް ފަދަ ތަންތަން ދެނެގަނެ، އެ ތަންތަނުގައި މަޝްރޫޢުތައް ހިންގުމަށް ބޭނުންވާ ފަންނީ މަޢުލޫމާތު އެއްކުރުމެވެ. މިކަމުގެ ސަބަބުން އިއާދަކުރަނިވި ހަކަތަ ފުޅާދާއިރާއެއްގައި ތަރައްޤީކުރުމަށް ކުރެވޭ މަސައްކަތްތަކަށް އިތުރު ހަލުވިކަމެއް ލިބިގެންދާނެއެވެ.

ތެލަށް ބަރޯސާވާ މިންވަރު ކުޑަކޮށް، ދެމެހެއްޓެނިވި އަދި ތިމާވެއްޓާ ރައްޓެހި ގޮތަކަށް ހަކަތަ އުފެއްދުމަކީ ރާއްޖޭގެ އިޤްތިޞާދަށާއި ތިމާވެއްޓަށް ބޮޑެތި ފައިދާތަކެއް ލިބިގެންދާނެ ކަމެކެވެ. ސަރުކާރުން ދަނީ މި ލަނދުދަނޑިތައް ހާސިލުކުރުމަށްޓަކައި ކަމާގުޅުންހުރި އިދާރާތަކާ ގުޅިގެން މުހިންމު ފިޔަވަޅުތަކެއް އަޅަމުންނެވެ.