ޔޫއޭއީ އެމްބަސީއާއި މަސްދަރު އަދި ޖީއެސްޔޫއާއެކު މިނިސްޓްރީން މުހިންމު މަޝްވަރާތަކެއް ބާއްވައިފި

ދިވެހިރާއްޖޭގައި ދެމެހެއްޓެނިވި އުމްރާނީ ތަރައްޤީ ޤާއިމުކުރުމާ ގުޅޭގޮތުން، ޔުނައިޓެޑް އަރަބް އެމިރޭޓްސް (ޔޫއޭއީ) ގެ އެމްބަސީއާއި، މަސްދަރު ކުންފުނި އަދި ގްލޯބަލް ސައުތު ޔުޓިލިޓީސް (ޖީއެސްޔޫ) އާއެކު މިނިސްޓްރީން މިއަދު ވަރޗުއަލްކޮށް ޚާއްޞަ ވަށްމޭޒު މަޝްވަރާ ބައްދަލުވުމެއް ބާއްވައިފިއެވެ.

މިއަދު ކުރިއަށްދިޔަ މި ކާމިޔާބު ބައްދަލުވުމުގައި، ރާއްޖެއަށް މުހިންމު މައިގަނޑު ދާއިރާތަކަކުން ގުޅުން ބަދަހިކުރުމާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކޮށްފައެވެ. އޭގެ ތެރޭގައި އިއާދަކުރަނިވި ހަކަތަ އުފެއްދުމާއި، ކަރަންޓު ވިއުގަ (ގްރިޑް) ޒަމާނީ ފެންވަރަށް ތަރައްޤީކުރުމުގެ މަސައްކަތްތައް ހިމެނެއެވެ. މީގެއިތުރުން ފެނާއި ނަރުދަމާގެ ނިޒާމު ހަރުދަނާކުރުމާއި، ކުނި މެނޭޖުކުރުމުގެ އިތުރުން ކުނިން ހަކަތަ އުފެއްދުމުގެ (ވޭސްޓް-ޓު-އެނަރޖީ) ދާއިރާއިން އެއްބާރުލުން ދިނުމާ ގުޅޭގޮތުންވެސް ފުޅާ ދާއިރާއެއްގައި ޚިޔާލު ބަދަލުކުރެވުނެވެ.

މި ބައްދަލުވުމާ ގުޅޭގޮތުން މިނިސްޓްރީން ހާމަކުރި ގޮތުގައި، ރާއްޖޭގެ އުމްރާނީ ތަރައްޤީ ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، އިތުރު އިންވެސްޓްމަންޓްތައް ހޯދުމަށާއި، ފަންނީ އެހީތެރިކަން ފޯރުކޮށްދިނުމުގެ އިތުރުން ދާއިރާގެ ޤާބިލުކަން އިތުރުކުރުމަށް (ކެޕޭސިޓީ ބިލްޑިންގ) ގުޅިގެން މަސައްކަތް ކުރުމަށް ވަނީ އުންމީދު ކުރެވިފައެވެ.

މި މަޝްވަރާތަކަކީ ރާއްޖޭގެ ތިމާވެށްޓާ ރައްޓެހި ހަކަތައިގެ ސިޔާސަތުތައް ތަންފީޒުކުރުމަށާއި، ރައްޔިތުންނަށް ފޯރުކޮށްދޭ އަސާސީ ޚިދުމަތްތަކުގެ ފެންވަރު މަތިކުރުމަށް އެޅުނު މުހިންމު ފިޔަވަޅެކެވެ.