މާލެ އުތުރުފަރާތު ބޮޑުތަކުރުފާނު މަގާއި ޖެޓީތައް ތަރައްޤީކުރުމަށް އެ ސަރަހައްދުގައި ހުރި އުޅަނދުތަކާއި ތަކެތި ނަގަން އަންގައިފި

މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމަށާއި، އުތުރު ފަރާތު ބަނދަރުގެ ޖެޓީތައް ތަރައްޤީކުރުމުގެ ޢަމަލީ މަސައްކަތް ފެށުމަށްޓަކައި، އެ ސަރަހައްދުތަކުގައި ހުރި އުޅަނދުފަހަރާއި ތަކެތި ނެގުމަށް އަންގައިފިއެވެ.

މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން، ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް މަގު ހެދުމުގެ ޢަމަލީ މަސައްކަތް ފެށުމަށް މިނިސްޓްރީއިން އަންނަނީ ތައްޔާރުވަމުންނެވެ. އެހެންކަމުން، އެ ސަރަޙައްދުގެ މަގުމަތީގައި ބަހައްޓާފައިވާ އެންމެހައި ތަކެއްޗާއި، ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރު 03 އޮކްޓޫބަރު 2026 ވާ ހޮނިހިރު ދުވަހުގެ ރޭގަނޑު 11:00 ގެ ކުރިން ނެގުމަށް ވަނީ އަންގާފައެވެ.

މި މުއްދަތުގެ ފަހުން ނުނަގައި ހުންނަ ތަކެއްޗާއި އުޅަނދުފަހަރު މިނިސްޓްރީގެ ފަރާތުން ނަގާނެކަން މިނިސްޓްރީއިން ވަނީ ފާހަގަކޮށްފައެވެ.

މީގެއިތުރުން، މާލޭގެ އުތުރު ފަރާތު ބަނދަރު ބޭނުންކުރުމުގައި އާންމުންނަށާއި ދަތުރުވެރިންނަށް ދިމާވާ ދަތިތަކަށް ދާއިމީ ޙައްލެއް ހޯދައިދިނުމުގެ މަޤްޞަދުގައި، އެ ސަރަޙައްދުގެ ޖެޓީތައް ތަރައްޤީކުރުމުގެ ޢަމަލީ މަސައްކަތް ވެސް ފެށުމަށް މިނިސްޓްރީއިން ވަނީ ތައްޔާރުވެފައެވެ.

މި މަސައްކަތަށް މަގުފަހިކުރުމުގެ ގޮތުން، މަސްވެރިންގެ ޕާކު ސަރަޙައްދުން ފެށިގެން ނާދީ ގޯޅިއާ ހަމައަށް އަޅާފައިވާ އުޅަނދުފަހަރު، 02 އޮކްޓޫބަރު 2026 ވާ ހުކުރު ދުވަހުގެ ރޭގަނޑު 11:00 ގެ ކުރިން އެ ސަރަޙައްދުން ނެގުމަށް މިނިސްޓްރީން ވަނީ އިލްތިމާސްކޮށްފައެވެ.

އަދި ކަނޑައެޅިފައިވާ މުއްދަތު ހަމަވުމަށްފަހު، އެ ސަރަޙައްދުތަކުން ނުނަގައި ހުންނަ އުޅަނދުފަހަރު މިނިސްޓްރީން ނަގަމުން ގެންދާނެ ކަމަށްވެސް އަންގާފައިވެއެވެ.