ފުނަދޫ ސްކޫލުގެ ގްރޭޑް 3 ގެ ދަރިވަރުންނަށް ގޮނޑުދޮށުގެ ދިރުންތައް ދަސްކޮށްދިނުމުގެ ޚާއްޞަ ޙަރަކާތެއް ބާއްވައިފި

ށ. ފުނަދޫ ސްކޫލުގެ ގްރޭޑް 3 ގެ ދަރިވަރުންނަށް އަމާޒުކޮށްގެން، އެ ރަށުގެ ގޮނޑުދޮށާއި ފަޅުތެރޭގައިވާ ޤުދުރަތީ ދިރުންތައް ތަޖުރިބާކޮށް، ދަސްކުރުމުގެ ޝައުޤުވެރި ޙަރަކާތެއް (ޓައިޑް-ޕޫލް އެކްސްޕްލޮރޭޝަން) ކާމިޔާބުކަމާއެކު ބާއްވައިފިއެވެ.

މި ޙަރަކާތުގެ މައިގަނޑު މަޤްޞަދަކީ ކުދިން ޢަމަލީ މައިދާނުގައި ކަންކަން ތަޖުރިބާކޮށް، ދަރިވަރުންގެ ހިތްތަކުގައި ޤުދުރަތީ ވެށްޓަށް އޮންނަ ޝައުޤުވެރިކަމާއި ލޯބި އިތުރުކުރުމެވެ. މި ދަތުރުގެ ތެރެއިން ދަރިވަރުންނަށް ވަނީ ރަށުގެ ގޮނޑުދޮށުން ފެންނަ ތަފާތު ދިރުންތައް ގާތުން ބަލައިލުމުގެ ފުރުޞަތު ލިބިގެން ގޮސްފައެވެ.

މި ޙަރަކާތް ކާމިޔާބުކަމާއެކު ކުރިއަށް ގެންދިއުމުގައި ށ. ފުނަދޫ ކައުންސިލާއި، ފުނަދޫ ސްކޫލުގެ އިތުރުން ފުނަދޫ ޕޮލިސް ސްޓޭޝަނާއި ރީޖަނަލް އެއާޕޯޓްސްގެ ފަޔަރ އެންޑް ރެސްކިއު ޓީމުގެ ފަރާތުން ލިބުނު އަގުހުރި އެހީތެރިކަން މި ޙަރަކާތް އިންތިޒާމުކުރި ފަރާތުން ވަނީ ޝުކުރުވެރިކަމާއެކު ފާހަގަކޮށްފައެވެ.

އިންތިޒާމުކުރި ފަރާތުން އުއްމީދުކުރަނީ މިފަދަ ޢަމަލީ ތަޖުރިބާތަކުގެ ސަބަބުން ކުޑަކުދިންގެ ހިތްތަކުގައި ތިމާވެށްޓަށް ލޯބިޖެހި، ކުރިމަގުގައި ތިމާވެށި ޙިމާޔަތްކުރުމަށާއި ރައްކާތެރިކުރުމަށް މަސައްކަތްކުރާނެ ރަނގަޅު ޖީލެއް ބިނާވެގެންދިއުމެވެ.