ށ. ފަރުކޮޅު ހިމާޔަތްކޮށްފައިވާ ސަރަޙައްދު ސާފުކުރުމުގެ ކާމިޔާބު ހަރަކާތެއް ބާއްވައިފި

ށ. ފަރުކޮޅު ހިމާޔަތްކޮށްފައިވާ ސަރަޙައްދު (ޕްރޮޓެކްޓެޑް އޭރިއާ) ސާފުކުރުމުގެ ކާމިޔާބު ހަރަކާތެއް ށ. ފުނަދޫ ރައްޔިތުންގެ ބައިވެރިވުމާއެކު ބާއްވައިފިއެވެ.

މި ހަރަކާތަކީ މުޖުތަމަޢުގެ ބައިވެރިވުން އިތުރުކުރުމަށާއި، ރަށުގެ ޤުދުރަތީ ވެއްޓާއި ތިމާވެށި ރައްކާތެރިކޮށް ބެލެހެއްޓުމުގައި ރަށުގެ އެކި ފަރާތްތަކާއި ސްޓޭކްހޯލްޑަރުންގެ ދައުރު ފުޅާކޮށް، އެފަރާތްތައް ބާރުވެރިކުރުވުމުގެ މަޤްޞަދުގައި ކުރިއަށް ގެންދިޔަ ހަރަކާތެކެވެ.

މި އިވެންޓް އިންތިޒާމުކުރުމުގައި ށ. ފުނަދޫ ކައުންސިލުން ވެދެއްވި އެހީތެރިކަމަށާއި، ކުނި އެއްކުރުމަށް ބޭނުންވާ ކޮތަޅު ފޯރުކޮށްދީ ޕާޓްނަރެއްގެ ގޮތުގައި ބައިވެރިވި ޕާލޭ މޯލްޑިވްސްއަށް އިންތިޒާމުކުރި ފަރާތުން ވަނީ ޚާއްޞަ ޝުކުރެއް އަދާކޮށްފައެވެ. މީގެއިތުރުން، މި ހަރަކާތުގެ ތެރޭގައި ފުރަތަމަ އެހީގެ ޚިދުމަތް ފޯރުކޮށްދިން ށ. ފުނަދޫ ހޮސްޕިޓަލަށާއި، ބައިވެރިންގެ ރައްކާތެރިކަމާއި އަމާންކަން ކަށަވަރުކޮށްދިން ފުނަދޫ ޕޮލިސް ސްޓޭޝަނަށް ވެސް ވަނީ ޝުކުރު އަދާކޮށްފައެވެ.

މިފަދަ ގުޅިފައިވާ ހަރަކާތްތަކުގެ މައިގަނޑު އަމާޒަކީ އެންމެން ގުޅިގެން ރާއްޖޭގެ ޤުދުރަތީ ޚަޒާނާތަކާއި ތިމާވެށީގެ މުއްސަނދިކަން ރައްކާތެރިކުރުމަށް ކުރެވޭ މަސައްކަތްތައް އިތުރަށް ހަރުދަނާކުރުމެވެ