27 އިންޑޯކޮމްޕްލެކްސްގެ މަސައްކަތް ރާއްޖޭގެ އެކި ހިސާބުތަކުގައި ދަނީ ކުރިއަށް، މާލެ ސަރަހައްދުގެ ކޮމްޕްލެކްސްތަކުގެ މަސައްކަތް ވަރަށް އަވަހަށް ފަށަނީ!

ކުޅިވަރު ލާމަރުކަޒުކޮށް ރާއްޖޭގެ އެކި ކަންކޮޅުތަކުގައި ބޮޑެތި މުބާރާތްތައް ބޭއްވުމަކީ ސަރުކާރުގެ އަމާޒެއް ކަމަށާއި މިހާރުވެސް މުޅިރާއްޖޭގައި 27 އިންޑޯކޮމްޕްލެކްސްގެ މަސައްކަތް ކުރިއަށްދާ ކަމަށް ޒުވާނުން ބާރުވެރިކުރުމާއި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

"އަހާ" ފޯރަމުގައި ބައެއް އާއްމުން ކުރި ސުވާލުތަކަށް ޖަވާބުދެއްވަމުން މި ވުޒާރާގެ ވަޒީރުގެ ވިދާޅުވީ، އިންޑޯކޮމްޕްލެކްސްތަކެއްގެ ބޭނުމަކީ އިންޑޯގައި ކުޅޭ ކުޅިވަރުތައް ގަޑިތަކަށް ބަހާލައިގެން މުބާރާތްތައް ފަސޭހަކަމާއެކު ގެންދިއުން ކަމަށެވެ.

"ވަރަށް ދުވަސްވެއްޖެ ރާއްޖޭގަވެސް އަދި މާލެ ސަރަހައްދުގައިވެސް 33 އަހަރުވީއރުގައިވެސް އަޅުގަނޑުމެންގެ އެންމެ މަލްޓީސްޕޯޓް އިންޑޯ ކޮމްޕްލެކްސްއެއް އެންމެ ސްޓޭޑިއަމްއެއް މި އިންނަނީ އެއީ ސޯޝަލް ސެންޓަރ. މިހާރު އިރާދަކުރެއްވިއްޔާ ދާދި އަވަހަށް ފޭސް 2 ގައި އިންޑޯކޮމްޕްލެކްސްގެ މަސައްކަތް ފަށާނަން." ވަޒީރު ރާފިއު ވިދާޅުވިއެވެ.

ވަޒީރު ވިދާޅުވީ، ދާދި އަވަހަށް ހުޅުމާލެ ފޭސް 2ގައި އިންޑޯ ކޮމްޕްލެކްސްއެއްގެ މަސައްކަތް ފަށާނެ ކަމަށާއި، އޭގެ އިތުރުން ހުޅުމާލެ ފޭސް 1 އަދި ވިލިމާލޭގައި ވެސް އިންޑޯ ފެސިލިޓީތަކެއް އަޅަން ނިންމާފައިވާ ކަމަށެވެ.

ވަޒީރު ވިދާޅުވީ، ސަރުކާރުން އިންޑޯ ކޮމްޕްލެކްސްތަކެއް އެޅުމުގެ މަސައްކަތް ކުރަމުން އަންނަ ކަމަށާއި، މިއީ އެތުލީޓުންނަށް ތަފާތު ސްޓޭޑިއަމްތަކުގައި ވާދަކޮށް ސްޓޭޑިއަމް ތަޖުރިބާ ކުރުމުގެ މަގުސަދުގައި އެޅޭ ކޯޓުތަކެއް ކަމަށެވެ.

އެގޮތުން ކޮންމެ ކުޅިވަރު ކޮމްޕްލެކްސްގައި ކުޅުންތެރިން ފިޓްކޮށް ތިބުން މަގުފަހިވާނެ ހުރިހާ އިންތިޒާމެއް ހަމަޖެހިފައި ހުންނާނެ ކަމަށާއި، އަދި މިއީ ކުދިބޮޑު އެންމެންނަށް ބޭނުންކުރެވޭނެ ގޮތަށް ކުރިއަށްދާނެ މުހިންމު ކޮމްޕްލެކްސްތަކެއް ކަމަށެވެ.