އިޤުތިޞާދީ ވަޒީރު ސަޢީދު އޯގާ ސްޓޫޑިއޯ އަށް ޒިޔާރަތްކުރައްވައިފި

އިޤްތިޞާދީތަރައްޤީ އާއި ވިޔަފާރިޔާބެހޭ ވަޒީރު މުޙައްމަދު ސަޢީދު އޯގާ ސްޓޫޑިއޯ އަށް ޒިޔާރަތްކުރައްވައި، އޯގާގެ އުފެއްދުންތައް ބައްލަވާލައްވައިފިއެވެ. މި ޒިޔާރަތުގައި ވަޒީރު ސަޢީދު ވަނީ އޯގާ ސްޓޫޑިއޯގެ އިސްވެރިންނާ ބައްދަލުކުރައްވައި، އުފެއްދުންތެރިކަމުގެ ދާއިރާގައި ހުރި ގޮންޖެހުންތަކާއި ގުޅޭގޮތުން މަޝްވަރާކުރައްވާފައެވެ.

އޯގާ ސްޓޫޑިއޯގެ އިސްވެރިޔާ އަޒޫ މި ބައްދަލުވުމުގައި ވިޔަފާރިއަށް ދިމާވެފައިވާ ގޮންޖެހުންތަކާއި ދަތިތައް ހިއްސާކުރެއްވިއެވެ. އެގޮތުން އުފެއްދުންތަކަށް ބޭނުންވާ ބައެއް ރޯ މެޓީރިއަލްސް ރާއްޖެއިން ނުލިބޭތީ، އެތަކެތި ބޭރުން އެތެރެކުރަންޖެހޭކަމަށާއި، މިކަމުގެ ސަބަބުން އުފެއްދުންތަކުގެ އަގު ބޮޑުވާކަން ފާހަގަކުރެއްވިއެވެ. އަދި ވިޔަފާރި ތަރައްޤީކުރުމަށް ޖާގައިގެ ދަތިކަމާއި، އެހެނިހެން ގޮންޖެހުންތައްވެސް ހުރިކަން ފާހަގަކުރެއްވިއެވެ.

އޯގާ ސްޓޫޑިއޯގެ އުފެއްދުންތައް ގަތުމަށް ޝައުޤުވެރިވާ ބޭރުގެ ފަރާތްތައް އެބަތިބިކަމާއި، ނަމަވެސް އެ ފަރާތްތަކަށް އެކަށީގެންވާ އަގެއްގައި އަދި ފަސޭހަކަމާއެކު ތަކެތި ޝިޕްކުރުމުގެ ދަތިތަކެއް ހުރިކަމަށާއި މި ކަންކަމަކީ އުފެއްދުންތައް ވިއްކުމުގައި ހުރި ދަތިތަކެއް ކަމުގައި ފާހަގަކުރެއްވިއެވެ.

ކަންބޮޑުވުންތައް އަޑުއައްސަވައި ވަޒީރު ސައީދު ވިދާޅުވީ، މި ދަތިތައް ހައްލުކުރުމަށްޓަކައި ކުދި ވިޔަފާރިތަކުން ތަކެތި އުފެއްދުމަށް އެތެރެކުރަންޖެހޭ ރޯމެޓީރިއަލްސްތަކުގެ ޑިއުޓީ ކުޑަކޮށްދެވޭނެ ގޮތްތައް ބައްލަވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅާއެކު، އެކަމަށް މަސައްކަތްކުރައްވާނެ ކަމަށެވެ. މީގެ މަޤްޞަދަކީ ދިވެހިއުފެއްދުންތަކަށް ބޭރުގެ އުފެއްދުންތަކާ ވާދަކުރުމުގެ ޤާބިލުކަން އިތުރުކޮށްދިނުން ކަމުގައި ވަޒީރު ވިދާޅުވިއެވެ.

ވިޔަފާރި އިތުރަށް ކުރިއަރުވައި ތަރައްޤީކުރުމަށް ކުރެވިދާނެ ކަންކަމާ ގުޅޭގޮތުން ވަޒީރު އިރުޝާދު ދެއްވައި، އިޤްތިޞާދީ ވުޒާރާއަށް މިކަމުގައި އެހީތެރިވެވިދާނެ ގޮތްތަކާ ބެހޭގޮތުން މަޢުލޫމާތު ސާފުކުރެއްވިއެވެ.

ވަޒީރު އިތުރަށް ވިދާޅުވީ، ކުރިއަށް އޮތްތަނުގައި މިނިވަން ވިޔަފާރީގެ އެއްބަސްވުންތައް ތަންފީޒުވެގެންދާއިރު، ދިވެހި އުފެއްދުންތައް ބޭރުގެ ބާޒާރުތަކުގައި ވިއްކުމަށް އިތުރު ފުރުޞަތުތަކެއް ހުޅުވިގެންދާނެ ކަމަށެވެ. ޚާއްޞަކޮށް އަންނަ މަހު ތަންފީޒުކުރުމަށް ތައްޔާރުވަމުންދާ ޗައިނާ އެފްޓީއޭގެ ބޭނުން އެންމެ ފުރިހަމަ ގޮތުގައި ހިފުމަށް ކުރެވިދާނެ ކަންކަމާ ގުޅޭގޮތުން މަޝްވަރާކުރެވުނެވެ.

ވަޒީރު ސައީދު ވިދާޅުވީ، ދިވެހި އުފެއްދުންތައް ޕްރޮމޯޓްކުރުމަށް އިޤުތިޞާދީ ވުޒާރާއިން ޚާއްޞަ ޕްރޮގްރާމްތަކެއް ރޭވެމުންދާ ކަމަށެވެ. މި ޕްރޮގްރާމްތަކުގެ ތަފްޞީލު ޙިއްޞާކުރައްވަމުން، އޯގާ ސްޓޫޑިއޯއިން މި ޕްރޮގްރާމްތަކުގައި ބައިވެރިވުމަށް ވަޒީރު ދަޢުވަތު ދެއްވިއެވެ. މިފަދަ ޕްރޮގްރާމްތަކުގެ ސަބަބުން ދިވެހި އުފެއްދުންތަކަށް އިތުރު ފުރުޞަތުތަކެއް ހުޅުވިގެންދާނެ ކަމަށް ވަޒީރު ފާހަގަކުރެއްވިއެވެ.

އަދި ދިވެހި އުފެއްދުންތަކަށް ބައިނަލްއަޤްވާމީ ފެންވަރުގެ ރައްކާތެރިކަން ހޯދައިދިނުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުވާލައްވަމުން ވަޒީރު ވިދާޅުވީ، އިންޓެލެކްޗުއަލް ޕްރޮޕަޓީ (އައިޕީ) ޤާނޫނުތައް އިޞްލާޙުކުރުމުގެ މަސައްކަތް ކުރިއަށްދާ ކަމަށެވެ. މި ޤާނޫނުތަކުގެ ސަބަބުން ދިވެހި އުފެއްދުންތަކަށް ބޭރުގެ ބާޒާރުތަކުގައި އިތުރު ރައްކާތެރިކަމެއް ލިބިގެންދާނެ ކަން ވަޒީރު ފާހަގަކުރެއްވިއެވެ.

2019 ވަނަ އަހަރު އައިއެސްއޯ ސެޓްފިކެޓް ހޯދާފައިވާ އޯގާ ބްރޭންޑަކީ އާޓިސްޓްރީގެ ދަށުން އުފެދުނު ބްރޭންޑެކެވެ. މައިގަނޑު ގޮތެއްގައި އެ ބޭފުޅުން އިސްކަންދެއްވަނީ ސައިބޯނި ،އުއްބައްތި ، މީރުވަސްދުވާ ހިލަ އުފެއްދުމާއި އަދި ސައިބޯނި އުފެއްދުމުގެ ކްލާސްތައް ހިންގުމަށެވެ.

މި ބްރޭންޑުގެ މަޤްޞަދަކީ، އަތުން އުފައްދާ ރަނގަޅު ފެންވަރުގެ، ފުރިހަމަ އަދި ތިމާވެއްޓާ ރައްޓެހި ރީތިވުމަށް ބޭނުންކުރާ ބާވަތްތައް (ކޮސްމެޓިކްސް) ފޯރުކޮށްދިނުމެވެ. އޯގާގެ ހުރިހާ ސައިބޯނި އަދި އެހެނިހެން އުފެއްދުންތަކަކީ، ޞިއްޙަތަށް ގެއްލުން ހުރި ކެމިކަލްއެއް ކަމަށްވާ، އެސްއެލްއެސް އަދި ޕެރަބެން ނުހިމެނޭ އުފެއްދުންތަކެކެވެ. މި އުފެއްދުންތަކުގައި ބޭނުންކޮށްފައިވަނީ ހަމުގެ ދުޅަހެޔޮކަމަށް އެދެވޭ ނަތީޖާއެއް ޙާޞިލުކޮށްދޭ މާއްދާތަކެވެ.

އޯގާގެ ކޮންމެ އުފެއްދުމެއްގައިވެސް އެ ފަރާތުން މަސައްކަތްކުރަނީ ދިވެހި ކާށި ތެޔޮ، ތަމަނު ތެޔޮ، ފަޅޯ ފަދަ މޭވާތައް ނުވަތަ މުރަނގަ އަދި ހިތިގަހުގެ ފަތް ފަދަ ރާއްޖޭގެ އުފެއްދުންތައް ބޭނުންކޮށްގެން ޤުދުރަތީ މާއްދާތައް ހިމެނުމަށެވެ. މީގެ އިތުރުން، އޯގާއިން މި ތަކެތި ބަންދު ކުރުމަށް ބޭނުންކުރަނީ ޕްލާސްޓިކު ނުހިމެނޭ ބާވަތްތަކެވެ. މިކަމުގެ ސަބަބުން އޯގާއަކީ ރާއްޖޭގެ ފުރަތަމަ ދެމެހެއްޓެނިވި އަދި ތިމާވެއްޓާ ރައްޓެހި، އަތުން ތައްޔާރުކުރާ، ފެންވެރުމަށާއި ޒީނަތްރެތިވުމަށް ބޭނުންކުރާ ތަކެތި އުފައްދާ ބްރޭންޑަށް ވަނީ ވެފައިވެއެވެ.