މޫސުމީ މާލިއްޔަތާއި ދެމެހެއްޓެނިވި ތަރައްޤީގެ ދާއިރާއިން ޚާއްޞަ ޕޯސްޓްގްރެޖުއޭޓް ސްކޮލަރޝިޕްތަކެއް މިނިސްޓްރީން ދީފި

މޫސުމީ މާލިއްޔަތާއި (ކްލައިމެޓް ފައިނޭންސް)، ދެމެހެއްޓެނިވި ތަރައްޤީ އަދި ފެނުގެ ދާއިރާއިން ރާއްޖެއަށް ބޭނުންވާ ޚާއްޞަ ފަންނީ ޤާބިލުކަން އިތުރުކުރުމުގެ މަޤްޞަދުގައި، މިނިސްޓްރީން ޕޯސްޓްގްރެޖުއޭޓް ސްކޮލަރޝިޕްތަކެއް ދީފިއެވެ.

މި ސްކޮލަރޝިޕްތަކަކީ ގްރީން ކްލައިމެޓް ފަންޑް (ޖީ.ސީ.އެފް) ގެ މާލީ އެހީތެރިކަމާއެކު، އަދި ޖަރުމަނުގެ ޖީ.އައި.ޒެޑް (GIZ) ގެ ފަންނީ އެހީތެރިކަމާއެކު ކުރިއަށްގެންދާ "ޖީ.ސީ.އެފް ރެޑިނަސް ޕްރޮޖެކްޓް" ގެ ދަށުން ފޯރުކޮށްދީފައިވާ ފުރުޞަތުތަކެކެވެ.

މި ޕްރޮގްރާމުގެ މައިގަނޑު ބޭނުމަކީ ތިމާވެއްޓަށް އަންނަ ބަދަލުތަކާ ގުޅިގެން ކުރިމަތިވާ ގޮންޖެހުންތަކުން އަރައިގަތުމަށް ބޭނުންވާ މާލީ އެހީ ހޯދުމުގެ ހުނަރާއި، ދެމެހެއްޓެނިވި ގޮތެއްގައި ޤައުމު ތަރައްޤީކުރުމަށާއި، އަދި ރައްކާތެރި ފެނުގެ ވަސީލަތްތައް ބެލެހެއްޓުމަށް ބޭނުންވާ މަތީ ފަންތީގެ ތަޢުލީމާއި ތަމްރީނު ދިވެހި ޒުވާނުންނަށާއި ފަންނީ މުވައްޒަފުންނަށް ފޯރުކޮށްދިނުމެވެ.

މި ސްކޮލަރޝިޕްތަކުގެ ސަބަބުން، މޫސުމީ ބަދަލުތަކުން އަރައިގަތުމަށް ރާއްޖެއިން ކުރަމުންދާ މަސައްކަތްތަކަށް ބޭނުންވާ މުހިންމު ދާއިރާތަކުން މީހުން ބިނާކުރެވި، ޤައުމީ ފެންވަރުގައި މި ދާއިރާތަކުގެ މަސައްކަތްތައް އިތުރަށް ހަރުދަނާވެގެންދާނެ ކަމަށް މިނިސްޓްރީން މަޢުލޫމާތުދެއެވެ. ޖީ.ސީ.އެފް ރެޑިނަސް ޕްރޮޖެކްޓަކީ ބައިނަލްއަޤްވާމީ ފެންވަރުގައި ތިމާވެށީގެ ދާއިރާއިން ލިބެންހުރި ފުރުޞަތުތަކުގެ ބޭނުން އެންމެ ފުރިހަމަ ގޮތުގައި ހިފުމަށް ޤައުމުތަކުގެ ޤާބިލުކަން އިތުރުކުރުމަށް އެހީތެރިވެދޭ މުހިންމު މަޝްރޫޢެކެވެ.