ޣާޒީ ސްކޫލުގައި "ވިލުންވެށި" ޕްރޮގްރާމުގެ ދަށުން ދަނޑުވެރިކަމުގެ އައު ހުނަރުތައް ދަސްކޮށްދޭން ފަށައިފި

މޫސުމަށް އަންނަ ބަދަލުތަކަށް ހޭނުމާއި ކާބޯތަކެތީގެ ރައްކާތެރިކަން ކަށަވަރުކުރުމަށް ކުރިއަށްގެންދާ "އެންހޭންސިންގ ކްލައިމެޓް ރެޒިލިއަންސް އެންޑް ފުޑް ސެކިއުރިޓީ" (އީ.ސީ.އާރް.އެފް.އެސް) މަޝްރޫޢުގެ ދަށުން، ޣާޒީ ސްކޫލުގެ ދަރިވަރުންނާއި މުވައްޒަފުންނަށް ޚާއްޞަކޮށްގެން "ވިލުންވެށި" ސްކޫލް ގާޑަން ޕްރޮގްރާމް ފަށައިފިއެވެ.

މި ޕްރޮގްރާމުގެ މައިގަނޑު މަޤްޞަދަކީ ދަރިވަރުންނާއި މުވައްޒަފުންނަށް ކާބޯތަކެތި ހެއްދުމުގެ އައު ގޮތްތައް ދަސްކޮށްދީ، ސްކޫލުގެ ބަގީޗާއަކީ އުނގެނުމަށާއި ނަފްސާނީ ދުޅަހެޔޮކަމަށް އެކަށޭނަ ދިރުންހުރި މާޙައުލަކަށް ހެދުމެވެ. މި ޙަރަކާތްތައް ކުރިއަށް ގެންދަނީ އަމަލީ ތަޖުރިބާ ލިބޭނޭ ފަދަ ތަމްރީނުތަކާ އެކުގައެވެ.

މި ތަމްރީނުތަކުގެ ތެރެއިން މޭވާ އަޅާ ގަސްގަހާގެއްސާއި ހަވާދުގެ ބާވަތްތައް ހައްދައި ބަލަހައްޓާނެ ގޮތްތައް ދަރިވަރުންނަށް ދަސްކޮށްދެއެވެ. މީގެ އިތުރުން، ސައި ތައްޔާރުކުރުމަށް ބޭނުންކުރެވިދާނެ މާ އަޅާ ގަސްތައް ދެނެގަނެ، އެފަދަ ގަސްގަހާގެހި އީޖާދީ އަދި ދެމެހެއްޓެނިވި ގޮތެއްގައި ބޭނުންކުރާނެ ގޮތުގެ ޢަމަލީ ތަޖުރިބާ ވެސް ދަރިވަރުންނަށް އަންނަނީ ފޯރުކޮށްދެމުންނެވެ.

ޢަމަލީ ގޮތުން މަސައްކަތް ކުރުމުގެ ފުރުޞަތު ލިބުމުން ދަރިވަރުންގެ މެދުގައި ވަނީ ބޮޑު ޝައުޤުވެރިކަމެއް އުފެދިފައެވެ. މިގޮތުން ގަސްއިންދުމުގެ އައު އުކުޅުތައް ދަސްކުރުމުގެ އިތުރުން، އެކުދިން އަމިއްލައަށް ހައްދާ ތަކެތި ދުވަހުން ދުވަހުގެ ދިރިއުޅުމުގެ ބައެއްގެ ގޮތުގައި ބޭނުންކުރެވޭނެ ގޮތްތައް ދަރިވަރުންނަށް ފެނިގެންދެއެވެ.

އީ.ސީ.އާރް.އެފް.އެސް ޕްރޮޖެކްޓުގެ ފަންނީ އެހީތެރިކަމާއެކު، ޣާޒީ ސްކޫލުގެ މި ބަގީޗާ ވެގެންދާނީ ފައިދާހުރި ބޭރުގެ ކްލާސްރޫމަކަށެވެ. މިއީ މޫސުމާ ރައްޓެހި ގޮތުގައި ދަނޑުވެރިކަން ކުރުމާއި، ޞިއްޙަތަށް ފައިދާހުރި ކާބޯތަކެތި ޚިޔާރުކުރުމުގެ އިތުރުން ތިމާވެއްޓަށް އަހުލުވެރިކަން އިތުރުކޮށްދީ، ދަރިވަރުންނަށް މުހިންމު ޢަމަލީ ހުނަރުތަކެއް ދަސްކޮށްދޭނެ މުހިންމު މަސައްކަތެކެވެ.