5 މިލިއަން ގަސް އިންދުމުގެ މަޝްރުޢޫގެ ދަށުން ހއ. ދިއްދޫގައި ގަސް އިންދުމުގެ ޚާއްޞަ ހަރަކާތެއް ބާއްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙު ކޮށްދެއްވާފައިވާ "5 މިލިއަން ގަސް އިންދުމުގެ މަޝްރުޢޫ" ގެ ދަށުން، ހއ. ދިއްދޫގައި ގަސް އިންދުމުގެ ޚާއްޞަ ހަރަކާތެއް ބާއްވައިފިއެވެ.
މި ހަރަކާތަކީ މޫސުމީ ބަދަލުތަކާއި، ތިމާވެށްޓާއި ހަކަތައާ ބެހޭ މިނިސްޓްރީއާއި، ހއ. ދިއްދޫ "ކުރިމަގު" ޖަމިއްޔާގެ އިތުރުން އެ ރަށު ކައުންސިލް އިދާރާ އާއި ކަމާގުޅޭ އެހެނިހެން ފަރާތްތަކާ ގުޅިގެން ކުރިއަށްގެންދިޔަ ހަރަކާތެކެވެ. މި ހަރަކާތް ދިއްދޫގައި ކުރިއަށް ގެންގޮސްފައިވަނީ ރަށުގެ ތިމާވެށި ރައްކާތެރިކުރުމަށާއި، ފެހިކަން އިތުރުކުރުމުގެ މަޤްޞަދުގައެވެ.
މި މަޝްރުޢޫގެ ދަށުން ދިއްދޫގެ އެކި ސަރަޙައްދުތަކުގައި ގިނަ އަދަދެއްގެ ގަސް ވަނީ އިންދާފައެވެ. މީގެ ތެރޭގައި ރަށުގެ މާޙައުލާ ގުޅޭ ތަފާތު ބާވަތްތަކުގެ ގަސްތައް ހިމެނެއެވެ. މި ހަރަކާތުގައި ދިއްދޫގެ މުއައްސަސާތަކުގެ މުވައްޒަފުންނާއި، ޖަމިއްޔާގެ މެންބަރުންގެ އިތުރުން ގިނަ އަދަދެއްގެ ޢާންމު ރައްޔިތުން ވަނީ ބައިވެރިވެފައެވެ.
5 މިލިއަން ގަސް އިންދުމުގެ މި ބިޔަ މަޝްރުޢޫއަކީ ރާއްޖޭގެ ތިމާވެށި ހިމާޔަތްކުރުމަށާއި، ދުނިޔެ ހޫނުވުމުގެ މައްސަލައަށް ޙައްލެއް ހޯދުމަށް ސަރުކާރުން ފައްޓަވާފައިވާ މުހިންމު މަސައްކަތެކެވެ. މި މަޝްރުޢޫގެ ދަށުން ރާއްޖޭގެ މީހުން ދިރިއުޅޭ ހުރިހާ ރަށެއްގައާއި ރިސޯޓުތަކުގައި ގަސް އިންދުމަށް ވަނީ ރޭވިފައެވެ.
މިފަދަ ހަރަކާތްތަކުގެ ސަބަބުން ރަށްރަށުގެ ފެހިކަން އިތުރުވެ، މޫސުމީ ބަދަލުތަކުން ލިބޭ ގެއްލުންތައް ކުޑަކުރުމަށް ބޮޑު އެހީތެރިކަމެއް ލިބިގެންދާނެ ކަމަށް މިނިސްޓްރީން މަޢުލޫމާތު ދެއެވެ.