މިނިސްޓްރީ އޮފް އެންވަޔަރަންމަންޓުން ދ. ރިނބުދޫ ކައުންސިލާ ބައްދަލުކޮށް ތަރައްޤީގެ މަޝްރޫޢުތަކާ ގުޅޭގޮތުން މަޝްވަރާކޮށްފި

މިނިސްޓަރު އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ އޮނަރަބަލް ޢަލީ ޝަރީފު ދ. ރިނބުދޫ ކައުންސިލާ ބައްދަލުކުރައްވައި، އެ ރަށުގައި ކުރިއަށްދާ މަޝްރޫޢުތަކާއި ކުރިމަތިވެފައިވާ ގޮންޖެހުންތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވައިފިއެވެ.

މި ބައްދަލުވުން ބާއްވާފައިވަނީ ރިނބުދޫގެ ތަރައްޤީއަށް މިނިސްޓްރީން ކުރިއަށްގެންދާ މަސައްކަތްތަކުގެ ފަހުގެ މަޢުލޫމާތު ހިއްސާކުރުމަށާއި، ރަށުގެ މުސްތަޤުބަލަށް ރޭވިފައިވާ ކަންކަމާ ގުޅޭގޮތުން ޚިޔާލު ބަދަލުކުރުމަށެވެ. މިގޮތުން، ރަށަށް މިވަގުތު އެންމެ ބޭނުންޖެހިފައިވާ ތިމާވެށީގެ މައްސަލަތަކާއި، ހަކަތައިގެ ދާއިރާއިން ކުރެވިދާނެ ކަންކަމާ ބެހޭގޮތުން ދެ ފަރާތުން ވަނީ މަޝްވަރާކޮށްފައެވެ.

މި ބައްދަލުވުމުގައި ކައުންސިލްގެ ފަރާތުން ވަނީ ރަށުގެ ރައްޔިތުންގެ ހުރި ކަންބޮޑުވުންތަކާއި، ތަރައްޤީގެ މަޝްރޫޢުތައް ބާރުމިނުގައި ކުރިއަށް ގެންދިއުމުގެ މުހިންމުކަން ފާހަގަކޮށްފައެވެ. މިނިސްޓްރީގެ ފަރާތުން ވިދާޅުވީ، ރިނބުދޫގެ ދެމެހެއްޓެނިވި ތަރައްޤީއަށް ކުރެވޭ މަސައްކަތްތަކުގައި ކައުންސިލާ ގާތުން މަސައްކަތްކުރައްވާނެ ކަމަށާއި، މިހާރު ހުރި ދަތިތަކަށް ޙައްލު ހޯއްދަވައިދެއްވުމަށް އިސްކަންދެއްވާނެ ކަމަށެވެ.

ބައްދަލުވުން ނިންމާލާފައިވަނީ، ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމަށްޓަކައި، ކުރިއަށް އޮތް ތަނުގައިވެސް މިނިސްޓްރީއާއި ކައުންސިލާ ދެމެދު އޮންނަ ގުޅުން އިތުރަށް ބަދަހިކޮށް، ގުޅިގެން މަސައްކަތް ކުރުމުގެ ޔަޤީންކަން ދެމުންނެވެ.