އެމް.އެމް.އޭ އަށް 45 އަހަރު ފުރޭއިރު، އިގްތިސާދީ ކުރިއެރުމަށް އަގުހުރި ހިދުމަތްތަކެއް ކޮށްދިން: މާލީ ވަޒީރު

މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އަށް 45 އަހަރު ފުރުން ފާހަގަކުރާއިރު، އެ އިދާރާއިން ރާއްޖޭގެ އިގްތިސާދީ ކުރިއެރުމަށް ކޮށްދީފައިވާ އަގުހުރި ހިދުމަތްތަކުގެ އަގު މާލީ ވަޒީރު ހަސަން ޒަރީރު ވަޒަންކުރައްވައިފިއެވެ.

މާލީ ވަޒީރު ހަސަން ޒަރީރު މިކަން ފާހަގަކުރެއްވީ، އެމް.އެމް.އޭ އިން އިންތިޒާމުކޮށްގެން އަލަށް ތައާރަފުކުރި މޯލްޑިވްސް ފައިނޭންޝަލް ސެކްޓަރ އެވޯޑް ދިނުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

ވަޒީރުގެ ވާހަކަފުޅުގައި، ފާއިތުވި 45 އަހަރު ދުވަހުގެ ތެރޭގައި އެމް.އެމް.އޭ އިން ދައްކުވައިދީފައިވަނީ އެ މުއައްސަސާގެ ތަޖުރިބާއާއި، މުއައްސަސާއެއްގެ ގޮތުގައި ތަރައްގީވެފައިވާ މިންވަރުގެ އިތުރުން ރައްޔިތުންގެ އިތުބާރު ހޯދާފައިވާ މިންވަރު ކަމުގައި ފާހަގަކުރެއްވިއެވެ.

ރާއްޖޭގެ މާލީ ދާއިރާ ހަރުދަނާކުރުމަށާއި މަނިޓަރީ ނިޒާމު ތަރައްގީކުރުމުގައި އެމް.އެމް.އޭ އިން އަދާކުރާ ދައުރަށް ވަޒީރު އަލިއަޅުއްވާލެއްވިއެވެ. އަދި މާލީ ހިދުމަތްތައް ފުޅާކުރުމާއި، ޑިޖިޓަލް ވަސީލަތްތައް ބޭނުންކުރަން ފެށުމުގައި އެ އިދާރާއިން ވެދީފައިވާ އެހީތެރިކަންވެސް ފާހަގަކުރެއްވިއެވެ. މީގެއިތުރުން، އެމް.އެމް.އޭގެ މަނިޓަރީ ޕޮލިސީގެ ޒިންމާތަކުގެ ސަބަބުން، އިގްތިސާދަށް އޮންނަ އާންމުންނާއި އިންވެސްޓަރުންގެ އިތުބާރު ދެމެހެއްޓުމަށް މަގުފަހިވާކަން އެމަނިކުފާނު ފާހަގަކުރެއްވިއެވެ.

މިނިސްޓަރ ޒަރީރު ސިފަކުރެއްވި ގޮތުގައި، މޯލްޑިވްސް ފައިނޭންޝަލް ސެކްޓަރ އެވޯޑްސް ތައާރަފުކުރުމަކީ މާލީ ސިނާއަތަށް ލިބުނު ބޮޑު ކުރިއެރުމެކެވެ.

"މި ފަދަ އެވޯޑުތަކުގެ ސަބަބުން މާލީ ދާއިރާގެ ޚިދުމަތުގެ ފެންވަރު އިތުރަށް މަތިކުރުމަށާއި، ޚިދުމަތްތައް ފަސޭހައިން ލިބޭނެ ގޮތް ހަމަޖެއްސުމަށް ބާރު އެޅިގެންދާނެ ކަމަށް އަޅުގަނޑު ގަބޫލުކުރަން" މާލީ ވަޒީރު ވިދާޅުވިއެވެ.

މި އެވޯޑްތަކުގެ ސަބަބުން މާލީ އިދާރާތަކުން ދޭ ހިދުމަތުގެ ފެންވަރު ރަނގަޅުކުރުމަށާއި، ރައްޔިތުންނަށް ފަސޭހައިން ހިދުމަތް ލިބޭނެ މަގުތައް ފަހިކުރުމަށް ހިތްވަރު ލިބިގެންދާނެ ކަމަށްވެސް އެމަނިކުފާނު ވިދާޅުވިއެވެ. އެވޯޑް ހާސިލުކުރި ފަރާތްތަކަށާއި ނޮމިނޭޓްވި ފަރާތްތަކަށް މަރުހަބާ ދަންނަވައި، "ޑިސްޓިންގުއިޝްޑް ކޮންޓްރިބިއުޝަން ޓު ދަ ފައިނޭންޝަލް ސެކްޓަރ" ކެޓަގަރީން ހޮވުނު ފަރާތްތަކަށް މިނިސްޓަރު ޝުކުރު އަދާކުރެއްވިއެވެ.

ވަކިން ހާއްސަކޮށް، އެމް.އެމް.އޭގެ ފުރަތަމަ ގަވަރުނަރުގެ މަގާމު ފުރުއްވި ކުރީގެ ރައީސް އަލްއުސްތާޛު މައުމޫން އަބްދުލްގައްޔޫމް މި ދާއިރާއަށް ކޮށްދެއްވި ހިދުމަތްތަކަށް ވަޒީރު ތައުރީފު ކުރެއްވިއެވެ. މަރުކަޒީ ބޭންކު އުފެއްދެވުމުގައާއި، ބޭންކް އޮފް މޯލްޑިވްސް އަދި އެލައިޑް އިންޝުއަރެންސް އުފެއްދެވުމުގައި އެމަނިކުފާނު އަދާކުރެއްވި މުހިންމު ދައުރު މިނިސްޓަރު ފާހަގަކުރެއްވިއެވެ.

"މިއަދު އަޅުގަނޑުމެން މި ފާހަގަކުރާ މާލީ ސިނާއަތުގެ ކާމިޔާބީތަކަކީ ދުރުވިސްނުމާއި، އިޚްލާޞްތެރި ޚިދުމަތްތަކެއްގެ ނަތީޖާ. ސަރުކާރާއި ދިވެހި ރައްޔިތުންގެ ނަމުގައި، މާލީ ދާއިރާ ބިނާކުރުމަށް މަސައްކަތްކުރެއްވި އެންމެހައި ބޭފުޅުންނަށް އިޚްލާޞްތެރި ޝުކުރު ދަންނަވަން،" ވަޒީރު ވިދާޅުވިއެވެ.

މީގެއިތުރުން، އެމް.އެމް.އޭގެ ކުރީގެ ގަވަރުނަރުންނާއި އިސްވެރިންނަށާއި، މިހާރުގެ ގަވަރުނަރު އަހުމަދު މުނައްވަރަށާއި، ޑެޕިއުޓީ ގަވަރުނަރަށާއި، ބޯޑު މެންބަރުންގެ އިތުރުން އެ މުއައްސަސާގެ ކުރީގެ އަދި މިހާރުގެ މުވައްޒަފުންނަށްވެސް ވަޒީރު ޝުކުރު އަދާކުރެއްވިއެވެ.

ވަޒީރުގެ ވާހަކަފުޅު ނިންމަވާލެއްވީ، މި އެވޯޑްތަކަކީ ރައްޔިތުންގެ އިތުބާރު ލިބިފައިވާ އަދި ރާއްޖޭގެ އިގްތިސާދީ މުސްތަގުބަލަށް އެހީތެރިވެދޭ މާލީ ނިޒާމެއް ބިނާކުރުމަށް މުއައްސަސާތަކަށާއި ފަންނީ ބޭފުޅުންނަށް ލިބޭ ހިތްވަރަކަށް ވާނެ ކަމަށް އުންމީދު ކުރައްވާ ކަމަށް ވިދާޅުވަމުންނެވެ. އަދި އެމް.އެމް.އޭ އާއި، ރާއްޖޭގެ އިގްތިސާދާއި މާލީ ދާއިރާއަށް އިތުރު ކުރިއެރުމާއި ފާގަތިކަމަށް އެދިވަޑައިގަންނަވަމުންނެވެ.