ދެކުނު އަރިއަތޮޅުގެ ހިމާޔަތްކޮށްފައިވާ ސަރަޙައްދުގައި އުޅަނދުފަހަރު ދުއްވޭނެ ދުވެލިތައް ކަނޑައަޅައިފި

އަރިއަތޮޅު ދެކުނުބުރީގައިވާ "ސައުތު އަރި މެރިން ޕްރޮޓެކްޓެޑް އޭރިއާ" (SAMPA) ބެލެހެއްޓުމަށް އެކުލަވާލާފައިވާ މެނޭޖްމަންޓް ޕްލޭންގެ ދަށުން، އެ ސަރަޙައްދުގައި ދަތުރުކުރާ އުޅަނދުފަހަރު ދުއްވަންޖެހޭ ވަކި ދުވެލިތަކެއް ކަނޑައަޅައި، އެކަމަށް އަމަލުކުރަން ފަށައިފިއެވެ.

މި މެނޭޖްމަންޓް ޕްލޭނަކީ SAMPA ސަރަޙައްދުގެ ގުދުރަތީ ދިރުންތައް ހިމާޔަތްކޮށް، އެ ސަރަޙައްދު ދެމެހެއްޓެނިވި ގޮތެއްގައި ބެލެހެއްޓުމަށް އެކުލަވާލާފައިވާ މުހިންމު އުސޫލެކެވެ. މި ޕްލޭންގައިވާ ގޮތުން، މި ސަރަޙައްދުގެ އެކި ހިސާބުތަކުގައި އުޅަނދުފަހަރު ދުއްވޭނެ އެކި ދުވެލިތައް ވަނީ ބަޔާންކޮށްފައެވެ.

މިކަމާ ގުޅޭގޮތުން ކަމާބެހޭ އިދާރާތަކުން ބުނެފައިވަނީ، SAMPA ސަރަޙައްދުގެ ރައްކާތެރިކަން ފެށެނީ ޒިންމާދާރުކަމާއެކު އުޅަނދުފަހަރު ދުއްވުމުން ކަމަށެވެ. ކަނޑައެޅިފައިވާ ދުވެލީގެ މިންގަނޑުތަކަށް ބޯލަނބައި، އެ އުސޫލުތަކަށް އިހުތިރާމްކުރުމަކީ ކަނޑުގެ ދިރުންތަކަށް، ޚާއްޞަކޮށް އެ ސަރަޙައްދުގައި އުޅޭ ފެހުރިހި ފަދަ ތަކެއްޗަށް ލިބޭ ގެއްލުންތައް ކުޑަކުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، މިއީ އެ ސަރަޙައްދަށް ޒިޔާރަތްކުރާ ފަތުރުވެރިންނާއި، މޫދަށް އެރި އުޅޭ މީހުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ވެސް ކޮންމެހެން ބޭނުންތެރި ކަމެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ ތިމާވެށި ހިމާޔަތްކުރުމަށް ކުރަމުންދާ މަސައްކަތްތަކުގެ ތެރެއިން، ހިމާޔަތްކޮށްފައިވާ ސަރަޙައްދުތައް ހަރުދަނާ އުސޫލުތަކެއްގެ ދަށުން ބެލެހެއްޓުމަށް ވަނީ ޚާއްޞަ އިސްކަމެއް ދީފައެވެ.

އެހެންކަމުން، SAMPA ސަރަޙައްދުގައި ދަތުރުކުރާ ހުރިހާ އުޅަނދުފަހަރަކުންވެސް މެނޭޖްމަންޓް ޕްލޭންގައި ބަޔާންކޮށްފައިވާ ދުވެލީގެ މިންގަނޑުތަކަށް ސަމާލުކަން ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.