ޖަޕާނުގައި ބޭއްވި 'އައިލެންޑް އޯޝަން ސަމިޓް' ގައި ރާއްޖޭގެ ކަނޑުތައް ރައްކާތެރިކުރުމުގެ އަޒުމް އާކޮށްފި

ޖަޕާނުގެ ޓޯކިޔޯގައި މި މަހުގެ 3 އިން 4 އަށް ކުރިއަށްދިޔަ 'އައިލެންޑް އޯޝަން ސަމިޓް' ގައި ދިވެހިރާއްޖެއިން ބައިވެރިވެ، ކަނޑުތަކުގެ ދިރުންތައް ހިމާޔަތްކުރުމަށް ރާއްޖެއިން ކުރަމުންދާ މަސައްކަތްތައް ދުނިޔެއަށް ހާމަކޮށްފިއެވެ.

މި ސަމިޓުގައި ރާއްޖޭގެ ފަރާތުން ތަޤުރީރު ކުރެއްވީ މިނިސްޓަރ އޮފް ސްޓޭޓް އިބްރާހީމް މިމްރާހް އެވެ. ސްޓޭޓް މިނިސްޓަރުގެ ވާހަކަފުޅުގައި، ރާއްޖޭގެ ކަނޑުތައް ދެމެހެއްޓެނިވި ގޮތެއްގައި ބެލެހެއްޓުމަށާއި، ކަނޑުގެ ވަސީލަތްތައް ރައްކާތެރިކުރުމަށް ދިވެހި ސަރުކާރުން ގެންގުޅޭ ހަރުދަނާ ސިޔާސަތުތަކުގެ މައްޗަށް އަލިއަޅުއްވާލެއްވިއެވެ.

މިމްރާހް ވިދާޅުވީ، ކަނޑުތަކުގެ ދިރުންތައް ރައްކާތެރިކުރުމަކީ ރާއްޖޭގެ އިޤްތިޞާދާއި ދިވެހިންގެ ދިރިއުޅުމާ ގުޅިފައިވާ މުހިންމު ކަމެއް ކަމަށެވެ. އަދި ބައިނަލްއަޤްވާމީ ފެންވަރުގައި ކަނޑުތައް ހިމާޔަތްކުރުމަށް ކުރެވޭ މަސައްކަތްތަކުގައި ރާއްޖެއިން އަބަދުވެސް އިސްދައުރެއް އަދާކުރާނެ ކަމުގެ ޔަގީންކަން އޭނާ ދެއްވިއެވެ.

މީގެ އިތުރުން، މޫސުމަށް އަންނަ ބަދަލުތަކުގެ ސަބަބުން ޖަޒީރާ ޤައުމުތަކަށް ކުރިމަތިވާ ގޮންޖެހުންތަކުން އަރައިގަތުމަށްޓަކައި، ކަނޑުތަކުގެ ގަވަރނަންސް ނުވަތަ ހިންގުން ހަރުދަނާކުރުމުގެ މުހިންމުކަން ވެސް ސްޓޭޓް މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.