ފިޗުން ކްރެޑިޓް ރޭޓިން މައްޗަށް ޖައްސައިލައި ރާއްޖެއަށް މާލީ އިދާރާތަކުގެ އިތުބާރު ދަމަހައްޓައިފި

ފިޗް ރޭޓިންގްސްއިން ރާއްޖޭގެ ކްރެޑިޓް ރޭޓިން މަތިކުރުމާ ގުޅިގެން، ސަރުކާރުން އަޅަމުންދާ ހަރުދަނާ މާލީ ފިޔަވަޅުތަކާއި ދަރަނި މެނޭޖްކުރުމަށް ކުރަމުންދާ މަސައްކަތްތަކުގެ ސަބަބުން، ބޭރުގެ މާލީ އިދާރާތަކާއި ތަރައްޤީގެ ބައިވެރިންގެ މެދުގައި ރާއްޖެއަށް އޮތް އިތުބާރު ވަނީ އިތުރުވެފައެވެ.

ފިޗްއިން ވަނީ ރާއްޖޭގެ 'ލޯންގް-ޓާމް ފޮރިން-ކަރަންސީ އިޝުއާ ޑިފޯލްޓް ރޭޓިންގް 'ސީސީ' އިން 'ސީސީސީ-' އަށް މަތިކޮށްފައެވެ. އެ އިދާރާއިން ހާމަކުރި ގޮތުގައި މި ބަދަލު ގެނައީ އޭޕްރީލް 2026 ގައި އަނބުރާ ދައްކަންޖެހޭ ސުކޫކް ދައްކައި ހަލާސްކޮށް، ދަރަނި ނުދެއްކިދާނެކަމުގެ ބިރު ކުޑަވުމާ ގުޅިގެންނެވެ.

އާމްދަނީއަށް ގެނެވޭ އިޞްލާޙުތަކާއި ބޭރު ފައިސާއާ ބެހޭ ޤާނޫނު ތަންފީޒުކުރުމުން ދައުލަތަށް ބޭރު ފައިސާ ލިބޭ މިންވަރު އިތުރުވެގެންދާނެ ކަމަށް ފިޗްއިން ފާހަގަކުރެއެވެ. އަދި ދޭދޭ ޤައުމުތަކާއި ބައިނަލްއަޤްވާމީ ޖަމްޢިއްޔާތަކުގެ އެހީތެރިކަން މެދުނުކެނޑި ލިބުމަކީ ކުރިމަތިވެފައިވާ މާލީ ދަތިތަކަށް ލުޔެއް ލިބޭނެ ކަމެއް ކަމަށްވެސް އެ އެޖެންސީން ބުނެފައިވެއެވެ.

މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސްއިން ބުނި ގޮތުގައި، މި ކުރިއެރުމަކީ ސަރުކާރުގެ އިޤްތިޞާދީ ސިޔާސަތުތަކަށާއި، ބޭރުގެ މާލީ އިލްތިޒާމްތައް އަދާކުރުމަށް ކުރަމުންދާ މަސައްކަތްތަކުގެ އިތުރުން، އާމްދަނީ އިތުރުކުރުމަށް ގެންނަ އިޞްލާޙުތަކަށް ބައިނަލްއަޤްވާމީ މާލީ އިދާރާތަކުން ކުރާ އިތުބާރު ރަމްޒުކޮށްދޭ ކަމެކެވެ. ނާޒުކު އިޤްތިޞާދުތަކަށް ބައިނަލްއަޤްވާމީ ބާޒާރުން ފައިނޭންސް ހޯދުމަކީ ބޮޑު ޚަރަދެއް ހިނގާ ކަމަކަށް ވީނަމަވެސް، ސަރުކާރުގެ އިޞްލާޙީ މަސައްކަތްތަކުގެ ސަބަބުން ބޭރުގެ ބައިވެރިންގެ މެދުގައި ރާއްޖޭގެ އިތުބާރު ބޮޑުވަމުންދާކަން މި ފިޔަވަޅުތަކުން ހާމަވާކަމަށް ސަރުކާރުން ބުނެއެވެ.

ދެމެހެއްޓެނިވި ގޮތެއްގައި ފައިނޭންސް ހޯދުމަށްޓަކައި ބައިނަލްއަޤްވާމީ މާލީ އިދާރާތަކުގެ އިތުރުން ތަރައްޤީގެ ބައިވެރިންނާއެކު ބިނާކުރަނިވި ގޮތެއްގައި މަސައްކަތް ކުރަމުންދާނެ ކަމަށް ފައިނޭންސް މިނިސްޓްރީން ވަނީ ހާމަކޮށްފައެވެ. ސަރުކާރުން ބުނި ގޮތުގައި ރާއްޖޭގެ އިޤްތިޞާދަށް އޮތް އިތުބާރު ދެމެހެއްޓުމަށްޓަކައި ބޭރު ފައިސާގެ ރިޒާވް ވަރުގަދަކުރުމާއި، މާލީ އަދަބުވެރިކަން ޤާއިމްކުރުމުގެ އިތުރުން މެކްރޯ އިކޮނޮމިކް ހަމަޖެހުން ދެމެހެއްޓުމަކީ ސަރުކާރުގެ އެންމެ މުހިންމު އަމާޒުތަކެވެ. ފިޗްއިން ރާއްޖޭގެ ރޭޓިންގް މަތިކުރުމަކީ ސަރުކާރުގެ ސިޔާސަތުތަކުން އެދެވޭ ނަތީޖާ ފެންނަމުންދާ ކަމުގެ މުހިންމު ހެއްކެއް ކަމަށްވެސް އެ މިނިސްޓްރީން ފާހަގަކުރެއެވެ.